ខេត្តកំពង់ចាម ៖ ព្រៃលិចទឹកនៅតំបន់ខាងលិចភូមិរោទិ៍ ឃុំត្រប់ ស្រុកបាធាយ ខេត្តកំពង់ចាម នៅតាមបណ្តោយ ព្រែកកំពង់សរ កំពុងត្រូវបានជនមួយក្រុមឈូសឆាយយកដីធ្វើជាកម្មសិទ្ធផ្ទាល់ខ្លួន ចំណែកមន្ត្រីជលផលស្រុក បាធាយ រួមទាំងមេឃុំត្រប់ បិទភ្នែកសម្ងំស្ងៀមឈឹងទុកឱ្យក្រុមនោះធ្វើទាំងបំពានច្បាប់ ។
ប្រភពព័ត៌មានពីប្រជាពលរដ្ឋបានឱ្យដឹងថា ជនដែលរំលោភយកដីព្រៃលិចទឹកមានឈ្មោះ យ៉ាំ និងឈ្មោះ ញ៉ រស់នៅភូមិថ្មកែវ ឃុំត្រប់ ស្រុកបាធាយ ខេត្តកំពង់ចាម បានយកគ្រឿងចក្រចំនួន ២គ្រឿង មកឈូសឆាយព្រៃលិច ទឹកដែលជាជម្រកត្រីពងកូន ប្រព្រឹត្តល្មើសផ្ទុយនឹងច្បាប់របស់រាជរដ្ឋាភិបាលដែលហាមឃាត់ មិនឱ្យមានការទន្ទ្រាន យកដីព្រៃលិចទឹកជាដាច់ខាត ។
នៅថ្ងៃទី ០៦ ខែមីនា ឆ្នាំ២០១៣ អ្នកយកព័ត៌មានមួយក្រុម បានចុះទៅដល់កន្លែងដីព្រៃលិចទឹក មានគ្រឿងចក្រកំពុងឈូសឆាយយ៉ាងគឃ្លើនដែលគេស្គាល់ថា គ្រឿងចក្រខាងលើជារបស់ឈ្មោះ ជិន ជន មានតួនាទីជាក្រុមប្រឹក្សាឃុំត្រប់ ។ នៅពេលនោះដែរ គេសង្កេតឃើញលោក ង៉ោ ជោត មេឃុំត្រប់ ក៏មានវត្តមាន នៅកន្លែងដីឈូសឆាយនោះដែរ ហើយកំពុងតែវាស់វែងដី តែពុំដឹងថា ការវាស់វែងនេះ សម្រាប់សកម្មភាពអ្វីឡើយ ប៉ុន្តែប្រការដែលគួរឱ្យចាប់អារម្មណ៍ គឺលោកមេឃុំនៅទីកន្លែងដែលជនល្មើសកំពុងឈូសឆាយដីព្រៃលិចទឹក ហើយមិនបង្ក្រាបសង្ស័យតែត្រូវថ្នាំសណ្តំហើយទេដឹង ។
ប្រជាពលរដ្ឋសំណូមពរសុំឱ្យមេជលផលខេត្តកំពង់ចាម និងអភិបាលស្រុកបាធាយ ចុះមកទប់ស្កាត់ការរាន យកដីព្រៃលិចទឹកតំបន់នេះផង ព្រោះថា ខ្មោចស្រុកឱ្យដៃ ទើបខ្មោចព្រៃឡើងចាង បើរំពឹងទៅលើអាជ្ញាធរឃុំ និងជលផលបាធាយ ច្បាស់ជាព្រៃលិចទឹករលាយអស់ហើយ ៕
ដោយ ៖ ចេង ប៉ែត
