រាជធានីភ្នំពេញ ៖ នៅក្នុងសន្និសិទសារព័ត៌មានរបស់ក្រសួងសុខាភិបាល កាលពីព្រឹកថ្ងៃច័ន្ទនេះ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានថ្លែងឲ្យដឹងថា ស្ថានភាព COVID-19 នៅកម្ពុជានៅមានសភាពផុយស្រួយនៅឡើយ បើទោះបីជារយៈពេល ប៉ុន្មានថ្ងៃជាប់ៗគ្នានេះ យើងរកមិនឃើញមានករណីឆ្លង COVID-19 ថ្មី ។
លោកស្រីអ្នកនាំពាក្យបានព្រមានថា ប្រសិនបើយើងទាំងអស់គ្នាភ្លេចខ្លួននោះយើងនឹងរងនូវ ការវាយលុក COVID-19 មិនខានព្រោះថា នៅបណ្តាប្រទេសមួយចំនួនកំពុងតែរងការវាយ លុកជំងឺ COVID-19 នោះនៅឡើយ ។ទន្ទឹមនោះក៏មានប្រទេសមួយចំនួនដែលស្ថានភាព COVID-19 ស្ងប់ស្ងាត់មួយរយៈទៅហើយ តែបែរជាផ្ទុះឡើងវិញ ។
ដូច្នេះលោកស្រីអំពាវនាវដល់ប្រជាពលរដ្ឋទាំងអស់សូមមេត្តាកុំភ្លេចខ្លួនឲ្យសោះ ហើយត្រូវបន្ត ឲ្យបានខ្ជាប់ខ្ជួននូវការការពារនិងការរក្សាអនាម័យសម្រាប់ម្នាក់ៗ រួមទាំងការអនុវត្តឲ្យបានត្រឹមត្រូវតាមការណែនាំរបស់ក្រសួងសុខាភិបាលរួមទាំងរាជរដ្ឋាភិបាលកម្ពុជា ។
គួរជម្រាបថា នៅថ្ងៃទី២០ ខែមេសា ឆ្នាំ២០២០នេះ ក្រសួងសុខាភិបាល បានប្រកាសដំណឹងល្អដល់ប្រជាពលរដ្ឋបន្តទៀតថា អ្នកជំងឺកូវីដ១៩ ចំនួន២នាក់ទៀត បានជាសះស្បើយ ធ្វើឱ្យចំនួនអ្នកជាសះស្បើយកើនឡើងរហូតដល់ ១០៧នាក់ ហើយពុំមានករណីអ្នកឆ្លងជំងឺកូវីដថ្មីទេ។ ចំណែកអ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួន១៥នាក់ នៃអ្នកឆ្លងសរុប១២២នាក់៕
