ខេត្តកំពង់ធំ ៖ ក្រុមក្មេងស្ទាវមួយក្រុម បានលើកគ្នាមកកាប់យុវជនម្នាក់ ដោយសារតែរឿងទំនាស់ពាក្យសំដី ទើបឈានដល់ការកាប់គ្នា ដូចរឿងចិនហុងកុង កាលពីវេលាម៉ោង ២២.៥០ នាទី ស្ថិតនៅស្ពានចាស់ ភូមិទី១ សង្កាត់កំពង់ធំ ក្រុងស្ទឹងសែន ខេត្តកំពង់ធំ នៅចំណុចលើស្ពានកំពង់ធំនៅថ្ងៃទី ០៥ ខែមេសា ឆ្នាំ២០២០។
ស្នងការរងទទួលផែនព្រហ្មទណ្ឌបានឲ្យដឹងថា ពិតជាមានករណីហិង្សាដោយចេតនា ដោយសារតែជនដៃដល់ លើកគ្នាមកកាប់លើជនរងគ្រោះឈ្មោះ ស៊ុ សេងហួរ ភេទប្រុស អាយុ ២២ឆ្នាំ មុខរបរមិនពិតប្រាកដ រស់នៅភូមិបល្ល័ង្គលិច សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ បណ្ដាលឲ្យមានរបួសដៃទាំងសងខាង (កដៃខាងឆ្វេងរបួសដាច់សាច់) កំពុងសំរាកព្យាបាលនៅមន្ទីរពេទ្យខេត្តកំពង់ធំ ។
ចំណែកជនបង្កហតុ មួយក្រុមដែលបានធ្វើសកម្មភាព មិនស្គាល់អត្តសញ្ញាណ ដោយសារតែក្រោយពីកើតហេតុភ្លាម ក៏បាននាំគ្នារត់គេចខ្លួន តែទោះជាយ៉ាងណា ក៏ក្នុងករណីនេះ កម្លាំងជំនាញខេត្ត ក្រុង និងប៉ុស្តិ៍រដ្ឋបាល បាននឹងកំពុងធ្វើការស្រាវជ្រាវ និងចងក្រងសំណុំរឿងតាមនីតិវិធីបន្ត ។
