ស្រុកប្រាសាទបល្ល័ង្ក ៖ ក្រសួងអប់រំ យុវជន និងកីឡា បានធ្វើការផ្អាកបិទសាលាជាបណ្តោះអាសន្ននៅគ្រប់គ្រឹៈស្ថានសិក្សាទាំងរដ្ឋ និងឯកជន ដោយសារតែជំងឺ Covid-19 ក្នុងដំណាក់កាលនេះ សម្រាប់សិស្សានុសិស្សដែលទទួលបានការអប់រំពីចម្ងាយតាមចរាចរណ៍លេខ២៣ របស់ក្រសួងអប់រំយុវជន និងកីឡា ដែលក្រសួងបានបង្កើតកម្មវិធីបង្រៀនតាមបែប (ឌីជីថល) ។
ការសិក្សាពីចម្ងាយតាមរយ:ប្រព័ន្ធអេឡិចត្រូនិក គឺដើម្បីលើកកម្ពស់គុណភាពវិស័យអ់រំតាមប្រព័ន្ធអនឡាញ ដូច្នេះលោកគ្រូ អ្នកគ្រូ បន្តផ្សព្វផ្សាយការសិក្សាពីចម្ងាយតាមប្រព័ន្ធអេឡិចត្រូនិកដល់សិស្សានុសិស្ស ក្រុមការងារប្រមូលព័ត៌មានបានគ្រប់ជ្រុងជ្រោយ រក្សាគន្លាតការជួបជុំគ្នាមិនលើសពី ១០នាក់ ជម្រុញមាតាបិតាសិស្សជួយបង្រៀនកូន ចៅ តាមប្រព័ន្ធកម្មវិធី Zoom និងចូលរួមសម្អាតអនាម័យ ថែរក្សា និងបំពេញបន្ថែមបរិស្ថានសាលាសម្បូរបែប។
លោក វណ្ណៈ សោភានិត អភិបាលស្រុក បានថ្លែងអំណរគុណដល់ការិយាល័យអប់រំក្រុង ស្រុក នាយក នាយិកាសាលាទាំងអស់បានខិតខំប្រឹងប្រែងយកចិត្តទុកដាក់គោរព និងអនុវត្តតាមការណែនាំរបស់ក្រសួងអប់រំ យុវជន និងកីឡា និងក្រសួងសុខាភិបាល ពិសេសរដ្ឋបាលខេត្ត ជាមួយនឹងរដ្ឋបាលស្រុកប្រាសាទបល្ល័ង្ក ចំពោះការយកចិត្តទុកដាក់ចុះជួយបង្រៀន។
ជាការឆ្លើយតបនឹងការប្រយុទ្ធនឹងជំងឺCovid-19ការិយាល័យអប់រំក្រុង ស្រុក គណ:នាយក នាយិកា លោកគ្រូ អ្នកគ្រូ បានយកអស់កម្លាំងកាយចិត្តក្នុងការចូលរួមផ្សព្វផ្សាយទូលំទូលាយ និងការអនុវត្តដោយស្មារតីទទួលខុសត្រូវខ្ពស់ លើកទឹកចិត្តដល់មាតា-បិតា អាណាព្យាបាលបង្រៀន និងជំរុញឱ្យកូនចៅធ្វើស្វ័យសិក្សានៅផ្ទះ និងធ្វើអនាម័យជាប្រចាំតាមការណែនាំរបស់ក្រសួងសុខាភិបាល។
ក្នុងនោះ លោកអភិបាលស្រុក បានសំណូមពរដល់លោកនាយក នាយិកា គ្រូបច្ចេកទេស និងគ្រូទទួលបន្ទុកថ្នាក់ត្រូវជម្រុញសិស្សថ្នាក់ទី១២ ត្រូវចុះឈ្មោះរៀនតាមប្រព័ន្ធអនឡាញឱ្យបានគ្រប់ៗគ្នា។ និងត្រូវបានលើកទឹកចិត្តដល់លោកគ្រូ អ្នកគ្រូដែលបានជម្រុញសិស្សចុះឈ្មោះរៀនតាមប្រព័ន្ធអនឡាញរបស់ក្រសួងអប់រំ យុវជន និងកីឡា ៕
