ឯកឧត្តម គឹម ឆៃ ហៀង អភិបាលរងខេត្ត បានដឹកនាំ មន្ត្រី នៃមន្ទីរជំនាញ បរិស្ថាន កសិកម្ម និងរួមសហការគ្នាជាមួយតំណាងព្រះរាជអាជ្ញា អមសាលាដំបូង ខេត្តសៀមរាប ចុះពិនិត្យ ដល់កន្លែងស្តុកទុក នូវកាកសំណល់ជាកន្ទុយបារីនៅចំណុចជិត វត្តត្រាំនាគស្ថិតក្នុង ភូមិចុងកៅស៊ូ សង្កាត់ស្លរក្រាមក្រុងសៀមរាប ។
កាក សំណល់ជាកន្ទុយ បារីទាំងនោះត្រូវបានគេស្គាល់ ជារបស់ ក្រុមហ៊ុន ប៉ែន លឹម ត្រេឌីង ដែលសព្វថ្ងៃឈរជើងនៅខេត្តត្បូងឃ្មុំ បានជួលរថយន្តដឹកកាកសំណល់កន្ទុយបារីចំនួន៣០តោន ដើម្បីទម្លាក់ចោលពីរទីតាំងផ្សេងគ្នា នៅស្រុកអន្លង់វែងខេត្តឧត្តរមានជ័យ២០តោននិងខេត្តសៀមរាប១០តោនផងដែរ។
ប្រភពព័ត៌មានពីប្រជាពលរដ្ឋរស់នៅជិតកន្លែងស្តុកសំណល់បានរៀបរាប់ថា ចាប់តាំងពីពេលកាកសំណល់កន្ទុយបារីត្រូវរថយន្តដឹកទម្លាក់ចោលទីនេះពួកគាត់មិនដឹងជាអ្វីនោះទេ ព្រោះថាភ្លាមៗមិនធុំក្លិនឡើយ ប៉ុន្តែក្រោយពីទម្លាក់រយៈពេលយូទៅ ពីមួយថ្ងៃទៅមួយថ្ងៃ ក្លិនស្អុយកាន់តែខ្លាំងឡើងៗជាបន្ត ស្ទើរដាច់ដង្ហើមម្តងៗ រហូតពួកគាត់ទ្រាំមិនបាន ក៍ទៅប្តឹងអាជ្ញាធរបន្តទៅជំនាញ ដើម្បីឲ្យពួកគាត់ជួយពិនិត្យមើល តើជាវត្ថុអ្វី ។ ក្រោយពីមន្ត្រីជំនាញចម្រុះបានចុះត្រួតពិនិត្យ កាកសំណល់ដែលមិនមែនជា ជីធម្មជាតិ រួចរាល់មកនោះ ឯកឧត្តម គឹម ឆៃហៀង អភិបាលរងខេត្តសៀមរាប បានឲ្យដឹងថា វាពុំមែនជាជីធម្មជាតិ អ្វីទាំងអស់ គ្រាន់តែជាកាកសំណល់កន្ទុយបារី ប៉ុណ្ណោះ ។ លោកបន្តថា ពេលនេះ មន្ទីរជំនាញចម្រុះ កំពុងយកសំណល់ទាំងនោះទៅពិនិត្យមើលបន្តទៀត តើវាមានជាតិអ្វីខ្លះ ហើយប៉ះពាល់សុខភាពមនុស្សក្នុងកំរិតណាទៀតផង។
ឯកឧត្តមបានបញ្ជាក់ថា ការពិនិត្យក្នុងជំហ៊ានដំបូង ត្រឹមតែក្លិន គឺវាបានប៉ះពាល់សុខភាពយ៉ងធ្ងន់ធ្ងររួចទៅហើយ ម្លោះហើយបើពិនិត្យឃើញ មានជាតិអ្វីផ្សេងដែលប៉ះពាល់សុខភាពប្រជាពលរដ្ឋ ធ្ងន់ធ្ងរនោះ អាជ្ញាធរ មានវិធានការបន្តទៀត ។
តាមការរៀបរាប់របស់ លោក ប៊ុន សែន ស៊ុន ជាម្ចាស់រថយន្តដឹកជញ្ជូនកាកសំណល់កន្ទុយបារី បានឲ្យដឹងថាកាលពីថ្ងៃទី២៥ ខែធ្នូ ឆ្នាំ២០១៤ កន្លងទៅ ក្រុមហ៊ុនខាងលើបានជួលរថយន្តគាត់ឲ្យដឹកកាកសំណល់កន្ទុយបារី៣០តោននេះ ពីឃ្លាំងមួយក្នុងខេត្តត្បូងឃ្មុំ មកដាក់ក្នុងឃ្លាំងមួយទៀតនៅតំបន់ព្រៃស្អាកស្រុកអន្លង់វែង២០តោន ហើយយកមកសៀមរាប១០តោនផងដែរ ដោយក្រុមហ៊ុនឈ្មោះ ប៉ែន លឹម ត្រេឌីង អះអាងថាជាជីធម្មជាតិ លុះមកដល់ខេត្តសៀមរាបនាពេលយប់ ក្រុមហ៊ុនមួយនេះបានឲ្យរូបគាត់រកកន្លែងផ្ញើសិន ដោយស្ថានភាពនៅពេលយប់ ក៏សុំផ្ញើផ្ទះកើតហេតុដែលក្រុមហ៊ុន ប៉ែន លឹម បានហាមឃាត់មិនឲ្យរូបគាត់ផ្ញើរនោះ ។
ឯកឧត្តម គឹម ឆៃ ហៀង បានបញ្ចាក់បន្ថែមថា រហូតមកដល់ពេលនេះ មន្ត្រីជំនាញចម្រុះកំពុងធ្វើការស្រាវជ្រាវ បើសិនជាមានការប៉ះពាល់សុខភាពប្រជាពលរដ្ឋខ្លាំងក្លាដោយប្រការណាមួយ ច្បាប់ និងដាក់ទោសចំពោះក្រុមហ៊ុនមួយនេះទៅតាមផ្លូវច្បាប់របស់រដ្ឋ ៕
ប៊ុន ធឿន (សៀមរាប )
