ខេត្តបន្ទាយមានជ័យ ៖ មន្ត្រីគយតូចតាចក្នុងខេត្តបន្ទាយមានជ័យមួយចំនួនបានខ្សឹបគ្នាថា គ្រាន់តែទទួលបានតំណែងជាប្រធានការិយាល័យគយច្រកទ្វារអន្តរជាតិប៉ោយប៉ែតភ្លាមគឺ លោក ងួន កុសល ប្រើតួនាទីនិងអំណាចរបស់ខ្លួន គាបជំរិតពីក្រុមអាជីវករដោយគ្មានញញើតច្បាប់រដ្ឋទាល់តែសោះ…?។
ទន្ទឹមនិងនោះ លោក ងួន កុសល ប្រធានការិយាល័យគយច្រកទ្វារអន្តរជាតិប៉ោយប៉ែត ត្រូវបានមន្ត្រីគយច្រកខ្សឹបខ្សៀវគ្នាទៀតថា លោកបាន សូកលុយរាប់មឺនដុល្លារទៅមេអគ្គនាយកគយនិងរដ្ឋាករ ដើម្បីមកកាន់តំណែងជាមេការិយាល័យគយច្រកប៉ោយប៉ែត ហេតុនេះហើយ ទើបខំប្រឹងប្រព្រឹត្តអំពើពុករលួយស្រង់ដើមវិញ។ ប្រសិនបើមិនសូកទេនោះ គឺលោក ងួន កុសល មិនអាចទទួលបានតំណែងជាប្រធានការិយាល័យគយច្រកទ្វារអន្តរជាតិប៉ោយប៉ែតបានស្រួលៗបែបនេះទេ?។ ដូច្នេះហើយទើបត្រឹមមួយរយៈពេលខ្លីសោះ ប្រធានការិយាល័យគយប៉ោយប៉ែតរូបនេះ សាងភាពល្បីល្បាញខាងប្រព្រឹត្តអំពើពុករលួយខ្លាំងជាងលោក ហ៊ុយ សុជាតិ អតីតប្រធានការិយាល័យគយច្រកប៉ោយប៉ែត មុនទៅទៀត…?។
បើតាមប្រភពខាងលើបានឲ្យដឹងថា ការដែលមេការិយាល័យគយប៉ោយប៉ែនតថ្មី ហ៊ានធ្វើបែបនេះ គឺដោយសារលោកអាងបងជាអគ្គនាយករងនាយកដ្ឋានគយនិងរដ្ឋាករកម្ពុជា ហើយលោក ងួន កុសល មិនដែលនៅកន្លែងការិយាល័យច្រកប៉ោយប៉ែតរបស់ខ្លួនជាប់លាប់ទេ គឺលោកយកពេលវេលារបស់រដ្ឋផ្តល់ឲ្យទៅលេងល្បែងជល់មាន់ទៅវិញ។មួយវិញទៀត ដោយមានការបើកដៃពីមន្ត្រីគយនៅក្រោមឧវាទលោក ងួន កុសល ពួកឈ្មួញបានលាក់ទំនិញគុណភាពខ្ពស់គេចពន្ធ នៅតាមរទេះអូសរបស់កម្មករយ៉ាងរលូន ជាហេតុបណ្តាលឲ្យរដ្ឋបាត់បង់ចំណូលយ៉ាងច្រើន ចំណែកលោក ងួក កុសល បានទទួលលុយពុករលួយពីករណីនេះយ៉ាងគឃ្លើន។
មន្ត្រីពាក់ព័ន្ធនៅច្រកទ្វារអន្តរជាតិប៉ោយប៉ែតបានលួចខ្សឹបឲ្យដឹងដែរថា បច្ចុប្បន្នទំនិញដែលឈ្មួញធំៗនាំចូលតាមច្រកនេះបង់ពន្ធត្រឹមម្ភៃទៅសាមសិបភាគរយតែប៉ុណ្ណោះ ក្រៅពីនេះឈ្មួញឃុបឃិតបែងចែកផលប្រយោជន៍ជាមួយលោក ងួន កុសល ប្រធានការិយាល័យគយច្រកប៉ោយប៉ែត ដែលកំពុងល្បីល្បាញខាងប្រព្រឹត្តអំពើពុករលួយ។
គួរបញ្ជាក់ដែរថាដោយសារអាងមានខ្នងបង្អែករឹងមាំបែបនេះ ទើបលោក ងួន កុសល ហ៊ានឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងពេញបន្ទុក ហើយបែរជាគាបសង្កត់ឈ្មួញនិងអាជីវករតូចតាច ក៏ដូចជាប្រជាពលរដ្ឋដែលនាំចូលទំនិញតាមច្រកប៉ោយប៉ែត និងតាមច្រករបៀងតូចៗដោយគ្មានយោគយល់ឡើយ។
ពួកឈ្មួញធំៗនឹងអាជីវករ កំពុងស្វែងរកទំនាក់ទំនងជាមួយលោក ងួន កុសល ដើម្បីអាចនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ឲ្យបានរលូន។
ករណីមន្ត្រីគយខាងលើរិះគន់ថាប្រធានការិយាល័យច្រកទ្វារអន្តរជាតិប៉ោយប៉ែត ឃុបឃិតគ្នាជាមួយឈ្មួញកែឯកសារបន្លំប្រភេទទំនិញបំបាត់ចំណូលពន្ធរដ្ឋ ដែលជាអំពើពុករលួយធ្វើឲ្យរាំងស្ទះដល់ការអភិវឌ្ឍន៏សង្គមជាតិ គួរតែលោកបណ្ឌិត គុណ ញឹម អគ្គនាយកគយនឹងរដ្ឋាករកម្ពុជា នឹងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បើកការស៊ើបអង្កេតទៅលើលោក ងួន កុសល ប្រធានការិយាល័យគយច្រកទ្វាអន្តរជាតិប៉ោយប៉ែត ហើយ បើនៅបណ្តោយទៀត ជាតិនឹងបាត់បង់ចំណូលពន្ធចូលរដ្ឋជាច្រើនជាក់ជាមិនខាន ។
អង្គភាពយើងពុំអាចសុំការបំភ្លឺបានឡើយ តែស្វាគមន៏និងរង់ចាំការពន្យល់ពិគ្រប់ភាគីពាក់ពន្ធ័៕
