ខេត្តពោធិសាត់ ៖ ប្រភពពីមន្ត្រីអាជ្ញាធរមូលដ្ឋាននិងប្រជាពលរដ្ឋក្នុងស្រុកវាលវែង ខេត្តពោធិសាត់ បានឲ្យដឹងថា បច្ចុប្ប ន្នល្បីមេឈ្មួញដុះស្លែឧកញ៉ា តាំង អៀង បានចំណាយលុយរាប់សែនដុល្លារ ដើម្បីប្រមូលទិញឈើនិងដឹកជញ្ជូ នឈើចេញពីស្រុកវាលវែង ខេត្តពោធិសាត់ យ៉ាងពេញបន្ទុក ដោយគ្មានមន្ត្រីជំនាញ ឬសមត្ថកិច្ចពាក់ព័ន្ធណាហ៊ានប៉ះពា ល់ឡើយ ។ ប្រភពបានឲ្យដឹងទៀតថា ការដែលមេឈ្មួញ តាំង អៀង អាចធ្វើអ្វីៗតាមអំពើចិត្ត គឺដោយសារមានការឃុបឃិ តបើកដៃពីសំណាក់មន្ត្រីបរិស្ថាន មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធជាច្រើនស្ថាប័ន ដែលគិតតែពីរឿងប្រមូលលុយចែកគ្នាធ្វើមានធ្វើបានយ៉ាងសុខស្រួល និងក្រោមក្រសែភ្នែករបស់លោក ម៉ៅ ធនិន្ទ អភិបាលខេត្តពោធិសាត់ ដែលសម្ងំស្ងៀមទុកឲ្យមេឈ្មួញ តាំង អៀង បំផ្លាញព្រៃឈើយ៉ាងអាណាធិបតេយ្យ។ និយាយជារួមលោក ឡាយ វិសិដ្ឋ ប្រធានមន្ទីរកសិកម្មខេត្តពោធិសាត់ ក៏ដូចជាលោក ប៉ាន់ មរកត ប្រធានមន្ទីរបរិស្ថានខេត្តពោធិសាត់ និងលោក ម៉ៅ ធនិន្ទ អភិបាលខេត្តពោធិសាត់ នាំគ្នាសម្ងំស្ងៀម ខណៈដែលមេឈ្មួញ តាំង អៀង បំផ្លាញព្រៃឈើក្នុងស្រុកវាលវែង និងស្រុកភ្នំក្រវាញ យ៉ាងរាលដាល។
ប្រភពដែលស្និទ្ធនឹងមេឈ្មួញ តាំង អៀង បានឲ្យដឹងថាបច្ចុប្បន្នមេឈ្មួញរូបនេះបានចំណាយលុយរាប់សែនដុល្លារឲ្យបក្ខពួករបស់ខ្លួនប្រមូលទិញឈើ នៅក្នុងតំបន់ដែនជម្រកសត្វព្រៃភ្នំសំកុស និងតំបន់អភិរក្សជួរភ្នំក្រវាញភាគកណ្ដាលយ៉ាងពេញបន្ទុក។ ឈើដែលមេឈ្មួញ តាំង អៀង និងបក្ខពួកកំពុងប្រមូលទិញភាគច្រើនជាឈើប្រភេទធ្នង់ គ្រញូង បេង នាងនួន និងឈើរាជកុលជាដើម គឺសុទ្ធតែជាឈើមានតម្លៃខ្ពស់ក្នុងទីផ្សារប្រទេសវៀតណាម។ មេឈ្មួញ តាំង អៀង បានប្រើប្រាស់អាជ្ញាប័ណ្ណក្រុមហ៊ុនអឹមឌីអេស (MDS)របស់ឧកញ៉ា ទ្រី ភាព ដែលហួសសុពលភាពជាយូរមកហើយនោះ ដើម្បីដឹកជញ្ជូនឈើចេញពីស្រុកវាលវែង និងស្រុកភ្នំក្រវាញ តាមអំពើចិត្តរបស់ខ្លួនដោយគ្មានញញើតអ្វីឡើយ។
មន្ត្រីនៅក្នុងមន្ទីរកសិកម្មខេត្តពោធិសាត់ បានឲ្យដឹងថា ប្រសិនបើគ្មានការឃុបឃិតបើកដៃពីសំណាក់លោក ឡាយ វិសិដ្ឋ ប្រធានមន្ទីរកសិកម្មខេត្តពោធិសាត់ និងពីសំណាក់មេរដ្ឋបាលព្រៃឈើខេត្តពោធិសាត់ ទេនោះ គឺមេឈ្មួញ តាំង អៀង មិនអាចបន្តប្រមូលទិញឈើដឹកចេញពីស្រុកវាលវែង និងស្រុកភ្នំក្រវាញ យ៉ាងអណាធិបតេយ្យដូចសព្វថ្ងៃនេះទេ។ ទាល់តែមានការឃុបឃិតជាប្រព័ន្ធពីសំណាក់មន្ត្រីជំនាញ និងសមត្ថកិច្ចពាក់ព័ន្ធជាច្រើនស្ថាប័ន ទើបមេឈ្មួញ តាំង អៀង អាចបន្តប្រមូលទិញឈើនិងដឹកជញ្ជូនឈើចេញពីស្រុកវាលវែង និងស្រុកភ្នំក្រវាញ ទៅដល់គោលដៅយ៉ាងសុខស្រួល។ ប្រការនេះកំពុងធ្វើឲ្យព្រៃឈើនៅសេសសល់ក្នុងតំបន់អភិរក្សនៃស្រុកវាលវែង និងស្រុកភ្នំក្រវាញ កំពុងប្រឈមនឹងសេចក្ដីវិនាសចៀសមិនផុតឡើយ។ ចំណែកលោក សាយ សំអាល់ រដ្ឋមន្ត្រីក្រសួងបរិស្ថាន ក៏កំពុងរក្សាភាពស្ងៀមស្ងាត់ ទុកឲ្យមេឈ្មួញ តាំង អៀង បំផ្លាញព្រៃឈើក្នុងខេត្តពោធិសាត់ យ៉ាងមហន្តរាយ៕
គេហទំព័រយើង ពុំអាចសុំការបភ្លឺពីឧកញ៉ា តាំង អៀង បានទេ ព្រោះពុំមានលេខទូរសព្ទ័ តែស្វាគមន៏រាល់ការបំភ្លឺទាំងអស់៕
