ខេត្តបន្ទាយមានជ័យ ៖ នគរបាលការិយាល័យប្រឆាំងការជួញដូរមនុស្សនិងការពារអនីតិជនបានរៀបចំសំណុំរឿង បញ្ជូនជនសង្ស័យម្នាក់ទៅសាលាដំបូងខេត្តបន្ទាយមានជ័យ ដោយជាប់ចោទពីបទប៉ុនប៉ងនាំមនុស្សឆ្លងដែនដោយខុសច្បាប់ នៅថ្ងៃទី២៨ ខែឧសភា ឆ្នាំ២០២០។
នគរបាលក្រុងប៉ោយប៉ែតបានឲ្យដឹងថា ជនសង្ស័យមានឈ្មោះ សួន ពិសិដ្ឋ ភេទប្រុស អាយុ៤២ឆ្នាំ មុខរបរជាកម្មករ ស្នាក់នៅបន្ទប់ជួល រស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។នគរបាលបានបញ្ជាក់ឲ្យដឹងទៀតថា ជនសង្ស័យឈ្មោះ សួន ពិសិដ្ឋ នេះ កាលពីវេលាម៉ោង៨និង៤០នាទីព្រឹកថ្ងៃទី២៧ ខែឧសភា ឆ្នាំ២០២០ ត្រូវបានកម្លាំងនគរបាលក្រុងប៉ោយប៉ែត ចុះល្បាតនៅចំណុចភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត បានប្រទះឃើញជនសង្ស័យកំពុងប្រមូលផ្តុំពលករខ្មែរចំនួន៤នាក់ ស្រី២នាក់ នៅក្នុងបន្ទប់ជួលរបស់ខ្លួន បំរ៉ុងនាំឆ្លងដែនដោយខុសច្បាប់ចូលទៅទឹកដីថៃ ។ ពេលឃើញសមត្ថកិច្ចជនសង្ស័យបានព្យាយាមរត់គេចខ្លួនក៏ជង់នឹងដែកមុតជើងខាងស្តាំ ត្រូវសមត្ថកិច្ចចាប់ខ្លួនបានតែម្តង។នគរបាលបានបញ្ជាក់ឲ្យដឹងទៀតថា ក្រោយពីធ្វើការឃាត់ខ្លួននិងសួរនាំ ជនសង្ស័យ បានសារភាពថា មនុស្សទាំង៤នាក់នោះ គេពិតជាប្រមូលផ្តុំបំរុងនាំឆ្លងដែនមែន ដោយនាំយកទៅឲ្យឈ្មោះ ភ័ក្ត្រ ភេទប្រុស អាយុ៣៨ឆ្នាំ
ស្នាក់នៅប្រទេសថៃ ។
លោកវរសេនីយ៍ទោ ឡាយ គឹមលួន នាយការិយាល័យប្រឆាំងការជួញដូរមនុស្សនិងការពារអនីតិជន បានបញ្ជាក់ថា ជនសង្ស័យឈ្មោះ សួន ពិសិដ្ឋ ត្រូវបានកម្លាំងជំនាញរបស់លោកបានរៀបចំសំណុំរឿងបញ្ជូនទៅសាលាដំបូងខេត្តចាត់ការតាមនិតិវិធីច្បាប់ហើយដែរ ។
