រាជធានីភ្នំពេញ ៖ នៅវេលាម៉ោង៨.៣០នាទីព្រឹកថ្ងៃទី២៥ ខែមេសា ឆ្នាំ២០២០ អាណាព្យាបាលសិស្សដែលមានកូនកំពុងសិក្សារៀនសូត្រនៅសាលាអន្តរជាតិ ស៊ី អាយ អេ ហ្វឺស ( CIA First International School) ស្ថិតនៅអាគារលេខ១០៧ ផ្លូវ២០០៤ សង្កាត់ទឹកថ្លា ខណ្ឌសែនសុខ រាជធានីភ្នំពេញ បានធ្វើការជួបជុំគ្នាប្រមាណ៣៧១នាក់ជាលើកទី២ នៅមុខសាលា នោះដើម្បីទាមទារអោយលោកនាយក និងគណៈគ្រប់គ្រងសាលាអន្តរជាតិ ស៊ី អាយ អេ ហ្វឺស បញ្ចុះតម្លៃនៃការសិក្សាពីចម្ងាយឬតាម Online ។
ការជួបជុំធ្វើការតវ៉ាលើកទី២របស់អាណាព្យាបាលសិស្ស ផ្តោតទៅលើចំនុច៣សំខាន់ៗស្របពេលដែលស្ថានភាពនៃការរីករាលដាលនូវជម្ងឺឆ្លងកូវីដ១៩ (Covid-19) ៖
១ បញ្ចុះតម្លៃសិក្សា៥០% ចាប់ពីខែមេសា ឆ្នាំ២០២០ តទៅ និងរហូតដល់មានការប្រកាសកាលវិភាគសិក្សាថ្មីពី
ក្រសួងអប់រំ យុវជន និងកីឡា ចំពោះសិស្សចាប់ពីថ្នាក់ទី១ រហូតដល់ថ្នាក់ទី១២ (ទាំងអ្នកបង់ប្រាក់ប្រចាំខែ ត្រីមាស
ឬបង់ប្រចាំឆ្នាំ)។
២ ផ្អាក់ជាបណ្តោះអាសន្នការសិក្សារបស់សិស្សថ្នាក់មតេយ្យគ្រប់កម្រិតពី K3-K5 (ក្មេងអាយុ៣ឆ្នាំដល់៥ឆ្នាំ) ដោយមិនគិត
ថ្លៃសិក្សាឬតម្រូវអោយបង់ប្រាក់ (ទាំងអ្នកបង់ប្រាក់ប្រចាំខែ ត្រីមាស ឬបង់ប្រចាំឆ្នាំ) ចាប់ពីខែមេសា ឆ្នាំ២០២០ នេះតទៅ
រហូតដល់មានការប្រកាសរបស់ក្រសួងអប់រំ។
៣ ផ្អាក់ការសិក្សាគ្រប់កម្រិតជាបណ្តោះអាសន្ន (ទោះបីជាតាមអនឡាញ) ប្រសិនបើមានការប្រកាសដាក់ប្រទេសក្នុងស្ថាន
ភាពអាសន្ន ដោយមិនតម្រូវអោយបង់ថ្លៃសិក្សា (ទាំងអ្នកបង់ប្រាក់ប្រចាំខែ ត្រីមាស ឬបង់ប្រចាំឆ្នាំ) រហូតដល់មានការប្រ
កាសរបស់រាជរដ្ឋាភិបាល។
តំណាំងអាណាព្យាបាលសិស្សបានថ្លែងប្រាប់អ្នកសារព័ត៍មានថា នៅថ្ងៃទី២៤ ខែមេសា ឆ្នាំ២០២០ ចាប់ពីម៉ោង២រសៀល តទៅដោយមានការយកចិត្តទុកដាក់ខ្ពស់ អន្តរាគមន៏ និងមនោសញ្ជេតនាស្រឡាញ់ពីសំណាក់ ឯកឧត្តបណ្ឌិតសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា អនុញ្ញាតិអោយតំណាងអាណាព្យាបាលសិស្ស និងតំណាងសាលាអន្តរជាតិ ស៊ី អាយ អេ ហ្វឺស បានជួបប្រជុំរកដំណោះស្រាយរួមមួយ។ ដោយឡែកជាលទ្ធផលភាគីខាងសាលាបានបញ្ចុះតម្លៃត្រឹម១៥% និងមានការចូលរួមស្នើសុំបន្ថែមពីសំណាក់ឯកឧត្តមរដ្ឋមន្រ្តីបាន៥%បន្ថែមទៀត សរុបរួមគឺបានត្រឹមតែ២០% ចំពោះឪពុកម្តាយ និងអាណាព្យាបាលសិស្យមិនអាចទទួលយកបាន ដោយពួកគាត់លើកយកបញ្ហាប្រឈមផ្សេងៗដូចជា វិបត្តិសេដ្ឋកិច្ចក្នុងគ្រួសារ ចំណាយធនធានបន្ថែមលើសម្ភារៈសិក្សារបស់កូន ចំណាយពេលវេលាសិក្សាជាមួយកូនជាពិសេសកូនតូចៗដែលសិក្សាកំរិតមតេយ្យចាប់ពីK3-K5។
នៅក្នុងការជួបប្រជុំតវ៉ានៅព្រឹកថ្ងៃទី២៥ ខែមេសា ឆ្នាំ២០២០ ជាលើកទី២នេះ និងដោយមានការចាប់អារម្មណ៏ខ្ពស់ពីសំណាក់ឯកឧត្តមរដ្ឋមន្ត្រី តំណាងឪពុកម្តាយ និងអាណាព្យាបាលសិស្សបានឯកភាពគ្នាស្នើសុំបញ្ចុះតម្លៃពី៥០% មក៤៥% វិញ ហើយសំណើថ្មីនេះនឹងដាក់សុំអន្តរាគមន៏នៅថ្ងៃច័ន្ទ ទី២៧ ខែមេសា ឆ្នាំ២០២០ ជូនឯកឧត្តមរដ្ឋមន្ត្រី អោយកោះហៅភាគីខាងសាលាបានជួបប្រជុំជាថ្មី នៅថ្ងៃពុធ ឫព្រហស្បត្តិ៍ កាន់តែឆាប់កាន់តែល្អ។
ទន្ទឹមនឹងការស្មើសុំចុងក្រោយនេះ តំណាងឪពុកម្តាយ និងអាណាព្យាបាលសិស្យបានព្រមានថា ៖ បើការស្នើសុំបញ្ជុះតម្លៃ៤៥% សិក្សាពីចម្ងាយ ឫតាមអនឡាញ ពីសាលាអន្តរជាតិ ស៊ី អាយ អេ ហ្វឺស បាននោះទេ ពួកគាត់នឹងស្នើសុំដល់សាលា ធ្វើលិខិតបញ្ជាក់ការសិក្សាជូនកូនរបស់ពួកគាត់។
ទោះបីមានការលើកឡើងតវ៉ាពីសំណាក់ឪពុកម្តាយ និងអាណាព្យាបាលសិស្ស នៅមុខសាលាអន្តរជាតិ ស៊ី អាយ អេ ហឺ្វស (CIA FIRST INTERNATIONAL SCHOOL ) អោយសាលាជួយបញ្ចុះតម្លៃត្រឹម៤៥%(សែសិបប្រាំភាគរយ) យ៉ាងណាក៏ មិនអាចសុំការបកស្រាយពីភាគីសាលាអន្តរជាតិ ស៊ី អាយ អេ ហឺ្វស បានឡើយនៅរសៀលថ្ងៃទី២៥ ខែមេសា ឆ្នាំ២០២០ នេះ៕
