រាជធានីភ្នំពេញ ៖ ក្នុងឱកាស «ទិវាសេរីភាពសារព័ត៌មានសកលលោក» លើកទី២៧ នាថ្ងៃទី០៣ ខែឧសភា ឆ្នាំ២០២០ ខាងមុខនេះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានផ្ញើសារលិខិតរំលឹកសាជាថ្មីម្ដងទៀត ដល់អ្នកសារព័ត៌មាន ដែលកំពុងបំពេញការងារលើវិស័យសារព័ត៌មាន នៅក្នុងប្រទេសកម្ពុជា នូវពាក្យស្លោក «កុំបំពានសិទ្ធិអ្នកដទៃ កុំបំភ្លៃការពិត»។
សម្ដេចតេជោ ហ៊ុន សែន បានរំលឹកថា អ្នកសារព័ត៌មានត្រូវជៀសវាង ការផ្សាយព័ត៌មានមិនពិត ព័ត៌មានក្លែងបន្លំ ដែលបង្ក ឲ្យមានភាពចលាចល នៅក្នុងសង្គម ការញុះញង់ ការជេរប្រមាថបង្កឲ្យមានការគុំកួន រើសអើង និងអរិភាពនៅក្នុងសង្គម ដែលមិនអាចអត់ឱនឲ្យបានឡើយ។
សម្ដេចតេជោ ហ៊ុន សែន បានលើកឡើងថា រាជរដ្ឋាភិបាលកម្ពុជា គាំទ្រនិងលើកកម្ពស់សិទ្ធិ សេរីភាពនៃការបញ្ចេញមតិ និងសេរីភាពខាងសារព័ត៌មាន ដែលត្រូវធានាដោយរដ្ឋធម្មនុញ្ញ នៃព្រះរាជាណាចក្រកម្ពុជា និងច្បាប់ស្ដីពីរបបសារព័ត៌មាន ដែលធានានូវឯករាជ្យភាព នៃការផ្សាយព័ត៌មានដោយគ្មានការត្រួតពិនិត្យជាមុន សិទ្ធិនៃការរក្សាការសម្ងាត់ ស្ដីពីប្រភពព័ត៌មានរបស់ខ្លួន។
សម្ដេចតេជោក៏បានគូសបញ្ជាក់ថា រាជរដ្ឋាភិបាលកម្ពុជា ពិតជាត្រូវការស្ថាប័នសារព័ត៌មាន ដែលមានថាមពល ប្រកបដោយការទទួលខុសត្រូវ និងមានភាពស្មោះត្រង់ចំពោះវិជ្ជាជីវៈ ក្នុងការផ្សព្វផ្សាយព័ត៌មាន។
គូសបញ្ជាក់ថា ទិវា «សេរីភាពសារព័ត៌មានសកលលោក» លើកទី២៧នាឆ្នាំនេះ គឺបានប្រារព្ធធ្វើឡើងក្នុងកាលៈទេសៈ ដែលសកលលោកទាំងមូល កំពុងទទួលរងនូវសោកនាដកម្ម នៃការរាតត្បាតជំងឺឆ្លងជាសកលបង្កឡើងដោយវីរុសកូវីដ-១៩ ៕
