ខេត្តពោធិសាត់ ៖ សេចក្តីរាយការណ៍ពីប្រជាពលរដ្ឋក្នុងស្រុកវាលវែង ខេត្តពោធិ៍សាត់ បានឲ្យដឹងថាបច្ចុប្បន្ន សកម្មភាពបទល្មើសកាប់ឈើប្រណិត ប្រភេទឈើធ្នង់ និងដឹកជញ្ជូនឈើចេញពីខេត្តពោធិ៍ សាត់បានកើតឡើងយ៉ាងគំហុក ឯមន្ត្រីជំនាញរដ្ឋបាលព្រៃឈើ មន្ត្រីបរិស្ថាននិងសមត្ថកិច្ចពាក់ ព័ន្ធគ្រប់លំដាប់ថ្នាក់សម្ងំស្ងៀមមិនចាត់វិធានការបង្ក្រាបតាមតួនាទីនិងភារកិច្ចរបស់ខ្លួនឡើយ។
ប្រភពខាងលើបានអោយឲ្យដឹងទៀតថា មន្ត្រីនគរបាលខេត្តពោធិ៍សាត់មួយរូបឈ្មោះ ឆាង ម៉ៅ ដែលគេដឹងថាគឺជាឈ្មួញកាប់ឈើនិងដឹកជញ្ជូនឈើប្រណិតខុសច្បាប់ដុះស្លែជាយូរមកហើយ ដែលរកស៊ីកាប់និងដឹកជញ្ជូនឈើប្រណិតយ៉ាងអាណាធិបតេយ្យ ហើយមេឈ្មួញរូបនេះមានការត្រូវរ៉ូវគ្នាជាមួយមន្ត្រីជំនាញនិងសមត្ថកិច្ចពាក់ព័ន្ធបានយ៉ាងល្អ ទើបដំណើរការសម្របសម្រួលក្នុងមុខជំនួញឈើប្រណិតនេះបានដោយគឃ្លើនគ្មានឃើញមានការបង្រ្កាបនោះឡើយ។
ប្រភពបានអោយដឹងថាមេឈ្មួញឈើ ឆាង ម៉ៅ បានពង្រីកជំនួញរកស៊ីឈើប្រណិតខុសច្បាប់ ចាប់ពីចំណុចឃុំឈើតុំ ស្រុកក្រគរ ស្រុកក្រវាញ រហូតដល់ស្រុកវាលវែង នៃខេត្តពោធិសាត់។ នៅតំបន់ខាងលើនេះឈ្មួញឈើឈ្មោះឆាង ម៉ៅ បានទិញម៉ៅការឈើប្រណិតផ្ដាច់មុខម្នាក់ឯងជ្រកក្រោមលេសក្រុមហ៊ុន(MDS) សូម្បីតែប្រជាពលរដ្ឋរកស៊ីតូចតាចដឹកតាមម៉ូតូក៍មិនអាចចូលតំបន់នោះបានដែរ។
ប្រភពព័ត៌ខាងលើបានបញ្ជាក់បន្ថែមទៀតថា មន្ត្រីនគរបាលឈ្មោះ ឆាង ម៉ៅបានដាក់កូនចៅនិងគូកនបក្សពួកឈរទិញឈើស្តុបទុក ដើម្បីឡើងរថយន្តខ្នាតធំដឹកយកទៅលក់អោយឃ្លាំងឈើដែលមានទីតាំងនៅក្នុងរាជធានីភ្នំពេញ ត្រូវបានគេស្គាល់ថៅកែឃ្លាំងឈ្មោះ វណ្ណ ជាមន្ត្រីកងរាជអាវុធហត្ថ ឈ្មោះស្មី ឈ្មោះគ័ង និងឈ្មោះទី ទិញយកឈើទាំងអស់ពីមេឈ្មួញឈើ ឆាង ម៉ៅ ស្តុបក្នុងឃ្លាំងទុកលក់បន្តអោយក្រុមហ៊ុនចិន។
ប្រភពបានបន្តអោយដឹងទៀតថាអ្នកដែលឈរទិញឈើអោយមេឈ្មួញឈើ ឆាង ម៉ៅ មានឈ្មោះ ខ្លឹង និងគូកនមួយចំនួនទៀត កំពុងឈរទិញនៅតំបន់ពងពុង អូរលាក់មាស អូរបាក់ទូក និងចំណុចរវៀង ក្នុងឃុំប្រមោយ ស្រុកវាលវែង ខេត្តពោធិសាត់ និងឈ្មោះផាន់នី ឈរទិញនៅចំណុចមុល ក្នុងឃុំសន្រ្ទែ ឈ្មោះ ណុប ឌី ឈរជើងប្រមូលទិញនៅភីមិក្សេត្របូរី ឈ្មោះចែភក្តិ ឈរជើងទិញនៅចំណុចស្ទឹងទី៥ខ្សាច់ពូក ក្នុងភូមិសាស្ត្រស្រុកភ្នំក្រវ៉ាញ ។
សូមរំលឹកថាតាមប្រភពមួយផ្សេងទៀតបានបង្ហើបអោយដឹងថា មេឈ្មួញឈើឈ្មោះ ឆាង ម៉ៅ និងជាមន្ត្រីនគរបាលផងនោះ ត្រូវបានតុលាការចេញដីកាកោះហៅពាក់ព័ន្ធនិងករណីជំនួញឈើរបស់ខ្លួនក្នុងខេត្តពោធិ៍ សាត់នាពេលកន្លងមកផងដែរ។ តែមកដល់បច្ចុប្បន្ននេះឈ្មួញឈើរូបនេះនៅតែផ្គើននិងច្បាប់បានបន្តធ្វើសកម្ម ភាពពាក់ព័ន្ធនិងជំនួញព្រៃឈើក្នុងខេត្តពោធិ៍សាត់ដដែល ចំណែកប្រជាពលរដ្ឋកំពុងរង់ចាំមើល តើច្បាប់និងអាចបង្រ្កាបជំនួញឈើខុសច្បាប់របស់ ឆាង ម៉ៅ បានដែរឫទេ?។
ប្រជាពលរដ្ឋសំណូមពរដល់ថ្នាក់លើ មន្ត្រីជំនាញ ជាពិសេសអាជ្ញាធរខេត្តពោធិ៍សាត់ គួរធ្វើការតាមដាន និងបង្ក្រាបអោយមានប្រសិទ្ធិភាព ដើម្បីចូលរូមចំណែកថែរក្សាព្រៃឈើអោយបានគងវង្ស ។
ពាក់ព័ន្ធនិងករណីខាងលើនេះ អង្គភាពយើង មិនអាចសុំការបំភ្លឺពីលោក ឆាង ម៉ៅ បាននៅឡើយទេ ដោយគ្មានលេខទូរស័ព្ទសម្រាប់ទំនាក់ទំនង ៕
