ភ្នំពេញ ៖ សមត្ថកិច្ចក្រសួងមហាផ្ទៃ នៅព្រឹកថ្ងៃទី១០ ខែមិថុនា ឆ្នាំ២០២០ នេះ បានបញ្ជូនលោកវរសេនីយ៍ត្រី ឈុន សុមេធា នាយការិយាល័យប្រឆាំងបទល្មើសគ្រឿងញៀននៃកងរាជអាវុធហត្ថខេត្តតាកែវ និង បក្ខពួកម្នាក់មកសាលាដំបូងរាជធានីភ្នំពេញ ដើម្បីសាកសួរបទល្មើសជួញដូរគ្រឿងញៀនជាង២គីឡូក្រាម ។
លោក ឈុន សុមេធា និង បក្ខពួក ត្រូវបានសមត្ថកិច្ច ចាប់ខ្លួនកាលពីថ្ងៃទី៤ ខែមិថុនា ឆ្នាំ២០២០ នៅចំណុចច្រមុះជ្រូកស្ទឹងមានជ័យ ខណ្ឌមានជ័យ រួចបន្តចុះឆែកឆេរផ្ទះ នៅចំណុចភូមិកំពង់ហ្លួង ឃុំអង្គរបូរី ស្រុកអង្គរបូរី ខេត្តតាកែវ ដោយរកឃើញវត្ថុតាងមួយចំនួនក្នុងនោះរួមមានគ្រឿងញៀនជិត២គីឡូក្រាម អាវុធខ្លីចំនួន២ដើម(ប្រើហ្គាស)និងជញ្ជីងថ្លឹងថ្នាំញៀនចំនួន១គ្រឿង និងរុក្ខជាតិញៀន(កញ្ឆា)ក្រៀមចំនួន២ស្បោងម៉ាស៊ីនកាមេរ៉ាសុវត្ថិភាពចំនួន១គ្រឿង ស្លាកលេខម៉ូតូចំនួន០៣គ្រឿង និងកាតគ្រីម៉ូតូចំនួន២សន្លឹក ៕
