អន្តរជាតិ ៖ ប្រទេសចិន បានប្រកាសថា ខ្លួនបានទទួលជោគជ័យទាំងស្រុងក្នុងការធ្វើតេស្តលើ វ៉ាក់សាំង COVID-19។ នេះបើតាមទីភ្នាក់ងារសារព័ត៌មានអន្តរជាតិរ៉យទឺរ( Reuters) នាព្រឹកថ្ងៃទី៧ ខែមិថុនា ឆ្នាំ២០២០។
សារព័ត៌មានរ៉យទឺរ បានដកស្រង់ពាក្យសម្តីលោកវ៉ាងហ្សីហ្កាង( Wang Zhigang ) រដ្ឋមន្ត្រីបច្ចេកវិទ្យានិងវិទ្យាសាស្ត្រចិន ថាប្រទេសនេះនឹងធ្វើឲ្យវាក់សាំងនេះទៅជាផលិតផលសាធារណៈ ដែលអាចប្រើប្រាស់បាននៅទូទាំងពិភពលោក មិនមែនសម្រាប់ចិនតែឯងឡើយ។
ក្នុងសន្និសីទសារព័ត៌មានមួយស្តីពីការចេញផ្សាយនូវសៀវភៅសរបស់ប្រទេសចិន ពាក់ព័ន្ធជំងឺរាតត្បាតជាសកល COVID-19 លោកវ៉ាងហ្សីហ្កាង( Wang Zhigang )បាននិយាយថា ប្រទេសលោកនឹងប្រឹងបង្កើនកិច្ចសហប្រតិបត្តិការ អន្តរជាតិឲ្យកាន់តែខ្លាំងក្លាថែមទៀត ប្រសិនបើចិនទទួលជោគជ័យ ក្នុងការអភិវឌ្ឍវ៉ាក់សាំង COVID-19 ហើយប្រទេសចិននឹងធ្វើឲ្យវាទៅជាវ៉ាក់សាំងសាធារណៈ សម្រាប់បម្រើជាប្រយោជន៍ដល់មនុស្សជាតិទាំងមូល។
គួរជម្រាបថា បច្ចុប្បន្នប្រទេសជាច្រើនកំពុងតែប្រឹងប្រែងស្រាវជ្រាវ និងអភិវឌ្ឍវ៉ាក់សាំងសម្រាប់ COVID-19 ដោយការធ្វើតេស្ត មួយចំនួន បានឈានដល់ការសាកល្បងលើមនុស្សហើយ។ ក្រុមអ្នកជំនាញសង្ឃឹមថា នឹងអាចមានវ៉ាក់សាំង COVID-19 ជាផ្លូវការ នៅអំឡុងឆ្នាំក្រោយ៕
