ខេត្តព្រះសីហនុ ៖ កម្លាំងនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ សហការជាមួយកម្លាំងជំនាញនៃស្នងការដ្ឋាននគរបាលខេត្តព្រះសីហនុ និងកម្លាំងជំនាញស្នងការដ្ឋាននគរបាលខេត្តកំពង់ស្ពឺ រួមនិងមានការដឹកនាំសម្របសម្រួលពីលោកព្រះរាជអាជ្ញានៃអយ្យការ អមសាលាដំបូងខេត្តព្រះសីហនុ បានស្ទាក់ចាប់ជនសង្សយ័ពាក់ពន្ធ័បទល្មើសបង្ខាំងមនុស្ស ធ្វើទារុណកម្មជំរឹតទារប្រាក់ បានចំនួន០៤នាក់ រយះពេល២ថ្ងៃជាប់ៗគ្នា គឺយប់ថ្ងៃទី៧និងរសៀលថ្ងៃទី៨ ខែមិថុនា ឆ្នាំ២០២០នេះ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុឲ្យដឹងថា ករណីចាប់បង្ខាំងមនុស្សធ្វើទារុណកម្មជំរិតទារប្រាក់យ៉ាងឃោរឃៅ បង្កដោយជនជាតិចិន និងជនជាតិចិន កើតមានតាំងពីថ្ងៃទី០៥ ខែមិថុនា ឆ្នាំ២០២០ វេលាម៉ោង១១ថ្ងៃត្រង់ រហូតដល់ថ្ងៃទី ០៨ ខែមិថុនា ឆ្នាំ២០២០ វេលាម៉ោង២រសៀល ទើបឈានដល់ការបង្ក្រាបបានទាំងស្រុង និងចាប់ខ្លួនជនសង្ស័យសរុបចំនួន០៤នាក់ ហើយបានរំដោះជនរងគ្រោះរួចផុតពីគ្រោះថ្នាក់ផងដែរ។
លោកស្នងការបន្តថា ការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តព្រះសីហនុ បានទទួលបណ្តឹងពីឈ្មោះ Tang XinJue ភេទប្រុស អាយុ៤១ឆ្នាំ ជនជាតិចិនថា នៅថ្ងៃទី០៥ ខែមិថុនា ឆ្នាំ២០២០ វេលាម៉ោងប្រហែល០៤ និង១០នាទីទៀបភ្លឺ ថាមិត្តភក្តិរបស់គាត់ (ជនរងគ្រោះ) ឈ្មោះ Wang WenXing ភេទប្រុស ត្រូវបានក្រុមជនជាតិចិនមួយក្រុមចាប់យកទៅបង្ខាំងទុកនៅទីកន្លែងមួយ បន្ទាប់មកក្រុមជនសង្ស័យបានប្រើគណនីវីឆាតរបស់ជនរងគ្រោះឈ្មោះ Wang WenXing មកប្រពន្ធជនរងគ្រោះ (នៅប្រទេសចិន) ជំរិតទារប្រាក់ចំនួន ៥០០,០០០Yuan (ហាសិបម៉ឺនយ័ន្ត) ជាការដោះដូរជាមួយជនរងគ្រោះ បើមិនព្រមវេរលុយអោយទេ ពួកវានឹងសម្លាប់ចោល ។
សមត្ថកិច្ចបានបើកការស៊ើបអង្កេត រហូតឈានដល់ការចាប់ជនសង្ស័យបានចំនួន០២នាក់ដែលជាជនជាតិចិន នៅតាមបណ្តោយផ្លូវជាតិ លេខ៤ ទីរួមខេត្តកំពង់ស្ពឺនៅ វេលាម៉ោង ២២ និង ៣០នាទី យប់ថ្ងៃទី០៧ ខែមិថុនា ឆ្នាំ២០២០ ខណះជនសង្ស័យកំពុងជិះរថយន្ត១គ្រឿងម៉ាក HighLander ពណ៌ទឹកប្រាក់ ស្លាកលេខ ភ្នំពេញ 2AN-4020 ហើយបានដកហូតយកវត្ថុតាងទូរស័ព្ទចំនួន ៣គ្រឿង ក្នុងនោះមានទូរស័ព្ទ១គ្រឿង ជារបស់ជនរងគ្រោះ និងស៊ីមកាតចំនួន២ (មធ្យោបាយជំរិតទារប្រាក់) ។
