ខេត្តបន្ទាយមានជ័យ ៖ នៅវេលាម៉ោង១ថ្ងៃត្រង់ថ្ងៃទី២៦ ខែឧសភា ឆ្នាំ ២០២០ ជនសង្ស័យជាមេខ្យល់វ័យក្មេងម្នាក់ពូកែដើរបោកពលករឲ្យទៅធ្វើការនៅប្រទេសថៃ ត្រូវសមត្ថកិច្ចចាប់បាន១នាក់ នៅចំណុចភូមិភ្នំរូង ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
កម្លាំងអធិការរដ្ឋាននគរបាលស្រុកម៉ាឡៃ បានប្រាប់ឲ្យដឹងថា ជនសង្ស័យជាមេខ្យល់ដើរបោកពលករឲ្យទៅធ្វើការនៅស្រុកថៃមានឈ្មោះ ផន មុត ភេទប្រុស អាយុ១៩ឆ្នាំ រស់នៅភូមិទួលពង្រ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។ មុនពេលជូនពលករចេញទៅស្រុកថៃនោះ ជនសង្ស័យបានបញ្ចុះបញ្ចូលពលករ១៥នាក់ថា ខ្លួននិងនាំយកទៅធ្វើការនៅស្រុកថៃ កន្លែងការងារធ្វើស្រួលនិងប្រាក់ខែបានច្រើន ក្នុងពលករម្នាក់ត្រូវបង់ថ្លៃជូន៣.០០០បាទ ក្រោយពីពលករនិងអ្នកជូនយល់ព្រមគ្នាអស់ហើយក៏បានជូននាំតាមច្រកយកមកទម្លាក់ទុកនៅចំណុចមាត់អូរព្រំដែនកម្ពុជា ថៃ ត្រូវបានទាហានថៃចាប់បញ្ជូនមកប្រគល់ឲ្យនគរបាលការពារព្រំដែន៩១៥ខ្មែរវិញ។
កម្លាំងអធិការរដ្ឋាននគរបាលបានបញ្ជាក់ឲ្យដឹងទៀតថា យោងតាមចម្លើយរបស់ជនសង្ស័យឈ្មោះ ផន មុត បានសារភាពថាខ្លួននិងបក្ខពួកចំនួន ៣នាក់ទៀតពិតជាបាននាំមនុស្សឆ្លងដែនទៅកាន់ប្រទេសថៃ ដើម្បីទៅរកការងារធ្វើពិតប្រាកដមែនហើយ ចំនួនមនុស្សដែលខ្លួនបានជូននោះប្រហែល១៥ នាក់។
ក្រោយពីសារភាពហើយមេខ្យល់ត្រូវបានបញ្ជូនមកស្នងការ និងរៀបចំបែបបទសំនុំរឿងបញ្ជូនទៅតុលាការដើម្បីចាត់ការទៅតាមច្បាប់។ ចំណែកពលករដែលចាញ់បោកមេខ្យល់នោះបានយកមកពិនិត្យសុខភាព ធ្វើការអនុវត្តវិធានការចត្តាឡីស័ក និង ធ្វើការពន្យល់ដល់ពលករទាំង១៥នាក់ឈប់ធ្វើការចាញ់បោកមេខ្យល់បន្ត និងដឹកជញ្ជូនបងប្អូនទៅកាន់លំនៅឋានរៀងខ្លួន ឲ្យបាន សមស្រប ផងដែរ។
សមត្ថកិច្ចបានបន្តថា សព្វថ្ងៃប្រទេសថៃ នៅបន្តបន្តដាក់ប្រទេសក្នុងភាពគ្រាមានអាសន្ននៅឡើយ ដើម្បីទប់ស្កាត់ ការរីករាលដាលនៃជំងឺកូវីដ-១៩ ហេតុនេះក្នុងនាមលោកជាសមត្ថកិច្ចត្រូវបន្តអប់រំណែនាំ និងផ្សព្វផ្សាយដល់ប្រជាពលរដ្ឋ ចង់ទៅធ្វើការនៅស្រុកថៃ កុំឲ្យធ្វើដំណើរទៅកាន់ប្រទេសថៃជាដាច់ខាត។សមត្ថកិច្ចលោកនៅតែបន្តយកចិត្តទុកដាក់អនុវត្តវិធានការ និង គោលការណ៍ណែនាំនានារបស់រាជរដ្ឋាភិបាលកម្ពុជា និងក្រសួងសុខាភិបាល ក្នុងការបង្ការ ទប់ស្កាត់ ការរីករាលដាលជំងឺកូវីដ -១៩ នៅកម្ពុជា ឲ្យទទួលបានប្រសិទ្ធភាពខ្ពស់ផងដែរ។
