ខេត្តបន្ទាយមានជ័យ ៖ អាជ្ញាធរនិងសមត្ថកិច្ចទូទាំងខេត្តបន្ទាយមានជ័យបាននឹងកំពុងបន្តស្រាវជ្រាវ និងរឹបអូសយកស្រាថ្នាំដែលបង្កឲ្យពុលស្លាប់និងប៉ះពាល់សុខភាពពលរដ្ឋនៅស្រុកម៉ាឡៃ និងក្រុងប៉ោយប៉ែត កាលពីព្រឹកទល់យប់ថ្ងៃទី៩ ខែមិថុនា ឆ្នាំ២០២០ ។
ចំណែកជំនាញសុខាភិបាលក៏បានប្រមូល បញ្ជូនសំណាកវិភាគទៅកាន់មន្ទីរពិសោធន៍ដើម្បីរកអោយឃើញថា សារធាតុអ្វីដែលបង្កពុលនោះ ។ នេះបើតាមលោក អ៊ុំ រាត្រី អភិបាលខេត្តបន្ទាយមានជ័យថ្លែងក្នុងពីធីសាធារណៈមួយនៅភូមិខ្លាងាប់ ឃុំទួលពង្រ ស្រុកម៉ាឡៃកាលពីថ្ងៃទី១០ ខែមិថុនា ឆ្នាំ២០២០ ។
លោកវរសេនីយ៍ បេន សំអាត អធិការនគរបាលស្រុកម៉ាឡៃប្រាប់កាលពីថ្ងៃទី១០ខែមិថុនាថា៖ ករណីពុលស្រាថ្នាំដាក់យីហោថា “សម្រួលសសៃ ក្រពះ “និង” ស្រាថ្នាំចិនសែ តាំងគួយ ” នៅស្រុកម៉ាឡៃបង្កពុលស្លាប់ពលរដ្ឋដែលផឹកចំនួន៣នាក។ជនរងគ្រោះដែលបានស្លាប់នៅស្រុកម៉ាឡៃឈ្មោះ ១- ឈ្មោះ ឆន ឈឿន ហៅ សឿន ភេទប្រុស អាយុ៣២ឆ្នាំ ជាប្រការពារនៅភូមិអូរសំពរ័ ឃុំអូរសំពរ័ ស្រុកម៉ាឡៃខេត្តបន្ទាយមានជ័យ ។២-ឈ្មោះ ឃ្លាំង ចិត្ត្រា ភេទប្រុស អាយុ២៧ឆ្នាំ លំនៅនៅភូមិចំណោមកើត ឃុំចំណោម ស្រុកមង្គលបូរី ដោយបានស្លាបនៅភូមិអូរស្អំ ស្រុកម៉ាឡៃ,។
៣-ឈ្មោះ ម៉ាន នេត ភេទប្រុស អាយុ២៤ឆ្នាំ រស់នៅភូមិភ្នំរូង ឃុំបឹងបេង ស្រុកម៉ាឡៃ ខេត្តបន្ទាយមានជ័យ ។
និងជនរងគ្រោះកំពុងសង្គ្រោះមាន ៤- ឈ្មោះ ថា នៅភូមិអូរស្អំ (ស្រាល),០៥-ឈ្មោះ ជា តួ នៅភូមិចំណោមកើត (ស្រាល),០៦ឈ្មោះ ហាក់ នៅភូមិអូរស្អំ (ស្រាល) ។ទាំង៣នាក់សម្រាកព្យាបាលនៅមន្ទីរពេទ្យបង្អែក ស្រុកម៉ាឡែ ។
លោកបន្តថា ជនរងគ្រោះបានផឹកស្រាថ្នាំដូចខាងលើនោះ ពេលវេលានិងកន្លែងផ្សេងគ្នា ពីព្រឹកទល់យប់ថ្ងៃទី៩ ខែមិថុនា ។ចំណែកលោកវរសេនីយ៍ ស៊ិន ណារ៉ាក់ អធិការនគរបាលស្រុកមង្គលបូរីបានអោយដឹងដែរថា៖ ពលរដ្ឋមានលំនៅភូមិចំណោមកើត ឃុំចំណោម ស្រុកមង្គលបូរី មែន ប៉ុន្តែបានទៅធ្វើការនៅស្រុកម៉ាឡៃនិងក្រុងប៉ោយប៉ែត ហើយបានពុលស្រាថ្នាំស្លាប់ម្នាក់នៅភូមិអូរស្អំ ស្រុកម៉ាឡៃ មានឈ្មោះ ឃ្លាំង ចិត្ត្រា ភេទប្រុស អាយុ២៧ឆ្នាំ ។និងម្នាក់នៅក្រុងប៉ោយប៉ែត ។ក្រៅពី៧នាក់ទៀតបានពុលដែរតែស្រាល មិនស្លាប់ ។
ចំពោះលោកវរសេនីយ៍ ធិន ស៊ិនដេត អធិការនគរបាលក្រុងប៉ោយប៉ែតអោយដឹងដែរថា ៖ កាលពីថ្ងៃទី៩ ខែមិថុនា ឆ្នាំ២០២០ វេលាម៉ោង១១ មានករណីមនុស្សពុលស្រាថ្នាំនៅភូមិបាលិលេយ្យ១សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បណ្តាលអោយស្លាប់ម្នាក់ និងរងគ្រោះចំនួន៥នាក់មាន៖
១ ឈ្មោះអ៊ិន ប៊ុនឆាន ភេទប្រុស អាយុ២៥ ឆ្នាំ ជនជាតិខ្មែរ រស់នៅភូមិអូរអណ្តូង ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ មុខរបរកម្មកសំណង់ នៅប៉ោយប៉ែត (សំរាកព្យាបាលនៅមន្ទីរពេទ្យបង្អែកប៉ោយប៉ែត)
