ខេត្តរតនគិរី ៖ តាមប្រភពពត័មានបានឲ្យដឹងថា នៅយប់ថ្ងៃទី១៣ ខែមិថុនា ឆ្នាំ២០១៩ ក្បួនឈើប្រណីតដឹកតាមឡានឡង់គ្រីសស័រកែឆ្នៃ របស់លោក គឹម នី ហៅ នីកាចាញ ដែលគេស្គាល់ថាជាមនុស្សរបស់លោកស្នងការរងខេត្តរតនគីរីដ៏មានអំណាចមួយរូប បានសម្រុកដឹកឈើចេញទៅលក់នៅប្រទេសវៀតណាមដូចហែរកឋិន ក្នុងមួយថ្ងៃៗមានចំនួនពី៥០ទៅ៨០គ្រឿង ចេញតាមច្រករបៀងប៉ុស្តិ៍ហ្វាតាំបាសៅដោយរលូន។
តាមប្រភពបញ្ជាក់ថា ឈើប្រណីតនេះ មិនមែនជារបស់លោក នីកាចាញ ម្នាក់ឯងទេ គឺសហការជាមួយលោកស្នងការរងដ៏ល្បីឈ្មោះប្រចាំខេត្តរតនគិរី ដោយមានការសម្ងំស្ងៀមបើកភ្លើងខៀវពីសំណាក់លោក ថង សាវុន ចៅហ្វាយខេត្តរតនគីរី។
ប្រភពខាងលើបន្តថា មេធំឈ្មួញឈើ លោក នីកាចាញ ដែលមានលោកធំនៅពីក្រោយ បានកេណ្ឌកម្មករស៊ីឈ្នួលកាប់ឈើ ឱ្យចូលទៅកាប់នៅក្នុងព្រៃសហគមន៍នៃស្រុកអណ្ដូងមាស ឃុំញ៉ាង ភូមិម្លូ រួចហើយដឹកពីព្រៃ តាមរថយន្ដឡង់គ្រីស័រកែច្នៃ និង ចេញទៅតាមច្រករបៀងប៉ុស្តិ៍ហ្វាតាំហ្វាសាវ ចូលទៅទឹកដីប្រទេសវៀតណាមតែម្ដង។
ក្រុមអ្នកស៊ើបអង្កេតសកម្មភាពមេឈ្មួញធំៗឧក្រិដ្ឋកម្មព្រៃឈើលើ បានឱ្យដឹងថា បន្ទាប់ពីដកហូតតំណែងលោក គឹម រស្មី មក គឺមេឈ្មួញអាក់ខានធ្វើអាជីវកម្មមួយរយៈ ហើយពេលនេះ ពួកគេបាន រត់ការយកលុយរាប់មឺនដុល្លារមករត់ការបិទមាត់អាជ្ញាធរមានសមត្ថកិច្ចគ្រប់លំដាប់ថ្នាក់ អ៊ីចឹងហើយបានអស់លោកសមត្ថកិច្ចទាំងនេះ បណ្តោយឲ្យមេឈ្មួញទាំងនេះ ដឹកជញ្ជូនឈើខុសច្បាប់ឆ្លងដែន ដោយគ្មានការបង្ក្រាប។
ប្រភពខាងលើបន្តថាការថៅកែឈើជនជាតិវៀតណាមបានឲ្យលុយយកមករត់ការនេះមុនគឺតម្រូវឱ្យ លោក ហេង រតនា និងលោកនីកាចាញ បង្ខំចិត្តត្រូវតែធ្វើយ៉ាងណា ដឹកជញ្ជូនឈើចេញឱ្យបានខានតែបាន។ ម៉្យាងមេឈ្មួញដែលមានលោកស្នងការរង ប្រចាំខេត្តរតន:គីរីជាបង្អែក បានទិញទឹកចិត្តសម្ថកិច្ចក្នុងខេត្តនេះអស់ទៅហើយ ជាពិសេសលោក ថង សាវុន អភិបាលខេត្ត បែរជាសម្ងំស្ងៀមទៅវិញមិនបង្ក្រាប។
មហាជនរិះគន់មេបញ្ជាការអាវុធហត្ថខេត្តរតន:គីរឺលោក ថាវ យ៉េន ដែលទើបតែដូរថ្មី កន្លងមកធ្វើឱ្យគេគិតថា ទំនងល្អជាងលោក គឹម រស្មី តែមិនយូរប៉ុន្មានផង ក៏ត្រូវកក្រើកឡើងវិញរឿងដឹកជញ្ជូនឈើឆ្លងដែនទៅប្រទេសវៀតណាមយ៉ាងពេញទំហឹងដ៏ដែល។
សេចក្តីរាយការណ៍ឲ្យដឹងថា ឈើប្រណីតក្នុងមួយថ្ងៃៗ ដែលពួកគេដឹកចេញទៅវៀតណាម គឺមិនតិចជាងពី ៣០ ទៅ ៥០ រថយន្ដឡើយ និងកំពុងបន្តដឹករាល់ថ្ងៃ គឺដឹកចាប់តាំពីថ្ងៃទីដើមខែមិថុនា ឆ្នាំ២០១៩ មកម៉្លេះ ហើយពួកគេមានគំរោងដឹកចេញពីកន្លែងស្តុកឱ្យអស់នៅដំណាច់ ខែមិថុនានេះ មុនពេលភ្លៀងធ្លាក់ខ្លាំងមកដល់។ ប្រជាពលរដ្ឋឆ្ងល់ថា ហេតុអ្វីសមត្ថកិច្ចគ្រប់លំដាប់ថ្នាក់ មិនចាត់វិធានការប្រយុទ្ធប្រឆាំង បង្ក្រាបបទល្មើសបំផ្លាញព្រៃឈើដ៏មហាបង្កវិនាសកម្មនេះ? បែជានាំគ្នាសុខចិត្តឱនក្បាល ឲ្យមេឈ្មួញទាំងនេះទិញទឹកចិត្ត ហើយហ៊ានផ្គើនប្រឆាំងនឹងបទបញ្ជារប្រមុខរាជរដ្ឋាភិបាលទៅវិញ។
អង្គភាពយើងរង់ចាំការបំភ្លឺពិគ្រប់ភាគីពាក់ពន្ថ័ទាំងអស់ ៕
