ខេត្តកំពត ៖ តាមប្រភពព័ត៌មានពីសមត្ថកិច្ចដែនដី បានឲ្យដឹងថា នៅវេលាម៉ោង១៦ និង៤០នាទីល្ងាច ថ្ងៃទី២៩ ខែឧសភា ឆ្នាំ២០២០ កម្មករពីរនាក់ដែលធ្វើការក្នុងក្រុមហ៊ុនផលិតស៊ីម៉ងត៍ភ្នំល្អាង រោងចក្រថៃប៊ុនរុង បានស្លាប់ ក្រោមបំណែកថ្មយ៉ាងអាណោចអាធ័ម ខណៈកម្មករជាជនរងគ្រោះទាំងពីរនាក់ បានឡើងទៅបំផ្ទុះយកថ្មភ្នំ សម្រាប់ផលិតស៊ីម៉ងត៍ក្នុងរោងចក្រ ត្រង់ចំណុចភ្នំមួយកន្លែង ស្ថិតក្នុងភូមិល្អាង ឃុំល្អាង ស្រុកដងទង់ ខេត្តកំពត។
សមត្ថកិច្ចបានបញ្ជាក់ឲ្យដឹងទៀតថា ជនរងគ្រោះដែលស្លាប់ទាំងពីរនាក់រួមមាន៖
ទី១-ឈ្មោះ គុណ រ៉ាល់ ហៅតាល់ ភេទប្រុស អាយុ២៩ឆ្នាំ ជនជាតិខ្មែរ
ទី២-ឈ្មោះ ញឹប សារុន ភេទប្រុស អាយុ៣៣ ជនជាតិខ្មែរ ទាំងពីរនាក់ រស់នៅក្នុងភូមិសាស្ត្រស្រុកទឹកឈូ ខេត្តកំពត ដោយជនរងគ្រោះធ្វើការនៅក្រុមហ៊ុនផលិតស៊ីម៉ងត៍ ថៃប៊ុនរុង ដែលមានទីតាំងស្ថិតក្នុងភូមិល្អាង ឃុំល្អាង ស្រុកដងទង់ ខេត្តកំពត។
បច្ចុប្បន្នសាកសពជនរងគ្រោះទាំងពីរនាក់ ត្រូវបានកាយរកឃើញ ហើយប្រគល់ជូនក្រុមគ្រួសារ ដើម្បីចាត់ចែងធ្វើបុណ្យតាមប្រពៃណី និងក៏មានការឧបត្ថម្ភជ្រោមជ្រែងពីក្រុមហ៊ុនថៃប៊ុនរុង ដោយបានផ្តល់ថវិកាជូនសព ក្នុងម្នាក់ចំនួន៣៥,០០០ដុល្លារ សម្រាប់ចូលរួមរំលែកទុក្ខដល់ក្រុមគ្រួសារសព៕
