រាជធានីភ្នំពេញ ៖ កាលពីម្សិលមិញ ត្រូវបានគេរាយការណ៍ថាសមាជិកក្រុមអាវក្រហមថៃមួយក្រុមតូច បានធ្វើការតវ៉ានៅមុខស្ថានទូតកម្ពុជា ប្រចាំនៅទីក្រុងបាងកក ដោយទាមទារឱ្យមានការស៊ើបអង្កេតលើករណី លោក Wanchalearm Satsaksit ដែលជាសកម្មជននយោបាយ ខាងអាវក្រហម ដែលព័ត៌មានមួយបានឲ្យដឹងថា សកម្មជននយោបាយរូបនេះត្រូវបានចាប់ពង្រត់ពីរាជធានីភ្នំពេញ ប្រទេសកម្ពុជា ។
ប៉ុន្តែអគ្គស្នងការដ្ឋាននគរបាលជាតិកម្ពុជា បានថ្លែងប្រាប់សារព័ត៌មានក្នុងស្រុកនៅថ្ងៃនេះ ដោយបានប្រកាសបដិសេធថា ខ្លួនពុំបានចាប់ ឬអនុវត្តច្បាប់ចំពោះសកម្មជនអាវក្រហមថៃ ដែលស្នាក់អាស្រ័យនៅកម្ពុជានោះទេ។ ទន្ទឹមនោះសមត្ថកិច្ចកម្ពុជាក៏កំពុងស្រាវជ្រាវបន្ត ពាក់ព័ន្ធនឹងករណីនេះ ជាពិសេសតម្រុយដែលបង្ហាញក្នុងកាមេរ៉ាសុវត្ថិភាព ពាក់ព័ន្ធនឹងការ បាត់ខ្លួនរបស់បុគ្គលខាងលើផងដែរ ។
លោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាន នគរបាលជាតិ ត្រូវបានសារព័ត៌មានដកស្រង់សំដីយកមកចុះផ្សាយនៅថ្ងៃនេះដោយ លោកបានបញ្ជាក់ថា សមត្ថកិច្ចបដិសេធចំពោះការចាប់ខ្លួន លោក វ៉ាន់ឆាឡឺម ព្រោះសមត្ថកិច្ចកម្ពុជាមិនបានអនុវត្តច្បាប់ចំពោះបុគ្គលរូបនេះទេ។ ដោយឡែក វីដេអូកាមេរ៉ាពាក់ព័ន្ធនឹងបុគ្គលរូបនេះ សមត្ថកិច្ចនឹងធ្វើការស្រាវជ្រាវបន្តទៀត ។
ចំណែកមន្ត្រីជាន់ខ្ពស់ក្រសួងមហាផ្ទៃក៏បានថ្លែងប្រាប់អ្នកសារព័ត៌មានដែរថា សមត្ថកិច្ចកម្ពុជានឹងធ្វើការស៊ើប អង្កេត អំពីព័ត៌មានដែលបានផ្សព្វផ្សាយថា អាជ្ញាធរកម្ពុជាចាប់ខ្លួនលោកវ៉ាន់ឆាឡឹម សាតស័ក្តិសិទ្ធិ សកម្មជននយោបាយអាវក្រហមថៃ។ ការស៊ើបអង្កេតនេះ បានធ្វើឡើងបន្ទាប់ពីបណ្តាញសារព័ត៌មាន មួយចំនួនបាន ផ្សព្វផ្សាយថា អាជ្ញាធរមានសមត្ថកិច្ចកម្ពុជាបានចាប់ខ្លួនលោកវ៉ាន់ឆាឡឹម សាតស័ក្តិ សិទ្ធិ នៅក្នុងរាជធានីភ្នំពេញ កាលពីល្ងាចថ្ងៃទី៤ ខែមិថុនាឆ្នាំ២០២០។ ទន្ទឹមនោះស្ថានទូតថៃ ប្រចាំកម្ពុជា ក៏បានធ្វើកំណត់ទូតដាក់ទៅក្រសួងការបរទេសកម្ពុជាផ្ទៀងផ្ទាត់អំពីព័ត៌មាន ដែលបាន ផ្សព្វផ្សាយថា មានការចាប់ប្រជាជនខ្លួន។
