ខេត្តកោះកុង ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានស្នើសុំយ៉ាងទទួចដល់ក្រសួងបរិស្ថាន និងពន្លឿនការកាត់ឆ្វៀលដីក្នុងតំបន់អភិរក្សជូនពលរដ្ឋអោយបានឆាប់ ដើម្បីអោយពួកគាត់ទទួលបានប័ណ្ណកម្មសិទ្ធិស្របច្បាប់ ។
ការថ្លែងបែបនេះ ត្រូវបានធ្វើឡើងនៅក្នុងពិធីបញ្ចុះបឋមសិលាបើកការដ្ឋានសាងសង់ស្តូបអនុស្សាវរីយ៍នយោបាយឈ្នះ ឈ្នះ នាព្រឹកថ្ងៃទី៣០ ខែឧសភា ឆ្នាំ២០២០ ក្នុងភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ។
ឆ្លៀតក្នុងឱកាសនេះដែរ សម្តេចពិជ័យសេនា ក៏បានដាក់បទបញ្ជាអោយអាជ្ញាធរមានសមត្ថកិច្ច នាំគ្នាថែរក្សា និងទប់ស្កាត់អោយបាននូវរាល់ការចាក់ដីលុប និងកាប់ទន្ទ្រានព្រៃកោងកាងដែលជាសម្បត្តិសាធារណៈរបស់រដ្ឋ និងជាជម្រកដ៏សំខាន់សម្រាប់ជីវចម្រុះ ។
សូមបញ្ជាក់ថា ស្តូបអនុស្សាវរីយ៍នយោបាយ ឈ្នះ ឈ្នះ គឺដើម្បីរម្លឹកគុណដល់បុព្វបុរសជំនាន់មុនដែលបានលះបង់សាច់ស្រស់ ឈាមស្រស់ ដើម្បីរំដោះជាតិមាតុភូមិ ពីរបបខ្មៅងងឹត ដោយនាំមកនូវសន្តិភាព និងការអភិវឌ្ឍន៍ ជាងនេះទៅទៀត ស្តូបអនុស្សាវរិយ៍នយោបាយឈ្នះឈ្នះ ក៏ជាទីតាំងមួយសម្រាប់ទាក់ទាញភ្ញៀវទេសចរណ៍ជាតិ អន្តរជាតិ អោយមកកំសាន្តក្នុងខេត្តកោះកុងផងដែរ ៕
