ខេត្តបន្ទាយមានជ័យ ៖ នៅព្រឹកថ្ងៃទី១ ខែមិថុនា ឆ្នាំ២០២០ ពុំមានបាតុកម្មនៅច្រកទ្វារព្រំដែនអន្តរជាតិប៉ោយប៉ែតទេ ដែលជាថ្ងៃដំបូងនៃគម្រោងធ្វើបាតុកម្មដែលសមាគមសេដ្ឋកិច្ចក្រៅប្រព័ន្ធបានជូនដំណឹងនោះ ។ចំណែកនៅរង្វង់មូលក្បាលស្ពាននិងប្លុកច្រកទ្វារព្រំដែនរហូតដល់ស្ថានីយ៍រថភ្លើងប៉ោយប៉ែតត្រូវបានដាក់បារ៉ាស់ត្រួតពិនិត្យយ៉ាងតឹងរ៉ឹង ។
ចំណែកមន្ត្រីនិងកម្លាំងចម្រុះរបស់កម្ពុជាយ៉ាងច្រើនត្រូវពង្រាយតាមគោលដៅដែលមានក្នុងផែនការរបស់គណៈបញ្ជាការកងឯកភាពខេត្តបន្ទាយមានជ័យ នៅក្នុងនិងក្រៅជុំវិញបរិវេណតំបន់ច្រកទ្វារព្រំដែនអន្តរជាតិប៉ោយប៉ែត ក្រុងប៉ោយប៉ែត ខេត្តបន្ទាយមានជ័យប្រទេសកម្ពុជា ។
នាព្រឹកថ្ងៃទី១ ខែមិថុនា តំណាលគ្នានោះដែរ នៅខាងច្រកទ្វារព្រំដែនអចិន្ត្រៃយ៍ខ្លងលឹក ស្រុកអារញ្ញប្រាថេត ខេត្តស្រះកែវ ប្រទេសថៃ មន្ត្រីអាជ្ញាធរមានសមត្ថកិច្ចនិងកម្លាំងថៃរាប់រយនាក់ ក៏ពង្រាយដូចខាងកម្ពុជាដែរ ។ពោលគឺភាគីទាំង២បាននឹងកំពុងបង្កើនការប្រុងជើងការខ្ពស់បំផុតដូចគ្នា ។
ចំណែករដ្ឋបាលក្រុងប៉ោយប៉ែតបានរំលឹកពីស្មារតីខ្លឹមសារប្រកាសព៍ត៌មានរបស់ខ្លួនដែលច្រានចោលពាក្យចចាមអារាមដែលថាច្រកព្រំដែននេះនឹងបើកនៅថ្ងៃទី១ខែមីថុនាឆ្នាំ២០២០។ក្រុងចាត់ទុកការបំផុសបំផុលនោះជាចេតនាអូសទាញកម្មករអូសរទេះនិងពលករអាជីវករដែលមានរបររកស៊ីនៅតំបន់ច្រកទ្វារព្រំដែនអន្តរជាតិប៉ោយប៉ែត-ខ្លងលឹក និងនៅផ្សាររោងក្លឿ មកចូលរួមបាតុកម្មឬក៏បង្កើនបរិមាណមនុស្សនៅតំបន់ហាមឃាត់នៃបរិវេណតំបន់ច្រកទ្វារព្រំដែនតែប៉ុណ្ណោះ ។
សូមរំលឹកដែរថា លោកឌិន ពុទ្ធី ហៅវុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជាបានជូនដំណឹងពីការដឹកនាំធ្វើបាតុកម្មនៅនឹងច្រកទ្វារព្រំដែនអន្តរជាតិប៉ោយប៉ែតចាប់ពីថ្ងៃទី១ ខែមិថុនា ឆ្នាំ២០២០ និងតទៅមុខទៀត ដើម្បីបើកច្រកទ្វារព្រំដែនអន្តរជាតិប៉ោយប៉ែតសម្រាប់មនុស្សចេញ ចូល) និងបើមិនបានសម្រេចបំណងនេះទេ សូមបិទមិនអោយរថយន្តដឹកទំនិញពីថៃចូលមកកម្ពុជាវិញដែរ ដើម្បីអោយស្មើភាពគ្នា ។ប៉ុន្តែលោក អ៊ុំ រាត្រី អភិបាលខេត្តបានបញ្ជាក់ក្នុងលិខិតផ្លូវការមួយថា ៖ រដ្ឋបាលខេត្តបន្ទាយមានជ័យមិនអនុញ្ញាតអោយសមាគមសេដ្ឋកិច្ចក្រៅប្រព័ន្ធធ្វើបាតុកម្មនោះឡើយ ព្រោះច្រកព្រំដែនមិនអាចបើកឡើងវិញនៅឡើយ ត្បិតរាជរដ្ឋាភិបាលកម្ពុជាបន្តបិទប្រទេស ដូចថៃដែរ ដើម្បីទប់ស្កាត់ការរីករាលដាលនៃជម្ងឺកូវីត១៩ ។
ជារួមស្ថានការណ៍សន្តិសុខ សណ្តាប់ធ្នាប់ នៅតំបន់ច្រកទ្វារល្អប្រសើរ ។មន្ត្រីនិងបុគ្គលិកកាស៊ីណូ ពលរដ្ឋអាចចេញចូលតំបន់ច្រកទ្វារនិងប្លុកកាស៊ីណូបាន។ ប៉ុន្តែរថយន្តធុនធ្ងន់ដឹកជញ្ជូនទំនិញពីប្រទេសថៃមកកម្ពុជា បានផ្អាកសិន នៅព្រឹកថ្ងៃទី១ ខែមិថុនា នេះ៕