ពាក់ព័ន្ធព័ត៌មានខាងលើនេះលោក កុយ គួង អ្នកនាំពាក្យក្រសួងការបរទេស និង សហប្រតិបត្តិការអន្តរជាតិ ក៏បានបញ្ជាក់ប្រាប់អ្នកសារព័ត៌មានដែរថា ក្រសួងការបរទេសកម្ពុជាក៏បានទទួលកំណត់ទូត ពីស្ថានទូតថៃប្រចាំកម្ពុជាកាលពីថ្ងៃទី៨ ខែមិថុនា ដែលបានសាកសួរអំពីព័ត៌មានចាប់ខ្លួនលោកវ៉ាន់ឆាលើម សាតស័ក្តិសិទ្ធិ ហើយខាងទូត ក៏បានសួរថា ព័ត៌មាន ដែលបានផ្សព្វផ្សាយអំពីការចាប់ខ្លួននោះពិត ឬមិនពិត? ហើយសុំឲ្យខាងអាជ្ញាធរកម្ពុជាផ្ទៀង ផ្ទាត់ព័ត៌មានដែលបានផ្សព្វផ្សាយ ហើយខាងទូតទទួលបានព័តមាន ថា មានជនជាតិថៃត្រូវបានចាប់ខ្លួន។
លោកកុយ គួង បាន បន្តថា ទាក់ទងការតវ៉ានៅមុខស្ថានទូតកម្ពុជាប្រចាំនៅប្រទេសថៃ គឺ ក្រុមអ្នកតវ៉ាបានយកញត្តិទៅដាក់នៅស្ថានទូត ដើម្បីទាមទារឲ្យមានការស៊ើបអង្កេតថា តើអ្នកដែលចាប់ខ្លួននៅទីណា?។ក្រុមអ្នកតវ៉ាបានអះអាងថា ពួកគេដឹងតាមបណ្តាញសារព័ត៌មានផ្សេងៗថាមាន ការចាប់ ខ្លួនលោកវ៉ាន់ឆាលើម សាតស័ក្តិសិទ្ធិ។
គួរបញ្ជាក់ថា អង្គការ HUMAN RIGHTS WATCH បានចេញថ្លែងការណ៍កាលពីថ្ងៃទី៥ខែមិថុនា ឆ្នាំ២០២០ ថា លោកវ៉ាន់ឆាលើម សាតស័ក្តិសិទ្ធិ ត្រូវបានចាប់ខ្លួនកាលពីល្ងាចថ្ងៃទី៤ខែមិថុនាឆ្នាំ២០២០នៅពេលដែលលោកកំពុងដើរលើដងផ្លូវទៅទិញម្ហូបអាហារនៅជិតកន្លែងស្នាក់នៅរបស់លោក។ យោងតាមសាក្សីបាននិយាយថា លោកវ៉ាន់ឆាលើម សាតស័ក្តិសិទ្ធិ ត្រូវចាប់បញ្ចូលទៅក្នុងរថយន្តពណ៌ខ្មៅមួយគ្រឿង ហើយរថយន្តនោះបានបើកចេញទៅបាត់។
សូមជម្រាបថា លោកវ៉ាន់ឆាឡឹម សាតស័ក្តិសិទ្ធិ អាយុ៣៧ឆ្នាំ គឺជាសកម្មជនម្នាក់ និងមានទំនាក់ទំនងជាមួយក្រុមអាវក្រហម បានភៀសខ្លួនមកកម្ពុជានៅក្រោយរដ្ឋប្រហារយោធា នៅក្នុងប្រទេសថៃ កាលពីខែឧសភា ឆ្នាំ២០១៤ ខណដែលអាជ្ញាធរថៃក៏បានចេញដីកាតាមចាប់ខ្លួនសកម្មជនរូបនោះកាលពីខែមិថុនាឆ្នាំ២០១៨កន្លងទៅផងដែរ ៕
