ខេត្តកោះកុង ៖គឺចាប់ពីថ្ងៃទី៣១ ខែឩសភា រហូតដល់ថ្ងៃទី១ ខែមិថុនា ឆ្នាំ២០២០ គឺមានរយះពេល២ថ្ងៃជាប់គ្នា អាជ្ញាធរខេត្តកោះកុង បានសហការជាមួយអង្គការសម្ព័ន្ធសង្គមស៊ីវិល ចុះយុទ្ធនាការបាញ់ថ្នាំបង្ការ និងទប់ស្កាត់មេរោគកូវីដ១៩នៅតាមតំបន់សាធារណៈមួយចំនួនក្នុងខេត្តកោះកុង ។
បើតាមការបញ្ជាក់ពីលោក សាខុន បូរិន អគ្គលេខាធិការរង នៃវេទិការសម្ព័ន្ធសង្គមស៊ីវិល បានអោយដឹងថា ម៉ាស៊ីនបំភាយឩស្ម័នចំនួន២០០គ្រឿង និងថ្នាំបង្ការ និងទប់ស្កាត់មេរោគកូវីដ១៩មួយចំនួន ដែលជាអំណោយរបស់អង្គការមេឃព័ណខៀវ នៃសាធារណៈរដ្ឋប្រជាមានិតចិន ត្រូវបានដាក់អោយប្រើប្រាស់នៅតាមបណ្តារាជធានីខេត្ត ក្នុងនោះសម្រាប់ខេត្តកោះកុងក៏ទទួលបានម៉ាស៊ីនបំភាយឩស្ម័នចំនួន២គ្រឿង សម្រាប់ទុកប្រើប្រាស់នៅក្នុងមូលដ្ឋានផងដែរ ។
សូមបញ្ជាក់ថា ខេត្តកោះកុងជាខេត្តមួយដែលធ្លាប់បានហូរចូលជំងឺកូវីដ១៩មកពីខាងក្រៅចំនួន២ករណី តែត្រូវបានក្រុមគ្រូពេទ្យធ្វើការព្យាបាលជាសះស្បើយដោយជោគជ័យ និងមិនមានការឆ្លងរាលដាលបន្តទៀតនោះឡើយ។
តែបើទោះបីជាបញ្ហានៃជំងឺកូវីដ១៩ កំពុងស្ថិតក្នុងស្ថានភាពធូរស្បើយយ៉ាងណាក្តី ក៏រាជរដ្ឋាភិបាលកម្ពុជា រួមទាំងក្រសួងពាក់ព័ន្ធ ពិសេសរដ្ឋបាលខេត្តកោះកុង នៅតែបារម្ភនិងបានយកចិត្តទុកដាក់ខ្ពស់ ពោលគឺនៅតែបន្តបំផុសស្មារតីប្រជាពលរដ្ឋ អោយចូលរួមទប់ស្កាត់ការរីករាលដាលនៃជំងឺកូវីដ១៩ និងបន្តថែរក្សាអនាម័យខ្លួនប្រាណតាមការណែនាំរបស់ក្រសួងសុខាភិបាល និងរាជរដ្ឋាភិបាល ៕