សមត្ថកិច្ចជំនាញនគរបាលខេត្ត និង កម្លាំងអន្តរាគមន៌ពិសេស បន្តក៏បានស្រាវជ្រាវរំដោះជនរងគ្រោះទាំងយប់ ក្នុងស្ថានភាពដៃទាំងសងខាងមានជាប់ខ្សែស៊ីល និងមានខ្សែចង ក ជាប់ខ្លួន នៅចំណុចពយថ្មយក្ស (ក្នុងព្រៃជាប់មាត់សមុទ្រ) ឃ្លាតពីផ្លូវសម្តេចសង្ឃ ២គីឡូម៉ែត្រ ស្ថិតនៅភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ។
ប៉ុន្តែជនសង្ស័យចំនួន០២នាក់ដែលនៅយាមជនរងគ្រោះ បានដឹងខ្លួនមុន ក៏រត់គេចខ្លួនចូលក្នុងព្រៃជ្រៅ ស្របពេលមេឃកំពុងភ្លៀងខ្លាំង តែកម្លាំងសមត្ថកិច្ច នៅតែបន្តរុករកយ៉ាងសកម្ម រហូតដល់រសៀល ថ្ងៃទី ០៨ ខែមិថុនា ឆ្នាំ២០២០ ទើបសមត្ថកិច្ចចាប់ខ្លួនបានជនសង្ស័យចំនួន០២នាក់បន្ថែមទៀតដែលកំពុងសម្ងំលាក់ខ្លួនក្នុងព្រៃ នៅចំណុចពយថ្មយក្ស ។
សូមជម្រាបថា ជនរងគ្រោះឈ្មោះ Wang WenXing ភេទប្រុស អាយុ៣៩ឆ្នាំ ជនជាតិចិន មានស្រុកកំណើតខេត្តហ៊ូណាន ប្រទេសចិន មុខរបររកស៊ី ស្នាក់នៅភូមិ ១ សង្កាត់២ ក្រុង-ខេត្តព្រះសីហនុ ។
ជនគ្រោះរងរបួសស្នាម ត្រង់ភ្នែក , ដៃ , ជើង និងពេញខ្លួនប្រាណធ្ងន់ធ្ងរ ដោយអំពើធ្វើទារុណកម្ម។
ចំណែកជនសង្ស័យចំនួន ៤នាក់មានឈ្មោះដូចខាងក្រោម ៖
១.ឈ្មោះ Wei ShunCheng ភេទប្រុស អាយុ២៧ឆ្នាំ ជនជាតិចិន មានស្រុកកំណើតខេត្តសានស៊ី ប្រទេសចិន មុខរបរ មិនពិតប្រាកដ ស្នាក់នៅមិនពិតប្រាកដ ។
២.ឈ្មោះ Teng JiaLiang ភេទប្រុស អាយុ២៩ឆ្នាំ ជនជាតិចិន មានស្រុកកំណើតខេត្តGuang Xi ប្រទេសចិន មុខរបរ មិនពិតប្រាកដ ស្នាក់នៅមិនពិតប្រាកដ។
៣.ឈ្មោះ Song XiaLing ភេទប្រុស អាយុ៣៤ឆ្នាំ ជនជាតិចិន មានស្រុកកំណើតខេត្តអានហ៊ួយ ប្រទេសចិន មុខរបរ មិនពិតប្រាកដ ស្នាក់នៅមិនពិតប្រាកដ ។
៤.ឈ្មោះ Zhang YiBo ភេទប្រុស អាយុ២៦ឆ្នាំ ជនជាតិចិន មានស្រុកកំណើតខេត្តហ៊ឺណាន ប្រទេសចិន មុខរបរ មិនពិតប្រាកដ ស្នាក់នៅមិនពិតប្រាកដ ។
វត្ថុតាងចាប់យកបាន៖
-ទូរស័ព្ទចំនួន ៣គ្រឿង (១គ្រឿងម៉ាកHuaWei ពណ៌ខៀវ របស់ជនរងគ្រោះ , ១គ្រឿងម៉ាកi-Phone ពណ៌ទឹកមាស , និង១គ្រឿងទៀតម៉ាក HuaWei ពណ៌ខៀវ)
-ស៊ីមកាតចំនួន ២ (មធ្យោបាយជំរិតទារប្រាក់)
-ខ្សែស៊ីល ២ខ្សែ (ចងដៃជនរងគ្រោះ)
-ខ្សែពួរ ១ (ចងកភ្ជាប់ជាមួយជើងជនរងគ្រោះ)
-ស្កុត (រុំដៃជនរងគ្រោះ)
-រថយន្ត១គ្រឿងម៉ាក HighLander ពណ៌ទឹកប្រាក់ ស្លាកលេខៈ ភ្នំពេញ 2AN-4020 (មធ្យោបាយចាប់ជនរងគ្រោះ) ។
ករណីនេះកម្លាំងជំនាញនៃស្នងការដ្ឋាននគរបាលខេត្តព្រះសីហនុ កំពុងបន្តនិវិធី បញ្ជូនជនសង្ស័យ និងវត្ថុតាង ទៅសាលាដំបូងខេត្តព្រះសីហនុ ៕