ខេត្តកំពង់ចាម ៖ ក្រុមឈ្មួញដឹកជញ្ជូនទំនិញ និងដឹកជញ្ជូនឈើបានឲ្យដឹងថា សម្រាប់រថយន្តដឹកធុនធំភ្លៅ៤ ត្រូវបង់ក្នុងមួយជើងចាប់ពី១០ម៉ឺនរៀលទៅ១៥ម៉ឺនរៀលដោយមិនចាំបាច់ចូលថ្លឹង ចំណែករថយន្តដឹកស៊ីម៉ងត៍ និងដឹកទំនិញផ្សេងៗ ក៏ត្រូវចូលបង់លុយឲ្យក្រុមមន្ត្រីរបស់លោក ហេង ផល្លា ប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ៦អា ភូមិជានា ឃុំជានា ស្រុកបាធាយ ខេត្តកំពង់ចាម ក្នុងមួយជើងពី៦ម៉ឺនទៅ១០ម៉ឺនរៀលផងដែរ ហើយសម្រាប់រថយន្តដឹកអុសត្រូវបង់ក្នុងមួយជើងពី៦ម៉ឺនរៀលទៅ១០ម៉ឺនរៀលទើបអាចឆ្លងកាត់បាន។
ប្រភពបានបន្ដទៀតថាលោក ហេង ផល្លា និងបក្ខពួកមិនដែលធ្វើការផាកពិន័យម្ចាស់រថយន្តធំៗ ដឹកជញ្ជូនទំនិញលើសទម្ងន់ឬតកន្ទុយ តទ្រុង ខុសលក្ខណៈបច្ចេកទេសនោះទេ ពួកគេគិតតែពីប្រមូលលុយចែកគ្នាយ៉ាងរំភើយ។
ក្រុមឈ្មួញដឹកជញ្ជូនទំនិញ និងដឹកជញ្ជូនអុស សំណូមពរដល់លោក គួច ចំរើន អភិបាលខេត្តកំពង់ចាម និងលោក ស៊ុន ចាន់ថុល រដ្ឋមន្ត្រីក្រសួងសាធារណការ មិនគួរមើលរំលងតទៅទៀតទេចំពោះការប្រព្រឹត្តអំពើពុករលួយរបស់លោក ហេង ផល្លា ប្រធានស្ថានីយ៍ជញ្ជីងថ្លឹងរថយន្តផ្លូវជាតិលេខ៦អា ភូមិជានា ឃុំជានា ស្រុកបាធាយ ខេត្តកំពង់ចាម។
មកដល់ពេលនេះ យើងមិនទាន់អាចសុំការបំភ្លឺពីលោក ហេង ផល្លា បានទេ ដោយសារពុំមានលេខទូរស័ព្ទ តែយើងខ្ញុំរង់ចាំទទួលការបំភ្លឺពីលោក ហេង ផល្លា ជានិច្ច៕
