ខេត្តពោធិ៍សាត់ ៖ តាមប្រភពពត័មានច្បាស់ការណ៏ពីប្រជាពលរដ្ឋបានអោយដឹងថា បច្ចុប្បន្ននេះមានក្រុមឈ្មួញរកស៊ីឈើខុសច្បាប់ជាច្រើននាក់ បានសម្រុកចូលកាប់ឈើមិនទាន់គ្រប់អាយុដែលហៅថាឈើព្រហ្មចារីយ៏ មានទំហំចាប់ពីចុងមួយតឹកទៅបីតឹកយ៉ាងអាណាធិបតេយ្យ ក្នុងនោះគេស្គាល់ឈ្មួញរកស៊ីឈើខុសច្បាប់មានឈ្មោះចែមុំ ចែស្រី ចែអូន ចែផល្លី ចែឡាង លោករិន ធារ៉ា និងមានឈ្មួញជាច្រើនទៀត តែឈ្មួញល្បីឈ្មោះខាងបំផ្លាញព្រៃឈើខ្លាំងជាងគេប្រចាំនៅតំបន់នោះមានឈ្មោះចែហួង ។
ប្ភពពត័មានបានបញ្ជាក់បន្ថែមទៀតថា ទីតាំងដែលឈ្មួញទាំងអស់នេះប្រមូលឈើមិនគ្រប់អាយុយកមកស្តុកទុកនៅចំណុចស្ទឹងថ្មី តាំងយ៉ ទួលគ្រួស ភ្នំចិនយំ អូរដេកា ឡក់តក់ ពងពុង រវៀង អូរលាក់មាស ចំណែកមន្ត្រីបរិស្ថាននិងមន្ត្រីជំនាញបែជាសម្ងំអេះក្បាលធ្វើពុតជាមិនដឹងមិនរវល់បង្រ្កាប ទុកឲ្យពួកឈ្មួញទាំងនោះបំផ្លាញព្រៃឈើយ៉ាងគឃ្លើន។
ពត័មានខាងលើឲ្យដឹងទៀតថា តំបន់ទីតាំងបទល្មើសទាំងនេះ ស្ថិតនៅក្រោមការគ្រប់គ្រងរបស់មន្ត្រីបរិស្ថានឈ្មោះ ប្រាក់ អ៊ីឡេង ជាប្រធានក្រុមនិងជាប្រធានស្នាក់ការ ដែលប្រជាពលរដ្ឋសង្សយ៏ថាក្រុមឈ្មួញនិងមន្ត្រីបរិស្ថានដែលមានលោក ប្រាក់ អ៊ីឡេង ប្រធានស្នាក់ការ គឺជាបក្សពួកតែមួយចូលរួមសហការបំផ្លាញធនជានធម្មជាតិនៅតំបន់នោះយ៉ាងរង្គាល ដើម្បីចែកប្រយោជន៍គ្នាធ្វើមានធ្វើបាន ដោយមិនខ្លាចច្បាប់ និងមិនបានគិតពីការវិនាសហិនហោចព្រៃឈើក្នុងដែនជម្រកសត្វព្រៃ និងដែនអភិរក្សព្រៃឈើនោះឡើយ។
ទន្ទឹមនិងតម្លៃទីផ្សារកូនឈើឡើងថ្លៃ ក្រុមឈ្មួញបាននិងកំពុងចូលមកសម្រុកដឹកឈើចេញតាមរថយន្ដរាប់សឹបគ្រឿងក្នុងមួយថ្ងៃ ហើយតាមប្រភពធ្លាយចេញពីមន្ត្រីបរិស្ថានតូចតាចក្នុងខេត្តពោធ៌សាត់បានបង្ហើបឱ្យដឹងបន្ថែមទៀតថា លោក ប៉ាន់ មរកត ប្រធានមន្ទីរបរិស្ថានខេត្ត បានបើកភ្លើងខៀវអោយលោក ប្រាក់ អ៊ីឡេង ដែលជាក្លើម្រាក់និងគ្នា អោយទៅគ្រប់គ្រងតំបន់ខាងលើនោះ ដែលជាតំបន់ខ្លាញ់ត្រូវប៉ាន់និងទទួលបានផលប្រយោជន៍និងលាភសក្ការៈពីការឃុបឃិតបំផ្លាញព្រៃឈើយកមកចែកគ្នាយ៉ាងសប្បាយចិត្ត។
ព្រៃឈើក្នុងដែនជម្រកសត្វព្រៃឱរ៉ាល់ ជួរភ្នំក្រវ៉ាញ និងតំបន់អភិរក្សសាមកុកត្រូវបានកាប់បំផ្លាញរបៀបអាណាធិបតេយ្យ ហើយបទល្មើសព្រៃឈើគ្រប់ទម្រង់នៅតែបន្តផ្ទុះកើតមានក្នុងស្រុកក្រវ៉ាញ និងស្រុកវាលវែង ចំណែកលោក ឡាយ ពិសិដ្ឋ ប្រធានមន្ទីរកសិកម្ម និងលោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់ ក្នុងនាមជាមន្ត្រីជំនាញបែជាបណ្តោយអោយមានបទល្មើសព្រៃឈើកើតឡើងយ៉ាងគគ្រឹកគគ្រេង ផ្គើននិងបទបញ្ជារបស់សម្តេចតេជោនាយករដ្ឋមន្ត្រីទៅវិញ។
ប្រជាពលរដ្ឋសំណូមពរទៅឯកឧត្តម ម៉ៅ ធនិន អភិបាលខេត្តពោធិ៍សាត់ ជាពិសេសឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន គួរចាត់វិធានការណ៏បង្រ្កាបនិងទប់ស្កាត់ការបំផ្លាញព្រៃឈើមិនទាន់គ្រប់អាយុនៅតំបន់ខាងលើ ជាបន្ទាន់ ប្រមទាំងត្រូវវះកាត់ជៀរសាច់ស្អុយចេញហើយ កុំជឿតែទៅលើរបាយការណ៏ភូតកុហករបស់មន្ត្រីខិលខូចថ្នាក់ក្រោមមួយក្តាប់តូចដែល ឃុបឃឹតជាមួយឈ្មួញកាប់បំផ្លាញព្រៃឈើគ្មានញញើតដៃនោះឡើយ។
ពាក់ព័ន្ធករណីខាងលើនេះ គេហទំពរ័យើងមិនអាចសុំការបំភ្លឺពីអង្គភាពពាក់ព័ន្ធខាងលើបានទេ តែនិងព្យាយាមសុំការពន្យល់នៅពេលក្រោយ៕
