ខេត្តកំពង់ធំ ៖ ដោយមានការខ្វះខាតថវិកា សាងសង់និងជួសជុល លោកនាយកវិទ្យាល័យទ្រៀល លោកតែគីមសៀន លោកនាយករង លោកគ្រូអ្នកគ្រូបានសំណូមពរដល់ប្រជាពលរដ្ឋមាតាបិតាសិស្សជិតខាង អាជីវកររួមទាំងអតីតសិស្សដែលធ្លាប់សិក្សានៅវិទ្យាល័យទ្រៀល បានបរិច្ចាគថវិការទៅតាមលទ្ធភាពដែលខ្លួនមាន ដើម្បីចូលរួមចំណែកកសាងដល់វិទ្យាល័យទ្រៀលក្នុងការចាក់ផ្លូវបេតុង របង និងរៀបចំសួនច្បារក្នុងការកែលំអនៅវិទ្យាល័យអោយមានសោភ័ណភាពល្អ បរិស្ថានស្អាត អនាម័យខ្ពស់និងសុខភាពដល់សិស្សានុសិស្ស ដែលស្ថិតនៅឃុំទ្រៀល ស្រុកតាំងគោក ខេត្តកំពង់ធំ។
ជាមួយគ្នានោះដែរ មន្ទីអប់រំយុវជននិងកីឡាខេត្តកំពង់ធំ លោកតាន់ ប៊ុនហុង បានផ្តល់ថវិការនិងដីចំនួនជាង1000ឡានអោយប្អូនៗសិស្សានុសិស្សបានប្រកួតនៅទីលានបាល់ទាត់ដែលពីមុនត្រូវបានទឹកលិចនៅរដូវវស្សា។
ដោយមានការយកចិត្តទុកដាក់ដល់សិស្ស លោកនាយកវិទ្យាល័យទ្រៀល លោក តែ គីមសៀន បានបញ្ជាក់ថាសិស្សសរុបនៅវិទ្យាល័យទ្រៀលចំនួន2088នាក់ ក្នុងនោះដែលអគារសិក្សាចំនួន2ខ្នង ចំនួន20បន្ទប់ មានការទ្រុតទ្រោមនិងផ្អាកការសិក្សាដល់សិស្សដោយខ្លាចបាក់រលំ ធ្វើអោយសាលាមានការខ្វះខាតបន្ទប់រៀន។លោកនាយកវិទ្យាល័យទ្រៀលរួមទាំងលោកគ្រូអ្នកគ្រូក៏ដូចជាសិស្សានុសិស្សសំណូមពរដល់ប្រមុខរាជរដ្ឋាភិបាលកម្ពុជាពិសេសសម្តេចតេជោហ៊ុនសែនជួយផ្តល់សាលារៀនដល់កូនចៅផង។ដោយ តេច ឆេង
