ខេត្តសៀមរាប ៖ បុរសម្នាក់ដែលបង្ហោះសារ តាមបណ្ដាញសង្គម ដោយមានខ្លឹមសារគំរាមសម្លាប់ថ្នាក់ដឹកនាំ និងញុះញង់ឲ្យមានការរើសអើង ព្រមទាំងជេរប្រមាថអង្គព្រះមហាក្សត្រ ត្រូវបានកម្លាំងស្នងការដ្ឋាននគរបាលខេត្តសៀមរាប បានចាប់វ៉ៃខ្នោះ ។ ជនសង្ស័យដែលត្រូវចាប់ខ្លួនឈ្មោះ អាត់ អេង ឬ សេន អាត អាយុ៣៦ឆ្នាំ មុខរបរជាងភ្លើង និងម៉ាស៊ីនត្រជាក់ មានទីលំនៅភូមិទួល ឃុំទឹកល្អក់ ស្រុកព្រៃនប់ខេត្តព្រះសីហនុ ។
មន្ត្រីនគរបាលបានឲ្យដឹងថា ជនសង្ស័យខាងលើនេះបានធ្វើសកម្មភាព និងបង្ហោះរូបភាពតាមបណ្ដាញសង្គម គំរាមសម្លាប់ថ្នាក់ដឹកនាំ ញុះញង់ឲ្យមានការរើសអើង ជេរប្រមាថអង្គ ព្រះមហាក្សត្រ និងជេរប្រមាថស្ថាប័នផ្សេង និងប្រជាពលរដ្ឋជាច្រើននាក់ក្នុងប្រទេសកម្ពុជា ។ រាល់សកម្មភាពនេះជនសង្ស័យបានបង្កើតបង្ហោះតាមបណ្ដាញសង្គម Facebook និង Tiktok ក្លែង ដោយប្រើប្រាស់មធ្យោបាយទូរសព្ទដៃម៉ាក Vivo (Y5)ពណ៌ខៀវ ដែលមានគណនី ឈ្មោះដូចខាងក្រោម៖
*ទី១៖ ត្រាំងសិលា អង្គរធំភូមិប្រាសាទ
*ទី២៖ សិលា សៀមរាប ឬ សិលា ប្រាសាទ
*ទី៣៖ គណនី Tiktok ឈ្មោះ សិលាសៀមរាប
សមត្ថកិច្ចបានបញ្ជាក់ថា ក្រោយឃាត់ខ្លួននិងសាកសួរជនសង្ស័យបានឆ្លើយសារភាពថា ខ្លួនពិតជាបានបង្ហោះដោយប្រើប្រាស់គណនីដូចខាងលើពិតប្រាកដមែន ដោយប្រើឈ្មោះ និងរូបថតអតីតប្រពន្ធរបស់ខ្លួន ដើម្បីឲ្យសមត្ថកិច្ចចាប់អតីតប្រពន្ឋខ្លួនដាក់គុកព្រោះដោយហេតុខឹងអតីតប្រពន្ធមិនរស់នៅជាមួយខ្លួន ៕
