ខេត្តព្រះសីហនុ ៖ យោងតាមការបញ្ជាក់របស់មន្ត្រីនគរបាលខេត្តព្រះសីហនុបានឲ្យដឹងថា ករណីជម្លោះរហូតផ្ទុះអាវុធនៅកោះរ៉ុង សមត្ថកិច្ចបានបញ្ជូនជនជាតិចិននិងជនជាតិខ្មែរសរុប១៨នាក់ទៅតុលាការ ដើម្បីចាត់ការតាមច្បាប់ ។
មានករណីផ្ទុះអាវុធក្នុងជម្លោះដែលមានជនជាតិខ្មែរនិងចិននៅកោះរ៉ុងកាលពីយប់ថ្ងៃទី១៤ខែឧសភាកន្លងទៅ ។ ក្រោយការស្រាវជ្រាវកម្លាំងជំនាញបានឃាត់ខ្លួនមនុស្សចំនួន៣១នាក់ ក្នុងនោះចិន២៣នាក់(ស្រី៣នាក់ ខ្មែរ៦នាក់(ស្រី៤នាក់) ។ ប៉ុន្តែសមត្ថកិច្ចបានសម្រេចបញ្ជូនទៅតុលាការនូវជនជាតិចិនចំនួន១៦នាក់ និងខ្មែរ២នាក់ ។ ទន្ទឹមនោះយើងក៏កំពុងតាមរកជនជាតិខ្មែរ៣នាក់ដែលជាអ្នកផ្ទុះអាវុធ និង សហចារីផងដែរ ។
តាមប្រភពព័ត៌មានក្រៅផ្លូវការបានឲ្យដឹងថា ជម្លោះរហូតផ្ទុះអាវុធនៅចំណុចកោះរ៉ុងនោះ គឺផ្តើមចេញពីមនុស្ស២ក្រុមផឹកស៊ីជិតគ្នា ហើយបង្កជម្លោះតែម្តង ។ តាមដឹងភាគីផ្ទុះអាវុធជាជនជាតិខ្មែរ ហើយបាននិងកំពុងរត់គេចខ្លួន ៕