អន្តរជាតិ ៖ រដ្ឋាភិបាលវៀតណាមបានប្រកាសមហិច្ឆិតាថ្មីរបស់ខ្លួន ដើម្បីចូលក្នុងទីផ្សារអាវុធពិភពលោក ដោយជម្រុញអ្នកវិទ្យាសាស្ត្រផ្នែកយោធា ធ្វើការស្រាវជ្រាវ និងផលិតអាវុធដោយប្រើបច្ចេកវិទ្យាទំនើបៗនាំចេញទៅកាន់ទីផ្សារពិភពលោក។ នេះបើតាមលោកនាយករដ្ឋមន្ត្រីវៀតណាម លោកង្វៀងសួនហ្វុក( Nguyen Xuan Phuc)។
ក្នុងជំនួបជាមួយរដ្ឋមន្ត្រីក្រសួងការពារជាតិលោកង៉ូសួនលិច( Ngo Xuan Lich )និងរដ្ឋមន្ត្រីក្រសួងសន្តិសុខសាធារណៈ លោក តូឡាំ(To Lam)លោក នាយករដ្ឋមន្ត្រី វៀតណាម បានលើកឡើងថា អាជ្ញាធរយោធា ត្រូវតែផ្តោតលើការសិក្សាស្រាវជ្រាវរកបច្ចេកវិទ្យាសព្វាវុធជាអាទិភាព ដើម្បីជំរុញទៅដល់ការបង្កើតឲ្យមានសហគ្រាសសម្រាប់វិស័យការពារជាតិ។
សូមបញ្ជាក់ថានៅក្នុងរបាយការណ៍ស្តីពីចំណាត់ថ្នាក់កម្លាំងយោធាប្រចាំឆ្នាំ ២០២០ ចេញផ្សាយដោយភ្នាក់ងារគ្លប៊លហ្វាយផៅវឺ( Global Firepower) មានមូលដ្ឋាននៅអាមេរិក កងយោធាវៀតណាម ត្រូវបានចាត់ទុកជាកងយោធាខ្លាំងលេខរៀងទី ២២ ក្នុងចំណោមប្រទេសសរុប ១៣៨ ដែលមានក្នុងបញ្ជីវា យត ម្លៃ។
ប៉ុន្តែទី ភ្នាក់ងារស្រាវជ្រាវទីផ្សារអាវុធពិភពលោក ICD Research សមត្ថភាពផលិតសព្វាវុធយោធាក្នុងប្រទេសនេះ គឺមានការអភិវឌ្ឍន៍តិចតួចបំផុត ដោយសារតែវៀតណាម ពឹងផ្អែកទាំងស្រុងទៅលើឧបករណ៍ បរិក្ខាពីបរទេស ដើម្បីបំពេញដើម្បីការក្នុងវិស័យយោធារបស់ខ្លួន។ ផែនការវាយលុកចូលទីផ្សារអាវុធពិភពលោក កំពុងជំរុញឲ្យសហគ្រាសធុនមធ្យមរបស់ប្រទេសនេះ ប្រថុយប្រថាន សហការជាមួយរដ្ឋាភិបាល ដើម្បីទទួលសិទ្ធិផលិត និងលក់អាវុធដោយផ្ទាល់។
កាលពីមុន ឧស្សាហកម្មយោធារបស់វៀតណាម គឺពឹងផ្អែកស្ទើរទាំងស្រុងទៅលើការផ្គត់ផ្គង់ពីសំណាក់ប្រទេសរុស្ស៊ី ប៉ុន្តែបច្ចុប្បន្ន ការផ្គត់ផ្គង់សព្វាវុធយោធាពីសហរដ្ឋអាមេរិក ក៏ដូចជាអឺរ៉ុប បានជ្រៀតចូលទីផ្សាររបស់ប្រទេសនេះ តាមរយៈកិច្ចព្រមព្រៀងទិញលក់ផ្ទាល់សម្រាប់ប្រព័ន្ធការពារជាតិកម្រិតខ្ពស់។ ទោះជាយ៉ាងណា រដ្ឋាភិបាលវៀតណា ពីមួយជំនាន់ទៅមួយជំនាន់ នៅតែសម្លឹងរកការអភិវឌ្ឍន៍ប្រព័ន្ធការពារជាតិដោយខ្លួនឯង៕