ខេត្តក្រចេះ ត្បូងឃ្មុំ ៖ នៅវេលាម៉ោង១១និង១០នាទីយប់ ថ្ងៃទី២៣ ខែមិថុនា ឆ្នាំ២០២០ គេឃើញសមត្ថកិច្ចចម្រុះតាមគោលដៅលើកំណាត់ផ្លូវជាតិលេខ៧ ក្នុងទឹកដីស្រុកស្នួលនៃខេត្តក្រចេះ និងស្រុកមេមត់នៃខេត្តត្បូងឃ្មុំ ចតរថយន្តតាមគោលដៅដើម្បីទប់ស្កាត់បទល្មើសព្រៃឈើ និងធនធានធម្មជាតិយ៉ាងតឹងរឹង។ ប៉ុន្តែផ្ទុយទៅវិញគេបានសង្កេតឃើញថា បទល្មើសដឹកជញ្ជូនឈើដើម្បីធ្វើសិប្បកម្មកែច្នៃទ្វារបង្អួច ផ្ទុកក្នុងរថយន្តសាំងយ៉ុងចំនួន៤គ្រឿងដឹកយ៉ាងរលូន ដោយគ្មានការបង្ក្រាប ទាល់តែសោះ។
តាមប្រភពព័ត៌មានបានឲ្យដឹងថា ក្រុមឈ្មួញដែលដឹកជញ្ជូនបទល្មើសចេញពីខេត្តក្រចេះឆ្លងកាត់ស្រុកស្នួលនឹង ស្រុកមេមត់ឆ្ពោះទៅលក់នៅចំណុចភូមិច្រករំដេង នឹងភូមិក្បាលដំរី ក្នុងស្រុកពញាក្រែកនៃខេត្តត្បូងឃ្មុំនេះ ត្រូវបានគេស្គាល់ថា ជាក្រុមឈ្មួញដែលរស់នៅចំណុចស្ពានជ្រាវ ស្ថិតនៅក្នុងឃុំទន្លូង ស្រុកមេមត់ ខេត្តត្បូងឃ្មុំ ។
ប្រភពបន្ថែមថាការដឹកជញ្ជូនបទល្មើសឈើនេះ មិនមែនមានតែរថយន្ត៤គ្រឿង ខាងលើនេះទេ គឺមានរថយន្តជាច្រើនគ្រឿងទៀត ពួកគេបានសហការគ្នាដឹកជញ្ជូនផលអនុផលព្រៃឈើមកផ្គត់ផ្គង់ឲ្យ រោងសិប្បកម្មអត់ច្បាប់នៅភូមិច្រករំដង និងភូមិក្បាលដំរីនេះ ។
សូមបញ្ជាក់ផងដែរថា សិប្បកម្មនៅក្មុងភូមិច្រករំដេង នឹងភូមិក្បាលដំរី ក្នុងស្រុកពញាក្រែកនេះ មានប្រមាណជា៣៥ ទៅ៤៥ កន្លែងសុទ្ធតែគ្មានច្បាប់អនុញ្ញាតទាំងអស់ ដោយគ្មានសមត្ថកិច្ចណាហ៊ានប៉ះពាល់នឹងធ្វើការបង្ក្រាបឡើយ។ហើយមកដល់ពេលនេះគេបានកត់សម្គាល់ឃើញថាបទល្មើសដឹកជញ្ជួនឈើ ក្នុងទឹកដីខេត្តក្រចេះនិងខេត្តត្បូងឃ្មុំបាននិងកំពុងតែកើតមានយ៉ាងគគ្រឹកគគ្រេងវិញហើយ៕
