ខេត្តកំពង់ធំ ៖ ឯកឧត្តម សុខ លូអភិបាលខេត្តកំពង់ធំបានជំរុញឲ្យអាជ្ញាធរក្រុងស្រុកត្រូវចុះត្រួតពិនិត្យតាមដានការផ្ដល់សាច់ប្រាក់ជូនប្រជាពលរដ្ឋក្រីក្រនៅមូលដ្ឋានឲ្យបានត្រឹមត្រូវ។
ឯកឧត្តមបានថ្លែងយ៉ាងដូច្នេះនៅក្នុងពិធីប្រគេនទានវស្សានិងគ្រឿងឧបភោគបរិភោគជូនទៅដល់ព្រះសង្ឃចំនួន១០វត្តនៅក្នុងក្រុងស្ទឹងសែន ខេត្តកំពង់ធំ ថ្ងៃទី ០១ ខែកក្កដា ឆ្នាំ២០២០ ត្រូវនឹងថ្ងៃពុធ ១១កើត ខែអាសាឍ ទោស័ក ព.ស.២៥៦៤ នៅវត្តឥន្ទ្រីយ៍សំវរៈ(ហៅវត្តកំពង់ធំ) ដោយមានការអញ្ជើញអាជ្ញាធរក្រុងស្រុកមន្ត្រីរាជការយ៉ាងច្រើនចូលរួម ។
ឯកឧត្តមបន្តថា កម្មវិធីផ្តល់សាច់ប្រាក់ជូនប្រជាពលរដ្ឋដែលមានជីវភាពក្រីក្រនិងងាយរងគ្រោះដោយសារផលប៉ះពាល់នៃជំងឺកូវីដ-១៩”ដើម្បីធានាថាបងប្អូនប្រជាពលរដ្ឋក្រីក្រដែលកំពុងជួបបញ្ហាលំបាកពិតប្រាកដទទួលបាននូវជំនួយឧបត្ថម្ភពីរាជរដ្ឋាភិបាល គឺការងារធ្វើបច្ចុប្បន្នភាពគ្រួសារក្រីក្រនិងជនងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ ត្រូវពឹងផ្អែកស្ទើរតែទាំងស្រុងលើអាជ្ញាធរមូលដ្ឋាន គឺមេភូមិនិងក្រុមប្រឹក្សាឃុំសង្កាត់ដែលត្រូវតែធ្វើអោយបានច្បាស់លាស់និងហ្មត់ចត់បំផុតដើម្បីធានាឲ្យបាននូវតម្លាភាពនិងសុច្ចរិតភាពក្នុងការផ្តល់សេវាសម្រាប់កម្មវិធីឧបត្ថម្ភសាច់ប្រាក់នេះ។
ឯកឧត្តមបានជំរុញឲ្យអាជ្ញាធរមូលដ្ឋានគ្រប់លំដាប់ថ្នាក់ ពិសេសចំពោះអ្នកអនុវត្តផ្ទាល់នៅតាមឃុំសង្កាត់ទាំងអស់គឺត្រូវផ្តោតការយកចិត្តទុកដាក់បំពេញការងារនេះឲ្យបានត្រឹមត្រូវ ត្រូវចៀសវាងដាច់ខាតនូវការឃុបឃិតគ្នាដាក់បញ្ចូលសាច់ញាត្តិបងប្អូនកូនក្មួយខ្លួនឯងដែលមិនមែនជាគ្រួសារក្រីក្រនឹងងាយរងគ្រោះពិតប្រាកដដើម្បីទទួលបាននូវប្រាក់ឧបត្ថម្ភនេះ។
ឯកឧត្តម សុខ លូ បានបញ្ជាក់ថា រាជរដ្ឋាភិបាលរហូតដល់ពេលនេះ កម្ពុជាបានបញ្ចេញប្រាក់១២៥លានដុល្លាររួចទៅហើយ ហើយរាជរដ្ឋាភិបាលនឹងត្រៀមបញ្ចេញថវិកាបន្តទៀតបើសិនជាហេតុការណ៍ផលប៉ះពាល់នៃជំងឺកូវីដ១៩នេះអូសអន្លាយបន្តទៀត ប៉ុន្តែរាជរដ្ឋាភិបាលនឹងបញ្ឈប់សកម្មភាពវិញផងដែរ បើសិនជាស្ថានភាពបានប្រសើរឡើង៕
ជាមួយគ្នានោះដែរ ឯកឧត្តមបានឲ្យអាជ្ញាធរក្រុងស្រុកត្រូវចុះត្រួតពិនិត្យនៅតាមវត្តអារាមទាំងអស់ជាពិសេសទីវត្តអារាមនៅតំបន់ដាច់ស្រយាល មិនត្រូវទុកឲ្យព្រះសង្ឃដាច់ចង្ហាន់នោះទេ ។ ក្នុងនោះឯកឧត្តមបានរំលឹកដល់ប្រជាពលរដ្ឋកម្ពុជាគ្រប់រូបត្រូវគោរពនិងអនុវត្តឲ្យបានខ្ជាប់ខ្ជួននូវវិធានការនានាតាមការកំណត់របស់ក្រសួងសុខាភិបាល និង ត្រូវបន្តរក្សាការប្រុងប្រយ័ត្នខ្ពស់ក្នុងការបង្ការ និងការពារនូវការឆ្លងរីករាលដាលនៃជំងឺកូវីដ១៩ ខណៈពេលដែលពិភពលោកកំពុងប្រឈមមុខនឹងការរាត្បាតយ៉ាងខ្លាំងដោយសារជម្ងឺមួយនេះ។
សម្ភារបរិក្ខាដែលបានប្រគេនព្រះសង្ឃនាឱកាសនោះក្នុងមួយវត្តទទួលបានមានទៀនវស្សា១គូ ស្លាដក១ អង្ករ មី ទឹកសុទ្ធ ទឹកក្រូច ត្រីខ ទឹកត្រី ទឹកស៊ីអ៊ីវ និងបច្ច័យមួយចំនួន។គួរបញ្ជាក់ផងដែរថា ខេត្តកំពង់ធំមានវត្តអារាមនិងអាស្រមចំនួន៣០២ និងព្រះសង្ឃមានចំនួន ៣៥៨១ អង្គ ៕
