រាជធានីភ្នំពេញ ៖ សម្តេចព្រះសង្ឃនាយក នន្ទ ង៉ែត តម្រូវឲ្យភិក្ខុ ឡុង ចន្ថា ដែលជាសង្ឃល្បីល្បាញខាងធម្មទេសនាទាក់ទាញពុទ្ធបរិស័ទ ហើយបន្លែបន្លំពាក្យជេរប្រមាថ និងបង្កប់ន័យអាសុរសនោះ ចូលខ្លួនក្នុងសង្ឃសវនាការ ករណីសង្ស័យមានទំនាក់ទំនងជាមួយស្រីញីខុសទៅនឹងធម៌វិន័យរបស់សាសនាព្រះពុទ្ធនិងធ្វើឲ្យធ្លាក់ចុះតម្លៃព្រះសង្ឃ ។
ការនិមន្តភិក្ខុអង្គនេះចូលរួមក្នុងសង្ឃសវនាការនោះ ក៏ព្រោះតែសង្ស័យទាក់ទងនារីម្នាក់ដែលនាំឲ្យមានការរិះគន់យ៉ាងខ្លាំង ពីសំណាក់ប្រជាពលរដ្ឋ។
សូមជម្រាបថា សម្តេចព្រះសង្ឃនាយក នន្ទ ង៉ែត នាថ្ងៃចន្ទទី៤ ខែឧសភា នេះ បានប្រគេនលិខិតទៅព្រះសង្គ កែវ សាវ៉ន ព្រះមេគណខេត្តតាកែវ ឲ្យនិមន្តភិក្ខុ ឡុង ចន្ថា ចូលដោះស្រាយបញ្ហានៅសាលាគណខេត្តជាបន្ទាន់ ក្នុងករណីភិក្ខុអង្គនេះ មិនព្រមចូលក្នុងសង្ឃសវនាការ សាលាគណខេត្ត ត្រូវសហការជាមួយអាជ្ញាធរដោយអនុវត្តវិធានការរដ្ឋបាល។
គួបញ្ជាក់ថា ភិក្ខុ ឡុង ចន្ថា គង់នៅវត្តភ្នំបូរី ឃុំព្រែកថ្កោល ស្រុកអង្គរបូរី ខេត្តតាកែវ កំពុងល្បីល្បាញពេញបណ្តាញសង្គមហ្វេសប៊ុក តាមរយៈសំឡេងបែកធ្លាយមួយ ដែលត្រូវបានអះអាងថា ព្រះអង្គមានទំនាក់ទំនងជាមួយស្ត្រីភេទ។ ភក្ខុអង្គនេះត្រូវបានតម្រូវឲ្យចូលដោះស្រាយនៅសាលាគណខេត្តតាកែវ ក្នុងវត្តតុំ ក្រុងដូនកែវ ខេត្តតាកែវ ៕
