ខេត្តកំពង់ធំ ៖ ថ្លែងក្នុងពិធីចែកអំណោយមនុស្សធម៌របស់កាកបាទក្រហមកម្ពុជាសាខាខេត្តកំពង់ធំ នៅស្រុកបារាយណ៍ នាព្រឹកថ្ងៃទី២៥ ខែឧសភា ឆ្នាំ២០២០ ឯកឧត្តម សុខ លូ អភិបាលខេត្តកំពង់ធំ និងជាប្រធានគណកម្មាធិការកាកបាទក្រហមកម្ពុជាសាខាខេត្តកំពង់ធំ បានអំពាវនាវឲ្យប្រជាពលរដ្ឋទាំងអស់ នៅតែបន្តការរស់នៅប្រកបដោយអានាម័យ ដើម្បីទប់ស្កាត់រលកទី២នៃការឆ្លងរីក រាលដាលជំងឺកូវីដ១៩ នៅតាមមូលដ្ឋាន។
ឯកឧត្តមបន្តថា តាមប្រភពផ្លូវរបស់ក្រសួងសុខាភិបាល កម្ពុជាមានអ្នកឆ្លងជំងឺចំនួន១២៤ករណី ព្យាបាលជាសះស្បើយចំនួន១២២ករណី គ្មានអ្នកស្លាប់។ ក្នុងនោះរាជរដ្ឋាភិបាលកម្ពុជាបានទប់ស្កាត់ និងព្យាបាល ប្រកបដោយភាពជោគជ៧យម្តងរួចទៅហើយ ដោយករណីអ្នកឆ្លងថ្មីចំនួនពីរករណីនេះ គឺជារលកទី២ ដែលគួរឲ្យប្រជាពលរដ្ឋទូទាំងប្រទេសកម្ពុជាមានការប្រុងប្រយ័ត្នខ្ពស់បំផុត ដោយផ្តោតសំខាន់លើទម្លាប់នៃការស់នៅថ្មី ប្រកបដោយអនាម័យខ្ពស់ និងអនុវត្តន៍តាមអនុសាសន៍របស់ប្រមុខរាជរដ្ឋាភិបាល ក៏ដូចជាសេចក្តីជូនដំណឹងរបស់ក្រសួងសុខាភិបាល។ ក្នុងនោះការអនុវត្តព្រមគ្នាជាចាំបាច់ គឺបន្តលាងដៃនិងសាប៊ូ អាល់កុល ជែល ឲ្យបានញឹកញាប់ ប្រើប្រាស់កន្សែង ក្រម៉ា ឬកែងដៃ រាល់ពេលក្អកកណ្តាស់ ប្រើប្រាស់ម៉ាស់ពេលធ្វើដំណើរ ឬនៅកន្លែងទីប្រជុំជន, កុំប្រមូលផ្តុំគ្នាជាក្រុមធំ កុំធ្វើដំណើរឆ្លងកាត់ពីតំបន់មួយទៅតំបន់មួយក្នុងករណីមិនចាំបាច់ រស់នៅដាច់ដោយឡែករយៈ ពេល១៤ថ្ងៃ ករណីដែលមានសាច់ញាត្តិ ឬបងប្អូនមកពីបរទេស ព្រមទាំងរាយការណ៍ទៅកាន់អាជ្ញាធរដែនដី សមត្ថកិច្ចមូលដ្ឋាន ឬហៅទូរស័ព្ទទៅកាន់លេខ១១៥ ក្នុងករណីដែលមានអាការៈក្តៅខ្លួនខ្លាំង ក្អកស្ងួត និងពិបាកដកដង្ហើមជាដើម។
ទន្ទឹមជាមួយគ្នានេះដែរ ឯកឧត្តមមិនភ្លេចពាំនាំនូវប្រសាសន៍ផ្ដាំផ្ញើការសាកសួរសុខទុក្ខ និងក្ដីនឹករលឹកពីសំណាក់សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្ដេច តែងតែគិតគូរយកចិត្តទុកដាក់អំពីសុខទុក្ខប្រជាពលរដ្ឋ និងមិនទុកឲ្យប្រជាពលរដ្ឋណាម្នាក់រស់នៅដោយគ្មានការយកចិត្តទុកដាក់ ពីថ្នាក់ដឹកនាំឡើយ។ ហើយថ្វីត្បិតតែអំណោយនេះតិចតួច មិនអាចគ្រប់សម្រាប់ជីវភាពប្រចាំថ្ងៃ ប៉ុន្តែវាអាចសម្រួលដល់ការលំបាកបានមួយរយៈពេលផងដែរ។
លោក អួង សារឿន ប្រធានអនុសាខាកាកបាទក្រហមកម្ពុជាស្រុកប្រារាយណ៍ បានធ្វើរាយការណ៍ដែរថា អំណោយដែលចែកជូនប្រជាពលរដ្ឋនៅស្រុកបាយណ៍ គឺជាអំណោយរបស់កាកបាទក្រហមសាខាខេត្តកំពង់ធំ មានចំនួន៨០គ្រួសារ ដែលក្នុងមួយគ្រួសារទទួលបាន អង្ករ ២៥ គីឡូ ត្រីខ ១យួរ ទឹកស៊ីអ៊ីវ ១យួរ៕