ខេត្តកំពង់ធំ ៖ ថ្ងៃទី១៥ ខែមេសា ឆ្នាំ២០២០ លោក សុខ លូ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំ និងលោកជំទាវ អញ្ជើញចូលរួមពីអភិបាលក្រុង ស្រុក លោកមេភូមិ មេឃុំ និងសហការី នាំយកអំណោយមនុស្សធម៌ ពីសាខាកាកបាទក្រហមកម្ពុជា ខេត្តកំពង់ធំ ចែកជូនដល់ប្រជាពលរដ្ឋខ្វះខាត ជនចាស់ជរា ជួបការលំបាក ចំនួន៣៩គ្រួសារ ក្នុងភូមិដំរីជាន់ខ្លា ក្រុងស្ទឹងសែន ភូមិត្រពាំងសិលា ភូមិវាលវែង និងភូមិប្រាសាទ ស្រុកប្រាសាទសំបូរ ក្នុងខេត្តកំពង់ធំ ។
លោក សុខ លូ អំពាវនាវសូមអោយប្រជាពលរដ្ឋទាំងអស់ ចូលរួមរក្សាអនាម័យខ្លួនឯងជានិច្ច ត្រូវលាងដៃនឹងសាប៊ូឱ្យបានស្អាត និងផ្សព្វផ្សាយអំពីជំងឺកូវិដ១៩ ជូនបងប្អូនប្រជាពលរដ្ឋទាំងអស់ចូលរួមបង្ការនិងទប់ស្កាត់ការរីករាលដាលជំងឺឆ្លងកូវិដ១៩។លោកបានបន្តថា អំណោយទាំងអស់នេះ អាចជួយសម្រួលការខ្វះខាតរបស់បងប្អូនបានរយ:ពេលខ្លី ប្រសិនបើមានការខ្វះខាត ឬមានបញ្ហាផ្សេងៗត្រូវផ្តល់ដំណឹងមកមេឃុំ ឬសមា ជិកភូមិ ឃុំ ដើម្បីយើងមានវិធានការឆ្លើយតបបានទាន់ពេលវេលា ដោយមិនទុកឱ្យប្រជាពល រដ្ឋយើងណាម្នាក់ស្លាប់ដោយអត់អាហារនោះទេ ម្យ៉ាងទៀត ការនាំយកអំណោយចែកជូនចាស់ជរាទីទ័លក្រ ប្រជាពលរដ្ឋមានជីវភាពខ្វះខាតនាពេលនេះ ដោយមិនប្រកាន់ វណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីនោះឡើយ គឺយើងជួយពួកគាត់ក្នុងនាមមនុស្សធម៌ និងជាវប្បធម៌នៃការចែករំលែក បានទាន់ពេលវេលាមិនទុកឱ្យពួកគាត់ខ្វះខាតដាច់ស្បៀងឡើយ។
ឆ្លៀតក្នុងឱកាសនោះ លោក សុខ លូ បានពាំនាំនូវការផ្ដាំផ្ញើការសួរសុខទុក្ខពីចម្ងាយរបស់ សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា តែងតែយកចិត្តទុកដាក់អំពីសុខទុក្ខរបស់ ប្រជាពលរដ្ឋ នៅទូទាំងប្រទេស ដោយមិនទុកឱ្យប្រជាពលរដ្ឋរបស់យើងណាម្នាក់អត់ស្បៀងស្លាប់នោះទេ គឺត្រូវធ្វើយ៉ាងណាជួយប្រជាពលរដ្ឋឱ្យទាន់ពេលវេលា។
ជាចុងក្រោយលោក សុខ លូ ក៏បានចែកអំណោយជូនប្រជាពលរដ្ឋមានជីវភាពខ្វះខាត ជនចាស់ជរា ជួបការលំបាក ចំនួន៣៩គ្រួសារ នៅក្នុងមួយគ្រួសារទទួលបាន អង្ករ ២៥ គីឡូ មុង១ ភួយ១ សារុង១ ក្រម៉ា១ ត្រីខ១យួរ មី១កេស និងសាប៊ូ១ដុំ៕
