ខេត្តរតនគិរី ៖ តាមសេចក្ដីរាយការណ៏ពីប្រជាពលរដ្ឋបានឲ្យដឹងថា បទល្មើសព្រៃឈើកើតយ៉ាងអាណាធិបតេយ្យ ក្នុងខេត្តរតនគិរី ដោយមានមន្ត្រីនគរបាលម្នាក់ជាអ្នកនៅពីក្រោយខ្នងពួកឈ្មួញរកស៊ីឈើខុសច្បាប់ទាំងនោះ។
ជាក់ស្ដែងកាលពីថ្ងៃទី18 ខែកក្កដា ឆ្នាំ2018 មានក្រុមឈ្មួញជាច្រើននាក់បានសំរុកដឹកជញ្ជូនឈើប្រណិតខុសច្បាប់ ចេញពីស្រុកសៀមប៉ាង ខេត្តស្ទឹងត្រែង យ៉ាងអាណាធិបតេយ្យចូលមកខេត្តរតនគិរី ទាំងថ្ងៃទាំងយប់ ដោយសេរីនិងមិនមានការបង្ក្រាបពីសមត្ថកិច្ច នឹងមន្ត្រីជំនាញរដ្ឋបាលព្រៃឈើនោះទេ។
តាមសេចក្តីរាយការណ៏ពីប្រជាពលរដ្ឋរស់នៅស្រុកកូនមុំ ខេត្តរតនគិរី បានអោយដឹងថា ជារៀងរាល់ថ្ងៃ ពួកឈ្មួញបានប្រើ រថយន្តគ្រប់ប្រភេទ ជាមធ្យោបាយដឹកជញ្ជូនឈើខុសច្បាប់ ដូចជាកាមម៉ារីបាឡែន លិចស៊ីស ហាយឡែនឌរ័ និង សាងយ៉ុង ដែលពួកឈ្មួញខាងលើប្រើរូបភាពដូចជារថយន្តតាក់ស៊ីដឹកទំនិញផ្សេងៗ ដើម្បីបន្លំភ្នែកមហាជន និង សមត្តកិច្ចមួយចំនួនដែលមិនបានដឹង ក៏ប៉ុន្តែរថយន្តដឹកឈើទាំងនោះមានជាសញ្ញាសំគាល់ដូចជាចងកេះស្នោពីក្រោយ ចងកាដុងពីក្រោយ
ចងម៉ូតូចាស់ពីក្រោយកាងឡាន ជាសញ្ញាសំគាល់ប្រាប់សមត្ថកិច្ចឈរជើងតាមដងផ្លូវ និងដាក់ឡានតាមដងផ្លូវចាំ ប្រដេញបទល្មើសនានា ដែលពួកគេបានរត់ការបង់លុយឲ្យរួចរាល់ហើយ។
ប្រភពខាងលើបានបន្តទៀតថា ក្រុមឈ្មួញទាំងនោះអាចដឹកជញ្ជូនឈើខុសច្បាប់ពីខេត្តស្ទឹងត្រែង ចូលមកខេត្តរនគិរី នេះបាន ដោយមានការរត់ការពីសំណាក់មន្ត្រីនគបាលម្នាក់ ឈ្មោះក្រៅហៅថា លោក គុប ជាមន្ត្រីនៃស្នងការដ្ឋាននគបាលខេត្តរតនគិរី ហើយក៏ជាអ្នកកាន់ប្រមូលលុយពីបទល្មើស ឲ្យលោកស្នងការរងម្នាក់ទៀតផង ប៉ុន្តែយ៉ាងណាគេហទំពរ័យើង មិនអាចសុំការបំភ្លឺណាមួយបានឡើយពី ឯកឧត្តមស្នងការនគរបាលខេត្ត បានឡើយ ចំណែកលោក ជា តារា ប្រធានការិយាល័យប្រឆាំងបទល្មើសសេដ្ឋកិច្ចខេត្តរតនគិរី ក៏មិនមាន វិធានការទប់ស្កាត់បទល្មើសព្រៃឈើខាងលើឲ្យមានប្រសិទ្ធភាពខ្ពស់នោះឡើយ ដោយកាលពីប៉ុន្មានខែមុន លោកបាន និយាយថា លោកនឹងខិតខំទប់ស្កាត់បទល្មើសព្រៃឈើឲ្យដូចភ្លៀងរលឹម ឲ្យតែមានការរាយការណ៏ ណាមួយច្បាស់លាស់ពិតប្រាកដពីបទល្មើសព្រៃឈើ។
តែទោះយ៉ាងណា ប្រជាពលរដ្ឋសុំឲ្យឯកឧត្តមស្នងការនគរបាលខេត្ត គួរតែពិនិត្យមើលមន្ត្រីក្រោមឧវាទមួយចំនួន ដែលពាក់ពន្ធ័នឹងបទល្មើសព្រៃឈើ ដែលខ្លួនជាមន្ត្រីបែរជាចូលរួមបង្កើតបទល្មើសបែបនេះទៅវិញ និងធ្វើការអប់រំបញ្ឈប់ ជាបន្ទាន់ កុំអោយខូចឈ្មោះដល់ស្ថាប័ននគរបាល និងថ្នាកដឹកនាំល្អៗ ក្នុងខេត្តទៀតផង ដោយប្រមុខរាជរដ្ឋាភិបាល បាននិងកំពុងលុបបំបាត់អំពើពុករលួយគ្រប់រូបភាព និងសំដៅអភិវឌ្ឍន៍ប្រទេសជាតិអោយមានការីកចំរើនផងនោះ កុំឲ្យដោយសារតែមន្ត្រីមួយចំនួនតូចកាងបទល្មើសព្រៃឈើបង្កភាពអាណាធិបតេយ្យដល់ សង្គមជាតិនឹងទឹកចិត្តពលរដ្ឋរឿងបញ្ហាព្រៃឈើ។
មួយវិញទៀត ប្រជាពលរដ្ឋក៏សំណូមពរដល់ឯកឧត្តម ថងសាវុន អភិបាលខេត្តរតនគីរី ពិនិត្យនិងទប់ស្កាត់បទល្មើសព្រៃឈើដែលមានដង្កូវដុះចេញពីសាច់ឯង យកតួនាទីទៅកាងបទល្មើសព្រៃឈើយ៉ាងពេញបន្ទុក ហើយគេហទំពរ័យើងរង់ចាំរាល់ការបំភ្លឺពីគ្រប់ភាគីពាក់ពន្ធ័៕
