ខេត្តកំពង់ធំ៖ នៅរសៀលថ្ងៃទី២២ ខែឧសភា ឆ្នាំ ២០២០ គ្រឿងក្នុងជ្រូក ដែលឈ្មួញដឹកជញ្ជូនដែលគ្មានច្បាប់ត្រូវបានការិយាល័យ ផលិតកម្ម បសុព្យាបាលសត្វ ខេត្តកំពង់ធំ រួមសហការជាមួយនឹងស្នងការដ្ឋាននគរបាលខេត្តកំពង់ធំ បង្ក្រាបបានជិតមួយតោន នឹងត្រូវបានធ្វើពិធីដុតកំទេចចោល។
នៅក្នុងពិធីដុតកំទេចគ្រឿងក្នុងជ្រូក ដោយមានការអញ្ជើញចូលរួមពីលោក ប៉ែន វណ្ណរិទ្ធ ប្រធានមន្ទីរកសិកម្ម ខេត្តកំពង់ធំ និងលោក ឌួង សារ៉ន ព្រះរាជអាជ្ញារង អយ្យការអមសាលាដំបូងខេត្តកំពង់ធំ និងលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ លោក ឃុន ប៊ុនហូរ មេបញ្ជាការរង កងរាជអាវុធហត្ថ ខេត្តកំពង់ធំ និងលោក តាន់ ម៉េងឆាង ប្រធានការិយាល័យ ផលិតកម្ម បសុព្យាបាលសត្វ ខេត្តកំពង់ធំ បានដុតកម្ទេចគ្រឿងក្នុងជ្រូកចំនួន៩២៨គីឡូក្រាម ។
ទំនិញដែលត្រូវបានដុតកម្ទេចក្នុងថ្ងៃនេះ មានដូចជា ពោះជ្រូក ថ្លើមជ្រូក ស្លឹកត្រចៀកជ្រូក ឆ្អឹងជំនីជ្រូក និងគ្រឿងក្នុងជ្រូកមួយចំនួនទៀត ។ សូមបញ្ជាក់ថាផលិតផលទាំងនេះ គឺជាផលិតផលដែលខូចគុណភាព ត្រូវបាននាំចូលពី ប្រទេសថៃ នាំយកមកចែកចាយនៅក្នុងរាជធានីភ្នំពេញ ។
គួបញ្ជាក់ថា ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកំពង់ធំ នៅយប់ថ្ងៃទី១៩ ខែឧសភា ឆ្នាំ២០២០ បានសហការជាមួយមន្ត្រីជំនាញ នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានចុះបង្ក្រាបបានករណីរថយន្តលួចដឹកជញ្ជូនផលិតផល មានដើមកំណើតពីសត្វ ដោយគ្មានលិខិតអនុញ្ញាត ស្ថិតនៅភូមិកកោះ ស្រុកសន្ទុក ខេត្តកំពង់ធំ។ ការចុះបង្ក្រាបនេះ សមត្ថកិច្ចបានដកហូតបានវត្ថុតាង ជារថយន្តសាំងយ៉ុងពណ៌ស ០១គ្រឿង ពាក់ស្លាកលេខភ្នំពេញ 2AN-1029 ដឹកជញ្ផូនគ្រឿងក្នុងសត្វចំនួន ១៦ឡាំងស្នោ ស្មើនឹង៩២៨គីឡូក្រាម ដោយគ្មានលិខិតអនុញ្ញាតត្រឹមត្រូវ៕
