ខេត្តស្ទឹងត្រែង ៖ នៅវេលាម៉ោងប្រមាណជាង៨ព្រឹក ថ្ងៃទី២៤ ខែមេសា ឆ្នាំ២០២០ ស្ថិតនៅក្នុងភូមិស្រឡៅ ឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង សមត្ថកិច្ចខេត្តស្ទឹងត្រែងបានចាប់ឃាត់ខ្លួន ឧត្តមសេនីយ៍យោធាផ្កាយ២ម្នាក់ ដែលសង្ស័យធ្វើសកម្មភាពឈូសឆាយដីព្រៃបំរុងទុកអចិន្ត្រៃយ៍របស់រដ្ឋ និងដកហូតគ្រឿងចក្របាន៣គ្រឿង។ ខណៈនេះ ឧត្តមសេនីយ៍ផ្កាយ២យោធា ត្រូវបាននាំខ្លួនមកសាកសួរ នៅស្នងការដ្ឋាននគរបាលខេត្តស្ទឹងត្រែង។
ពាក់ព័ន្ធនឹងប្រតិបត្តិការចុះបង្ក្រាប ករណីឈូសឆាយដីព្រៃខុសច្បាប់នោះទៀត កាលពីថ្ងៃទី២២ ខែមេសា ឆ្នាំ២០២០ កម្លាំងសមត្ថកិច្ចចម្រុះខេត្តស្ទឹងត្រែង ក៏បានចុះឃាត់គ្រឿងចក្រ១គ្រឿង និងឃាត់ខ្លួនមនុស្ស៣នាក់ផងដែរ សង្ស័យធ្វើសកម្មភាពបញ្ជាគ្រឿងចក្រឈូសឆាយដីព្រៃរដ្ឋ នៅដុងក្រឡ ស្ថិតក្នុងភូមិសាស្ត្រ ក្រុងស្ទឹងត្រែង។ រីឯ ការឈូសឆាយដីព្រៃនោះទៀត គេបានដាក់ការសង្ស័យថា អាចមានអ្នកធំម្នាក់ក្នុងខេត្តស្ទឹងត្រែងនៅពីក្រោយខ្នង នៃការឈូសឆាយដីព្រៃរដ្ឋនៅឯដុងក្រឡនោះ។
គេនៅមិនទាន់ដឹងថា តើសមត្ថកិច្ចនឹងមានចំណាត់ការបន្តលើសំណុំរឿងឈូសឆាយដីព្រៃរដ្ឋទាំងពីរទីតាំងនោះយ៉ាងណាទេ? ហើយជនសង្ស័យ ប្រព្រឹត្តអំពើល្មើសច្បាប់រដ្ឋនោះ អាចរួចពីសំណាញ់ច្បាប់ ដែរឬយ៉ាងណា? ។
គេសង្កេតឃើញថា ការទន្រ្ទានដីរដ្ឋហាក់កំរើកឡើងវិញ ក្នុងពេលដែលរាជរដ្ឋាភិបាល និងអាជ្ញាធរកំពុងជាប់ដៃប្រឆាំងមេរោគកូវីដ១៩ តែទោះបីយ៉ាងណា ក៏ពួករំលោភយកដីរដ្ឋមិនអាចរួចពីសំណាញ់ច្បាប់បានដែរ៕
