ខេត្តកោះកុង ៖ ប្រជាពលរដ្ឋនៅឃុំថ្មស ស្រុកបូទុមសាគរ ខេត្តកោះកុង បានរិះគន់លោក អិក កួន មេឃុំថ្មស ដែលបានចេញលិខិត កិច្ចសន្យាអោយលោក ដាន ដារ៉ា សាងសង់ផ្ទះពីលើអូរ ធ្វើអោយរាំងស្ទះចរន្តទឹកហូរលិចផ្លូវ លិចលំនៅដ្ឋានប៉ះពាល់ដល់ប្រជាពលរដ្ឋ ទូទាំងឃុំថ្មសតែម្ដង។ គួររំលឹកថា ឈ្មោះ ដាន ដារ៉ា នេះពីមុនមកបានរំលោភធ្វើផ្ទះពីលើអូររួចស្រេចទៅហើយ ដែលធ្វើអោយរាំងស្ទះផ្លូវទឹក ហើយធ្វើអោយលិចលង់ផ្ទះសម្បែងរបស់ប្រជាពលរដ្ឋជារៀងរាល់ឆ្នាំ។ មិនតែប៉ុណ្ណោះទេ ឥឡូវនេះលោកមេឃុំ អិក កួន បានធ្វើកិច្ចសន្យា អោយឈ្មោះ ដាន ដារ៉ា នេះចាក់ប្លង់សេឡើងថែមទៀតនិងអោយធ្វើផ្ទះពីលើអូរដដែល។
មិនតែប៉ុណ្ណោះ មានក្មួយមេឃុំម្នាក់ធ្វើជាមេភូមិថ្មស ដែលលោកមេឃុំទើបតែតែងតាំង បានធ្វើផ្ទះថ្មពីលើអូរ ធ្វើអោយ រាំងស្ទះផ្លូវទឹកលិចផ្ទះប្រជាពលរដ្ឋជារៀងរាល់ឆ្នាំដែរ។ តាមប្រភពពីប្រជាពលរដ្ឋនៅឃុំថ្មសទាំងអស់បានរិះគន់ថា អ្នកដែលសាងសង់ សំណង់អាណាធិបតេយ្យទាំងអស់នេះ គឺមកពីមេឃុំបើកដៃអោយសាងសង់ទាំងអស់។
កន្លងមក ប្រជាពលរដ្ឋបាននាំគ្នាផ្ដិតមេដៃចំនួន១៤០គ្រួសារ មានតំណាងប្រជាពលរដ្ឋ២នាក់ (១)ឈ្មោះ ហេង សាង (២)ឈ្មោះ ឃួរ ធូង ដាក់លិខិតដើម្បីអោយអាយអាជ្ញាធរដោះស្រាយ បញ្ហាអ្នកដែលសាងសង់សំណង់រំលោភអូរ តែការងារដោះស្រាយនោះមិនចេញទេ មិនតែប៉ុណ្ណោះ លិខិតដែលមានស្នាមមេដៃ១៤០គ្រួសារនោះ តំណាងពលរដ្ឋបានជូនដល់ដៃលោក សុខ សុទ្ធី អភិបាលរងខេត្តកោះកុង អោយជួយដោះស្រាយបញ្ហាកង្វល់របស់ប្រជាពលរដ្ឋ តែលិខិតនោះត្រូវបានបិតបាំង កប់បាត់ទៅស្ងាត់ឈឹង៦ទៅ៧ខែហើយ។
តាមសម្ដីលោកមេឃុំ អិក កួន បាននិយាយតាមទូរស័ព្ទថា រឿងរ៉ា ផ្ទះរបស់ឈ្មោះ ដាន ដារ៉ា កំពុងចាក់ប្លង់សេនេះ គឺអោយគាត់ធ្វើកម្ពស់ ឡើង០៨តឹក ពីលើអូរទៀត កាលពីមុនមកគាត់ធ្វើទាបពេក វារាំងស្ទះទឹកអូរ អោយគាត់ធ្វើឡើងសិន បើនៅស្ទះទឹកទៀត ចាំគឹតទៀត ។លោកមេឃុំបន្តថា បើមិនអោយគាត់ធ្វើពីលើអូរទេ ពួកគាត់អត់មានដីរស់នៅទេ។លោកមេឃុំបន្តថា ច្បាប់មិន អនុញ្ញាតិអោយសាងសង់ក្នុងអូរទេ តែធ្វើយ៉ាងម៉ិចបើគាត់នៅទៅហើយ អោយគាត់រុះរើទៅណា ហើយរឿងចេញលិខិតស្នាមនោះ គាត់មិន បានអនុញ្ញាតិអោយទេ ហើយក៍មិនមានច្បាប់ដែរ។
ចំណែកលោក ហាក់ ឡេង អភិបាលស្រុកបូទុមសាគរថា ចាំលោកចុះទៅមើលសិនរឿងនេះ។
ប្រជាពលរដ្ឋសំណូមពរ លោកជំទាវ មិថុនា ភូថង អភិបាលខេត្តកោះកុង ពុំគួរព្រងើយកន្តើយចំពោះលោក អិក កួន មេឃុំថ្មស ដែលអនុញ្ញាត្តិឲ្យសង់ផ្ទះក្នុងអូរ ស្ទះចរន្តទឹកហូរបណ្តាលឲ្យលិចលង់ផ្ទះប្រជាពលរដ្ឋនោះទេ៕ដោយ យួន ឈីវ
