ខេត្តកែប ៖ តាមសេចក្តីរាយការណ៏ពីប្រជាពលរដ្ឋបានឲ្យដឹងថា សង្វៀនជល់មាន់ និងអាប៉ោង មួយកន្លែង ស្ថិតក្នុងភូមិកោះសោម ឃុំពងទឹក ស្រុកដំណាក់ចង្អើរ ខេត្តកែបបានបើកលេងយ៉ាងអាណាធិបតេយ្យ ដោយសមត្ថកិច្ចមូលដ្ឋានធ្វើជាមិនដឹងមិនលឺ មិនចុះបង្រ្កាប ទុកឲ្យសង្វៀនជល់មាន់នេះលេងម៉ាសេរី មិនទើសក្បាលអ្នកណាឡើយ។
សេចក្តីរាយការណ៏ខាងលើបានឲ្យដឹងទៀតថា សង្វៀនជល់មាន់ និងអាប៉ោងនេះ លេងជារៀងរាល់ថ្ងៃជាយូរឆ្នាំមកហើយ ដែលជាឆ្នាំងបាយរបស់សមត្ថកិច្ចមូលដ្ឋាន ដោយគេឃើញមានក្រុមសមត្ថកិច្ចក្នុងមូលដ្ឋានមួយចំនួនជាអ្នកឈរកាងនៅក្រោយខ្នងនៃល្បែងស៊ីសងទាំងអស់នោះ ដោយក្នុងមួយខែៗបានចំណូលពីល្បែងខាងលើរាប់ពាន់ដុល្លារ ទុកបណ្តោយឲ្យមានកើតចោរលួចប្លន់ អំពើហឹង្សាក្នុងគ្រួសារក្នុងសង្គមជាតិ ដោយសារមានល្បែងស៊ីសងនេះហើយ ទើបក្នុងខេត្តកែបកើតមានចោរប្លន់ជាច្រើនកើតជាបន្តបន្ទាប់ ។
ជាពិសេស លោកស្នងការរងម្នាក់បានប្រាប់កន្លងមកថ្មីៗថា សង្វៀនជល់មាន់ និងអាប៉ោង ស្ថិតក្នុងភូមិកោះសោម ឃុំពងទឹក ស្រុដំណាក់ចង្អើរ បើកបានក៏ដោយសារមានមន្រី្តរងស្នាក់ការប៉េអឺមស្រុកដំណាក់ចង្អើរម្នាក់ឈរកាងជារៀងរាល់ថ្ងៃ ទើបហ៊ានបើកល្បែងស៊ីសងនោះបាន។
ទោះបីយ៉ាងណា លោកស្នងការរងនោះបានប្រាប់ថា លោកនឹងដាក់កម្លាំងតាមចាប់អ្នកបើកល្បែងស៊ីសង និងអ្នកកាងនោះឲ្យបានជាដាច់ខាត ។
ប្រជាពលរដ្ឋកំពុងរង់ចាំមើល តើលោកស្នងការនគរបាលខេត្តកែប ហ៊ានបញ្ចាញថ្វីដៃបង្ក្រាបសង្វៀនជល់មាន់ និងអាប៉ោងខាងលើនេះទេ ដែលនាយឧត្តមសេនីយ៏សន្តិបណ្ឌិត នេត សាវឿន អគ្គស្នងការនគរបាលជាតិ បានដាក់បញ្ជាយ៉ាងម៉ឹងម៉ាត់ ដល់សមត្ថកិច្ចមូលដ្ឋាន ត្រូវបង្ក្រាបគ្រប់ប្រភេទល្បែងស៊ីសងក្នុងមូលដ្ឋានរបស់ខ្លួន ដើម្បីសន្តិសុខសណ្តាប់ធ្នាប់របស់ប្រជាពលរដ្ឋ ៕