ខេត្តបន្ទាយមានជ័យ ៖ ពលករខ្មែរប្រុស ស្រីចំនួន៤៦នាក់ ត្រូវបានយោធាឈុតខ្មៅថៃនៅប៉ុស្តិ៍៤ ចាប់បានហើយកំពុងទំនាក់ទំនងសមត្ថកិច្ចខ្មែរ ដើម្បីបញ្ជូនមកស្រុកខ្មែរវិញ ដោយសាមេខ្យល់នាំពួកគាត់ចូលក្នុងទឹកដីថៃដោយខុសច្បាប់ តាមច្រករបៀងចំណុចកែងអូរល្វាជាប់ព្រំប្រទល់ស្រុកសំពៅលូន ក្នុងគោលបំណងស្វែងរកការងារ ត្រូវបានគេប្រទះឃើញនៅថ្ងៃទី២៩ ខែមេសា ឆ្នាំ២០២០ វេលាម៉ោង៥ព្រឹក ច្រករបៀង ស្ថិតក្នុងភូមិបឹងបេង ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
ពលករខ្មែរទាំងនោះបានឱ្យដឹងថា ពួកគាត់បានបង់លុយឲ្យមេខ្យល់ក្នុង១នាក់ចំនួន២.៥០០បាត ជាថ្លៃឈ្នួលនាំចូលទៅបាងកក ប្រទេសថៃ ដើម្បីស្វែងរកការងារធ្វើ ស្របពេលដែលប្រទេសថៃកំពុងធ្វើការរឹតបន្តឹងយ៉ាងខ្លាំងធ្វើការទប់ស្កាត់ជម្ងឺមេរោគកូវីដ១៩ ដែលកំពុងឆ្លងពីមនុស្សម្នាក់ទៅមនុស្សម្នាក់យ៉ាងទាន់ហន់នៅលើពិភពលោក។
ពលករទាំងអស់បានបញ្ជាក់ឲ្យដឹងទៀតថា មេខ្យល់ក្រោយពីប្រមូលលុយបានហើយ ក៏រត់គេចបាត់ទុកពលករខ្មែរវង្វេងនៅក្នុងព្រៃដាច់បាយទឹកក្នុងទឹកដីថៃ រហូតដល់ម៉ោងនេះ ពលករទាំង៤៦នាក់ ត្រូវបានទាហានឈុតខ្មៅថៃឃាត់ខ្លួនហើយបានរៀបចំឯកសារបញ្ជូនឲ្យអាជ្ញាធរខ្មែរ ដើម្បីយកមកប្រទេសកម្ពុជាវិញ។
សមត្ថកិចខ្មែរសង្ឃឹមថាបងប្អូនពលករខ្មែរទាំងអស់ដែលសមត្ថកិច្ចថៃ បញ្ជូនមកស្រុកខ្មែរវិញដោយសុវត្តិភាពហើយឈប់ចាញ់បោកមេខ្យល់បន្តទៀត ព្រោះថាសព្វថ្ងៃនេះ ប្រទេសថៃនៅទីក្រុងបាងកក កំពុងតែមានការរឹតបន្តឹងផ្នែកការរីករាលដាលនៅមេរោគកូវីដ១៩ យ៉ាងខ្លាំង រដ្ឋាភិបាលថៃមិនទាន់ឲ្យចរាចរណ៍ដំណើរការឡើងវិញទេ បើទោះបីពលករទាំងអស់ទៅដល់ទីក្រុងបាងកកក៏រកការងារមិនបានដែរ៕
