ខេត្តស្វាយរៀង ៖ មានករណីឈ្មួញស្រូវបានផ្ទុះជម្លោះ ឈ្លោះដណ្តើមបេន ផែ ទូកកាណូតគ្នា ដោយម្ខាងយកទូកកាណូតដាក់ត្រួតគ្នា បិទព្រែកមិនឲ្យ ទូកកាណូតភាគីម្ខាងទៀតចូលមកដឹកស្រូវធ្វើឲ្យជម្លោះផ្ទុះឡើង ចំណែកអ្នកមានបេនរថយន្តនៅដើមផ្លូវយករថយន្តដឹកស្រូវដាក់បិទផ្លូវរថយន្តមិនឲ្យរថយន្តភាគីខាងចុងផ្លូវចូលរថយន្តទៅបេន ផែកាណូត វិញ បង្កឲ្យមានការកកស្ទះរថយន្តពេញដងផ្លូវរយៈពេល១២ម៉ោង តាំងពីវេលាម៉ោង ៧ ព្រឹក រហូតដល់ម៉ោង ២រសៀល ថ្ងៃទី ៤ ខែសីហា ឆ្នាំ ២០២១ នៅចំណុចប្រឡាយទាហាន ស្ថិតនៅភូមិព្រៃវល្លិ៍ ឃុំថ្មី ស្រុកកំពង់រោទិ៍ ជិតច្រកទ្វារព្រំដែនអន្តរជាតិព្រៃវល្លិ៍ ។
បើតាមសមត្ថកិច្ចនគរបាលប៉ុស្ត៍រដ្ឋបាលឃុំថ្មី បានឲ្យដឹងថា ករណីជម្លោះរវាងឈ្មួញស្រូវ និងឈ្មួញស្រូវនេះ គឺដណ្តើមផែទូក កាណូត ផ្ទេរស្រូវលក់ឲ្យ ម៉ូយវៀតណាម ។ មុនពេលកើតហេតុ គឺឈ្មោះ ឡុង លាភ ភេទប្រុស អាយុ២៥ឆ្នាំ និងឪពុក មានស្រុកកំណើតនៅខេត្តព្រៃវែងបានមកទិញដីធ្វើបេន ចំណតរថយន្ត ជាប់ប្រឡាយទាហាន ក្បែរព្រែកព្រៃវល្លិ៍ ជាប់ព្រំដែន ហើយនៅព្រឹកកើតហេតុ ២នាក់ឪពុកនិងកូន បានឲ្យវៀតណាមចតទូកពេញប្រឡាយ ចត កាណូតត្រួតគ្នា រួចឲ្យកម្មករលីស្រូវពីលើរថយន្តចុះទូក បង្កការបិទផ្លូវទូកជិត ធ្វើឲ្យភាគីម្ខាងទៀតឈ្មោះ តាក ប៊ុនណារិ ទ្ធ ភេទប្រុស អាយ ៥៤ ឆ្នាំ នៅភូមិព្រៃវល្លិ៍ ឃុំថ្មី ដែលមានបេន ចំណតរថយន្តដឹកស្រូវ នៅដើមផ្លូវ មិនអាចឲ្យម៉ូយទូកវៀតណាម ចូលមកទិញស្រូវដាក់ទូកកាណូតបាន ក៏យក រថយន្តដឹកស្រូវដាក់បិទផ្លូវមិនឲ្យរថយន្តភាគីឪពុក កូន ចូលដូចគ្នា ។
សមត្ថកិច្ចបានលើកឡើងថា នៅប្រឡាយទាហាននេះ ជាផ្លូវទឹកអាចឲ្យទូក កាណូតធំ ចេញចូលបាន ដោយមានទំហំទទឹង ប្រមាណ ១២ ម៉ែត្រ បណ្តោយប្រវែង ៧០០ ម៉ែត្រ មានផ្លូវទំនប់ ជាថ្នល់អមសងខាង មានក្រុមហ៊ុនទិញ លក់ស្រូវ ចំនួន ៣ ប្រកបមុខរបរទិញ លក់ស្រូវ ឲ្យវៀតណាម ។
ទី ១. ឈ្មោះ តាក បូរ៉ា ហៅ អ៊ិ ច ភេទប្រុស អាយុ ៥៧ ឆ្នាំ មាន បេនចំណតខាងជើងប្រឡាយ ។ ទី ២. ឈ្មោះ តាក ប៊ុនណារិ ទ្ធ ហៅ មិច ភេទប្រុស អាយុ ៥៤ ឆ្នាំ មានចំណតនៅខាងត្បូងប្រឡាយ ។
