ខេត្តព្រះវិហារ ៖ យោងតាមបណ្ដាញសារព័ត៌មានក្នុងស្រុកបានចេញផ្សាយកាលពីថ្មីៗនេះថា ក្រុមហ៊ុន PP PT មានទីតាំងស្ថិតនៅភូមិរុងរឿង១ ឃុំមរកត ស្រុកជាំក្សាន្ត ខេត្តព្រះវិហារ បានធ្វើសកម្មភាព ដឹកឈើហ៊ុបចេញពីព្រៃព្រះរាជក្រឹត ព្រៃព្រះរការ ចូលមកក្រុមហ៊ុន ដើម្បីអារជ្រៀក រួចឡើងរថយន្តដឹកយកទៅចែកចាយនៅតាមបណ្តាខេត្តផ្សេងៗដោយរលូន។ ហេតុដូច្នេះទើបមានការលើកឡើងថា ព្រៃឈើមួយចំនួននៅក្នុងខេត្តព្រះវិហារ បានទទួលរងការបំផ្លិចបំផ្លាញយ៉ាងធ្ងន់ធ្ងរដោយក្រុមហ៊ុន PP PT កាប់និងប្រមូលក្រោមលេសថាជាឈើសម្រាប់សាងសង់ផ្ទះសម្រាប់អតីតយុទ្ធជន។
បើតាមសេចក្តីរាយការណ៍មកថា ក្រុមហ៊ុន PP PT មានឈ្មោះ ហូឡា សោភ័ណ្ឌ ជានាយកក្រុមហ៊ុន បានប្រគល់ការងារឲ្យលោក ដេ វីដ ជាអ្នកចាត់ចែងប្រមូលឈើប្រភេទហ៊ុបចេញពីគម្របព្រៃព្រះរការ ហើយក៏ជាអ្នកចាត់ចែងចែកជាកញ្ចប់លាភសក្ការៈឲ្យទៅដល់សមត្ថកិច្ចពាក់ព័ន្ធគ្រប់លំដាប់ថ្នាក់ដែរ។ តាមព័ត៌មានថា ក្រុមហ៊ុនខាងលើមានអាជ្ញាប័ណ្ណសម្អាតដីអនុក្រឹត សម្រាប់ចែកជូនដល់គ្រួសារកងទ័ពចំនួនត្រឹមតែ៤៥០០ហិកតាតែប៉ុណ្ណោះ ហើយមកទល់ពេលនេះ ដីចំនួន៤៥០០ហិកតានោះ ក៏បានសម្អាតរួចរាល់អស់ហើយដែរ តែក្រុមហ៊ុនមួយនេះនៅតែបន្តប្រើអាជ្ញាប័ណ្ណបន្តទៀត ដើម្បីកៀងគរពលរដ្ឋឲ្យចូលទៅកាប់ឈើនៅព្រៃការពារព្រះរការ ដែលនៅក្រៅតំបន់ដែលត្រូវសម្អាតមិនចេះចប់ ដែលគ្រប់គ្រងដោយមន្ត្រីអភិរក្សរបស់មន្ទីរបរិស្ថានខេត្ត យកមកចូលក្រុមហ៊ុនអារជ្រៀកឡើងរថយន្តធំៗទៅចែកចាយតាមបណ្តាខេត្តផ្សេងៗ រួចយកលេសថា ដឹកជញ្ជូនយកទៅធ្វើផ្ទះអតីតយុទ្ធជនដដែល។
ជុំវិញករណីនេះនៅមិនទាន់ទទួលបានការបំភ្លឺពីតំណាងក្រុមហ៊ុននិងមន្ទីរពាក់ព័ន្ធនៅឡើយទេ។ចំណែក លោក ពឹង ទ្រីដា ប្រធានមន្ទីរកសិកម្មរុក្ខាប្រមាញ់និងនេសាទខេត្តព្រះវិហារ បានប្រាប់បណ្ដាញសារព័ត៌មាន ដែលចេញផ្សាយតាមអេឡិចត្រូនិចមួយថា ក្រុមហ៊ុនខាងលើនេះ បានសុំអាជ្ញាប័ណ្ណប្រមូលផលដីសង្គមកិច្ចរបស់កងពលលេខ៩ ហើយលោកក៏បានបន្តថា ពាក់ព័ន្ធនិងបញ្ហានេះ លោកនិងចាត់ចែងឲ្យជំនាញឆែកមើល។
លោក ដេវីត មិនអាចសុំការបំភ្លឺបានទេ ព្រោះពុំមានលេខទូសព្ទ័ តែនិងព្យាយាមសុំការពន្យល់នៅពេលក្រោយ៕