២ ឈ្មោះ ស ចាម អាយុ៤៩ឆ្នាំ ភេទប្រុស ជនជាតិខ្មែរ រស់នៅភូមិអូរអណ្តូង ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ មុខរបរកម្មករសំណង់ (សំរាកព្យាបាលនៅមន្ទីរពេទ្យប៉ោយប៉ែត) ។៣ ឈ្មោះ មាឌ គង់ អាយុ៣៥ឆ្នាំ ភេទប្រុស ជនជាតិខ្មែរ រស់នៅភូមិអូរអណ្តូង ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ មុខរបរកម្មករសំណង់ ពេលដឹកទៅព្យាបាល
នៅមន្ទីរពេទ្យខេត្តមិត្តភាពកម្ពុជា ជប៉ុនមង្គលបូរី (ស្លាប់តាមផ្លូវ) ។
៤ ឈ្មោះ ឡុង អាយុ២៨ឆ្នាំ ភេទប្រុស ជនជាតិខ្មែរ រស់នៅភូមិអូរអណ្តូង ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ មុខរបរកម្មករសំណង់ (សំរាកព្យាបាលនៅមន្ទីរពេទ្យមង្គលបូរី។
៥- ឈ្មោះកន អាយុ២៧ឆ្មាំភេទប្រុស ជនជាតិខ្មែរ រស់នៅភូមិអូរអណ្តូង ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ មុខរបរកម្មករសំណង់(សំរាកព្យាបាលនៅមន្ទីរពេទ្យខេត្តមិត្តភាពកម្ពុជា ជប៉ុនមង្គលបូរី)។
លោក ធិន ស៊ិនដេត បានបន្តថា ៖ តាមការបំភ្លឺបឋមពីជនរងគ្រោះបានអោយដឹងថា នៅថ្ងៃទី៨ មិថុនា ២០២០ ពេលល្ងាចក្រោយពីសម្រាកពីការងារសាងសង់សំណង់ ពួកគាត់មានគ្នាចំនួន៥នាក់ បានទៅទិញស្រាថ្នាំតាំងគួយ ចំនួន១យួរ តំលៃ១២.០០០រៀល យកមកផឹកក្លែមជាមួយសាច់ឆ្កែ ផ្អកត្រីប្រៃ បុកល្ហុងលាយក្តាម។ គឺផឹករហូតអស់ស្រា ។លុះដល់ថ្ងៃទី៩ មិថុនា ២០២០ វេលាម៉ោង១១ថ្ងៃត្រង់មានអាការៈមិនស្រួល ដោយងងុយដេក រកកលក្អួតចង្អោរ ឈឺនោម ឈឺជុះ ហើយដឹងថាពុល ទើបនាំគ្នាទៅពេទ្យរៀងៗខ្លួន។ ក្នុងនោះ ម្នាក់បានស្លាប់តាមផ្លូវ ។ពោលគឺក្រោយធ្វើបច្ចុប្បន្នភាពឃើញថាតុល្យភាពជនរងគ្រោះថ្នាក់ពុលស្រាថ្នាំដូចខាងលើបណ្តាលអោយស្លាប់៤នាក់ ពុលមិនស្លាប់ចំនួន៣នាក់ ។
លោក អ៊ុំ រាត្រី អភិបាលខេត្តនិងជាប្រធានគណៈបញ្ជាការកងឯកភាពខេត្តបន្ទាយមានជ័យប្រាប់បន្ថែមកាលពីរសៀលថ្ងៃទី១០ ខែមិថុនា ថា ៖ ចំពោះមុខគណៈបញ្ជាការឯកភាពស្រុកក្រុង អាជ្ញាធរនិងមន្ត្រីសមត្ថកិច្ច កងកម្លាំង និងជំនាញ បានចុះទៅអប់រំណៃនាំម្ចាស់និងអ្នកលក់ស្រាថ្នាំដាក់យីហោថា “សម្រួលសសៃ ក្រពះ និង ស្រាថ្នាំចិនសែ តាំងគួយ ” កុំអោយលក់ចែកចាយ កុំផឹកបន្តទៀត ហើយត្រូវរឹបអូសពីដេប៉ូមួយនៅក្រុងប៉ោយប៉ែតនិងពីកន្លែងលក់នានា ដើម្បីអោយជំនាញមន្ទីរសុខាភិបាលនិងកាំកុងត្រូលយកសំណាកវិភាគយកទៅមន្ទីរពិសោធន៍ ។ក្នុងនោះ ក៏ឃាត់ខ្លួនម្ចាស់ដេប៉ូ អ្នកលក់មកបំភ្លឺព័ត៌មានសំណុំរឿង ដើម្បីឈានទៅរកម្ចាស់ផលិតផលនិងម្ចាស់អ្នកផលិត ដែលប្រភពព៍ត៌មានអះអាងថា ផលិតនៅរាជធានីភ្នំពេញ ៕
