ខេត្តមណ្ឌលគិរី ៖ តាមប្រភពពត័មានបានឲ្យដឹងថា ក្បួនរថយន្តសាំយ៉ុងដឹកឈើហុបជ្រុង ចេញពីតំបន់ស្រែឈូក ឡើងលើផ្លូវជាតិលេខ៧៦ ចំណុចកែងក្រុមហ៊ុនប៊ិញហ្វឿក កែង១០៧ ឆ្ពោះទៅច្រកវ៉ាលឺ ឬច្រកត្រពាំងស្រែ ស្រុកស្នួល ទម្លាក់ឲ្យឧកញ៉ារកស៊ីឈើដុះស្លែម្នាក់ ក្នុងមួយយប់ៗជាច្រើនគ្រឿង ។ ចំណែកនៅខាងស្រែថ្មី និងស្រែអណ្តោល ក៏មានក្បួនរថយន្តដឹកឈើលក់ឲ្យឧកញ៉ាមេឈ្មួញដុះស្លែនេះផងដែរ សម្រាប់ដឹកចេញទៅលក់បន្តនៅស្រុកយួន ។
មួយវិញទៀត មន្ត្រីដែនជម្រកការពារសត្វព្រៃកែវសីមា ខេត្តមណ្ឌលគីរី រងការមន្ទិលសង្ស័យថា កំពុងបានទទួលផលពីបទល្មើសព្រៃឈើ ដោយសារតែបើកភ្លើងខៀវឲ្យមានការកាប់ និងដឹកជញ្ជូនឈើចេញពីដែនគ្រប់គ្រងរបស់ខ្លួន តាមម៉ូតូរាប់សិបគ្រឿងក្នុងមួយថ្ងៃៗដូចកណ្តៀរពូន ។
ដែនជម្រកការពារសត្វព្រៃកែវសីមា មានវិសាលភាពព្រៃឈើជាង៣០ម៉ឺនហិកតា មានស្រុកកែវសីមា ស្រុកអូររាំង ក្រុងសែនមនោរម្យ ខេត្តមណ្ឌលគិរី នឹងមួយផ្នែកជាប់ជាមួយស្រុកស្នួល ខេត្តក្រចេះ ។ បច្ចុប្បន្នដែនជម្រកការពារសត្វព្រៃកែវសីមា ស្ថិតក្រោមការគ្រប់គ្រងរបស់លោក ព្រំ វណ្ណា ជានាយកដែនជម្រកដែលទទួលរងការរិះគន់ពីការទទួលលាភសក្ការៈធំធេងដែរ ទើបបទល្មើសកាប់និងដឹកជញ្ជូនឈើកើតមានពេញបន្ទុកក្នុងតំបន់ខាងលើ តែនាយកដែនជម្រកបែរជាសម្ងំស្ងៀមដូចចោរលួចសេះទៅវិញ។
បើតាមសេចក្តីរាយការណ៍ កាលពីថ្ងៃទី២៥ ខែវិច្ឆិកា ក្បួនម៉ូតូកែច្នៃដឹកឈើចេញពីតំបន់ម្រេចដូង រ៉ាង ដែលជាតំបន់ស្ថិតក្នុងការគ្រប់គ្រងរបស់ស្នាក់ការពូគង់របស់ដែនជម្រកការពារសត្វព្រៃកែវសីមា ។ ឈើទាំងអស់ត្រូវគេកាត់រំលំនៅចំណុចដីដែលគេមានផែនការទន្ទ្រានយកដី ហើយមានម៉ូតូចូលទៅដឹកមិនតិចជាង៣០គ្រឿងទេដោយបានបង់ប្រាក់ឲ្យមន្ត្រីនៅស្នាក់ការពូគង់ និងប៉េអឹមដោយមិនមានមន្ត្រីស្នាក់ការណាមួយចុះទៅធ្វើការបង្រ្កាបឡើយ ទន្ទឹមនិងនោះក្រុមមន្ត្រីទាំងនោះក៏បានបើកភ្លើងខៀវឲ្យដាក់ម៉ាស៊ីនអារជាច្រើនគ្រឿង នៅចំណុចខាងលើនៅត្រពាំងញាប់ ត្រពាំងខ្លុង និងស្រែអំពុយសម្រាប់កាត់ច្រៀកឈើ ។
ប្រភពក្រៅផ្លូវការបានបង្ហើបថា មន្ត្រីយោធាមានឋានៈជាមេបញ្ជាការរងកងអនុសេនាធំលេខ៣ ចំណុះឲ្យវរៈកាពារព្រំដែនគោកលេខ២០៤ ខេត្តក្រចេះ ឈ្មោះតូង ជាអ្នកញុះញង់ឲ្យមានការកាប់បំផ្លាញព្រៃឈើនៅចំណុចទឹកដីឃុំស្រែឈូក ស្រុកកែវសីមា ខេត្តមណ្ឌលគិរីក្នុងរយៈពេលប៉ុន្មានសប្តាហ៍កន្លងទៅនេះ និងដឹកជញ្ជូនឈើលក់ឲ្យឧកញ៉ាម្នាក់នៅស្នួល។
គេហទំព័រពុំអាចសុំការបំភ្លឺពីមន្ត្រីយោធាឈ្មោះតូងបានទេព្រោះពុំមានលេខទូរសព្ទ័៕