ហើយនៅឆ្នាំ ២០២០ ឈ្មោះ ឡុង លាភ ភេទប្រុស អាយុ ២៥ ឆ្នាំ និងឪពុក បានមកទិញដីនៅចំណុចមាត់ព្រែកព្រំដែនជាង ១ ហិកតា ចាក់ដីធ្វើ ចំណតរថយន្ត ជាប់នឹងប្រឡាយទាហានខាងត្បូងដែរ ហើយមិននឹកស្មានថា ផ្ទុះជម្លោះដណ្តើមចំណតគ្នាចុះស្រូវបែបនេះសោះ ។
អាជ្ញាធរវៀតណាម បានបិទព្រំដែន ១ខែមកហើយ មិនឲ្យប្រជាជនវៀតណាម ចូលមកទិញស្រូវ នៅច្រកព្រំដែនប្រឡាយទាហាននេះ ទើបតែលោក អភិបាលខេត្ត ស្នើរសុំទៅភាគីវៀតណាម ឲ្យអនុញ្ញាតិឲ្យប្រជាជនវៀតណាមចូលមកទំនាក់ទំនងទិញស្រូវ និងផ្លាស់ប្តូរទំនិញឡើងវិញ បាន ០៣ ថ្ងៃ ប៉ុណ្ណោះ មិនគួរបង្កជាបញ្ហាបែបនេះសោះ ។ ក្រោយមកលោកអធិការ នៃ អធិការដ្ឋាននគរបាលស្រុកកំពង់រោទិ៍ ដឹកនាំកម្លាំងចុះទៅសម្របសម្រួល រៀបចំសណ្តាប់ធ្នាប់ ឲ្យក្រុមហ៊ុនទាំងពីរ បើកផ្លូវទូក ផ្លូវថ្នល់ ដើម្បីរថយន្តចូលក្នុងចំណត និងផែទូកតាមចំណតរៀងៗ ខ្លួន ។
លោក តាក ប៊ុនណារិទ្ធ ហៅ មិច បានសំណូមពរសុំឲ្យអាជ្ញាធរស្រុក លោកអភិបាលខេត្តស្វាយរៀង មេត្តាស្តារប្រឡាយទាហាន ពង្រីកចេញខាងឲ្យ បាន២ម៉ែត្រកន្លះម្ខាង ដើម្បីងាយស្រួលចូលទូកកាណូត ។
ទាក់ទិនករណីនេះដែរ លោក សុច ពិសី អភិបាលស្រុកកំពង់រោទិ៍ បានមានប្រសាសន៍ថា កន្លងមក លោកបានស្នើទៅលោកអភិបាលខេត្ត ស្វាយរៀង ដើម្បីស្តារ ប្រឡាយទាហាននេះ លោកក៏បានឲ្យលោកប្រធានមន្ទីរធនធានទឹក និង ឧតុនិយមខេត្ត មកសិក្សារួចហើយ លទ្ធផលយ៉ាងណា មិនទាន់ទទួលបានទេ ។ លោកបន្តទៀតថា ប្រឡាយទាហាននេះ ជាផ្លូវទឹកដ៏សំខាន់សម្រាប់ផ្លាស់ប្តូរទំនិញ ជាពិសេសចំណតទូក កាណូត សម្រាប់នាំកសិផល កសិកម្មរបស់ ប្រជាកសិករទៅប្រទេសវៀតណាម និងនាំទឹកពីព្រែកព្រំដែន មកស្រោចស្រប់ដីស្រែប្រជាពលរដ្ឋឃុំថ្មីផងដែរ ។
បើតាមឈ្មួញទិញលក់ស្រូវបានឲ្យដឹងថា ស្រូវដែលនាំចេញទៅប្រទេសវៀតណាមនេះ ជាប្រភេទស្រូវ អ៊ី អ៊ែរ ៥៤ និង ៨៥ ស្រូវសើមលក់ចេញ ឲ្យ វៀតណាម ក្នុង ១ គីឡូ តម្លៃ ៤.៦៥០ ដុង ស្មើ ៨១០ រៀល លុយខ្មែរ ដោយគិតថ្លៃឈ្នួលកម្មករលើកដាក់លីចុះដល់ទូក ៕
