ខេត្តកោះកុង ៖ កាលពីថ្ងៃទី២៤ ខែមេសា ឆ្នាំ២០២០ វេលាម៉ោង១១ព្រឹក កម្លាំងកងរាជអាវុធហត្ថរាជធានីភ្នំពេញ ដឹកនាំដោយលោកវរសេនីយ៍ទោ ម៉ាំង សុខលុច នាយការិយាល័យ ព្រហ្មទណ្ឌរាជធានីភ្នំពេញ និងមានកម្លាំងសមត្ថកិច្ចចំនួន១០នាក់ បានទទួលដីការបង្គាប់ពីលោក សេង ហៀង ព្រះរាជអាជ្ញារងសាលាដំបូងរាជធានីភ្នំពេញ តាមដីកាលេខ(១១៤) អយន ចុះថ្ងៃទី២៣ ខែមេសា ឆ្នាំ២០២០ បានបង្គាប់អោយនាំខ្លួនឈ្មោះ រស់ សូនី ហៅអានី ភេទប្រុស អាយុ៤៨ឆ្នាំ មានទីលំនៅបច្ចុប្បន្ន បុរីសម្បត្តិមាស ផ្ទះលេខT14 ក្រុមទី១ ភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ អោយនាំខ្លួនពីបទហឹង្សាដោយចេតនាមានស្ថានទម្ងន់ទោសនៅរាជធានីភ្នំពេញ។
ជនសង្ស័យឈ្មាះ រស់ សូនី ហៅអានី នេះនៅពេលធ្វើសកម្មភាពនៅរាជធានីភ្នំពេញរួចហើយ ក៍គេចខ្លួនមកទឹកដីស្រុកស្រែអំបិល នាខេត្តកោះកុង ដែលជាទីតាំងស្រុកកំណើតរបស់ខ្លួន មកលាក់ខ្លួនពួនអាត្មា តែកម្មពៀរមកដល់ត្រូវបានសមត្ថកិច្ចតាមទាន់ ជាន់កែងជាប់។ ទីតាំងដែលជនសង្ស័យមកលាក់ខ្លួននោះ នៅចំណុចផ្ទះជួលមួយកន្លែង ដែលមិនមានដាក់ឈ្មោះ ទីតាំងនេះស្ថិតនៅក្នុងភូមិត្រពាំង ឃុំស្រែអំបិល ស្រុកស្រែអំបិល ខេត្តកោះកុង។
លោក វរសេនីយ៍ទោ ម៉ាំង សុខលុច នាយការិយាល័យព្រហ្មទណ្ឌរាជធានីភ្នំពេញ បានតាមប្រម៉ាញ់ជនសង្ស័យយ៉ាងស្អឹតបំផុត តាមមកដល់ទីតាំង នៅក្នុងស្រុកស្រែអំបិល ហើយសហការជាមួយកម្លាំងសមត្ថកិច្ចអាវុធហត្ថស្រុកស្រែអំបិល បានធ្វើការឆេកឆេរផ្ទះសំណាក់នេះ ហើយបានឃាត់ខ្លួនជនសង្ស័យនេះតែម្តង ។ នៅក្នុងការឃាត់ខ្លួនឈ្មោះ រស់ សូនី ហៅអានីនេះ បានរកឃើញសារធាតុញៀនជាច្រើនបន្ថែមទៀត។
នៅក្នុងការឃាត់ខ្លួននេះ បានរកឃើញមុខសញ្ញាជនសង្ស័យម្នាក់ទៀតឈ្មោះ នូ ធារា ហៅទិត្យ ផងដែរ។
សមត្ថកិច្ចបានរកឃើញ (១)ម្សៅក្រាមពណ៌ស ៨ កញ្ចប់ធំ និង ៣ កញ្ចប់តូច។
(២)រកឃើញអាវុធខ្លីមួយដើមម៉ាកcz75ពណ៌ខ្មៅ មានលេខ A182062 មានបង់០១ គ្រាប់កាំភ្លើងខ្លី០៥គ្រាប់។
(៣)រថយន្ត១គ្រឿងម៉ាកធុនរ៉ា ពណ៌ខ្មៅ ពាក់ស្លាកលេខ ព្រះសីហនុ 2A8057 ហើយរថយន្តនេះមានតែស្លាកលេខខាងក្រោយទេ លេខខាងមុខអត់មាន និងម៉ូតូមួយគ្រឿងទៀត ម៉ាកយ៉ាម៉ាហា ពណ៌ខ្មៅ ពាក់ស្លាកលេខ 1GV1816 រួមមានទូរស័ព្ទដៃ និងសម្ភារៈសម្រាប់ប្រើប្រាស់គ្រឿងញៀនជាច្រើនទៀត។
ជនសង្ស័យទាំងពីរនាក់ ត្រូវបានសមត្ថកិច្ចកងរាជវុធហត្ថរាជធានីភ្នំពេញ ដឹកនាំដោយលោកវរសេនីយ៍ទោ ម៉ាំង សុខលុច នាយការិយាល័យព្រហ្មទណ្ឌ បាននាំខ្លួនជនសង្ស័យទៅភ្នំពេញ និងកសាងសំណុំរឿងបញ្ជូនជនសង្ស័យទៅតុលាការ ចាត់វិធានការតាមផ្លូវច្បាប់៕
ដោយ ៖ យួន ឈីវ និង គង់ វុទ្ធី
