រួមមានមន្ត្រីរាជការ បុគ្កលិករដ្ឋនិងឯកជន ពាណិជ្ជករ និងប្រតិបត្តិករទេសចរណ៍ប្រមាណជា ៤០០នាក់ មកពីស្ថាប័ន-អង្គភាពនានា ដូចជាមន្ទីរពាណិជ្ជកម្ម សភាពាណិជ្ជកម្ម ធនាគារ ស្ថាប័នមីក្រូហិរញ្ញវត្ថុ ទីភ្នាក់ងារទេសចរណ៍ និស្សិតមកពីសាកលវិទ្យាល័យផ្សេងៗ អ្នកគ្រប់គ្រងសណ្ឋាគារ និងភោជនីយ៍ដ្ឋាន ជាដើម ។ល។ បានជួបជុំគ្នា នៅក្នុងវេទិកាវិស័យឯកជនតាមបណ្តាខេត្ត ដែលរៀបចំឡើងដោយក្រសួងពាណិជ្ជកម្ម សហការជាមួយអាជ្ញាធរខេត្តសៀមរាប ។
នាព្រឹកថ្ងៃទី២៣ ខែកុម្ភៈ ឆ្នាំ២០១៥ វេទិកានេះ បានរៀបចំដំណើរការនៅសណ្ឋាគារអប្សរាអង្គរ ក្រុងសៀមរាប ។ ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម និងជាតំណាងជាតិសមាគមសេដ្ឋកិច្ចអាស៊ាន បានអញ្ជើញចូលរួមធ្វើជាវាគ្មិនយ៉ាងសំខាន់ ដឹកនាំដំណើរការវរទិកាដ៏មានសារសំខាន់នេះ ក្រោមប្រធានបទ ការរៀបចំខ្លួន សម្រាប់សមាហរណកម្មសហគមន៍សេដ្ឋកិច្ចអាស៊ាន ហើយនៅពេលរសៀលក្នុងថ្ងៃតែមួយនេះដែរ ក្រសួងពាណិជ្ជកម្ម ក៏មានរៀបចំដំណើការ សិក្ខាសាលាជាស៊េរីដែលពាក់ព័ន្ធមួយទៀត ស្តីអំពី បច្ចុប្បន្នភាព នៃកំណែទម្រង់ ក្រសួងពាណិជ្ជកម្ម និង ការជួយអភិវឌ្ឍវិស័យឯកជន ។
នៅក្នុងវេទិកាវិស័យឯកជនតាមបណ្តាខេត្ត ស្តីអំពី ការត្រៀមខ្លួនសម្រាប់សមាហរណកម្មសហគមន៍សេដ្ឋកិច្ចអាស៊ាន ត្រូវបាននិយាយអំពីការទទួលបានហិរញ្ញប្បទាន ការចូលទៅកាន់ទីផ្សារនឹងការប្រកួតប្រជែង និងបាននិយាយផងដែរ អំពីបញ្ហាជាក់លាក់ ដែលទាក់ទងទៅនឹង ផលិតផលកសិកម្ម ។
ក្នុងសន្ទរកថា និងបទបង្ហាញគន្លឹះ របស់ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម និងជាតំណាងជាតិសមាគមសេដ្ឋកិច្ចអាស៊ាន បានលើកឡើងថា កម្ពុជាបច្ចុប្បន្ន បាននិងកំពុងស្ថិតក្នុងរបត់ថ្មី ហើយសហគមន៍សេដ្ឋកិច្ចអាស៊ាន គឺជាចំណុចរបត់នៃបរិយាកាសធុរៈកិច្ច ដូច្នេះ តើយើង (កម្ពុជា) ត្រូវធ្វើយ៉ាងដូចម្តេច ? ដើម្បីទាញយកអត្ថប្រយោជន៍ កាលានុវត្តភាព និងជំនះដោះស្រាយឲ្យបាន នូវរាល់កត្តាប្រឈម នានា ដែលនឹងអាចកើតមានឡើងនៅពេលនោះ ? ។
ជាមួយនឹងការបង្ហាញសារគន្លឹះ ឯកឧត្តម បានលើកយកឧទាហរណ៍មួយដើម្បីបង្ហាញអង្គវេទិកា នោះគឺបញ្ហាលំហូរពលកម្មជំនាញដោយសេរី ។ ឯកឧត្តមបានលើកឡើងថា នៅក្នុងសមាហរណកម្មសហគមន៍សេដ្ឋកិច្ចអាស៊ាន ធនធានមនុស្សនឹងត្រូវបានចរាចរណ៍ដោយសេរី នៅក្នុងតំបន់អាស៊ាន ! តើអ្វី ? ដែលជាការព្រួយបារម្ភរបស់កម្ពុជា ? អ្នកជំនាញបរទេស មកដណ្តើមការងារល្អៗនៅស្រុកយើង ឬ យ៉ាងមេច? ។
ឯកឧត្តម បានបកស្រាយថា បញ្ហានេះ មិនមែនជាការព្រួយបារម្ភរបស់កម្ពុជានោះទេ ព្រោះអ្នកជំនាញទាំងនោះ មានតម្លៃខ្លួនខ្ពស់នៅស្រុកគេ ស្រុកយើងមានតម្លៃទីផ្សារពលកម្មទាបជាង ដូច្នេះអ្នកទាំងនោះវាពិបាកបន្តិចក្នុងការមកទទួលប្រាក់តម្លៃខ្លួនទាបនៅស្រុកខ្មែរ ក៏ប៉ុន្តែ អ្វីដែលកម្ពុជាត្រូវបារម្ភ នោះគឺធនធានមនុស្សរបស់កម្ពុជា ត្រូវបានធ្វើចំណាកស្រុក ហូរចូលទៅយកតម្លៃពលកម្មខ្ពស់នៅស្រុកគេ ក៏ប៉ុន្តែទោះជាយ៉ាងណា បញ្ហានេះ រាជរដ្ឋាភិបាលកម្ពុជា មិនមានការហាមឃាត់នោះឡើយ ។
នៅក្នុងសំនួរដែលសួរថា តើកម្ពុជាកំពុងឈរនៅទីណា ? ឯកឧត្តមបានបង្ហាញការឆ្លុះបញ្ចាំងទៅនឹងផែនការលម្អិតរបស់សហគមន៍សេដ្ឋកិច្ចអាស៊ាន ( AEC ) ដែលត្រូវបានចុះហត្ថលេខានៅក្នុងឆ្នាំ ២០០៧ ដែល ACE នោះ នឹងបង្កើតអាស៊ាន ឲ្យទៅជាទីផ្សារ ឲ្យអាស៊ានទៅជាគោលដៅដែលមានថាមពល ប្រកប ដោយសសរស្តម្ភទាំង៤ គឺទី១ ទីផ្សារនិងមូលដ្ឋានផលិតកម្មតែមួយ ទី២ តំបន់ដែលមានសេដ្ឋកិច្ចប្រកួតប្រជែង ទី៣ ការអភិវឌ្ឍសេដ្ឋកិច្ចដោយសមធម៌ និងទី៤ គឺ សមាហរណកម្មសេដ្ឋកិច្ចទៅក្នុងពិភពលោក ។ ឯកឧត្តមបានបញ្ជាក់ថា ឆ្នាំ២០១៥នេះ វាគ្រាន់តែជាការចាប់ផ្តើមតែប៉ុណ្ណោះ សមាហរណកម្ម សហគមន៍ សេដ្ឋកិច្ចអាស៊ាន គឺជាកត្តាសំខាន់បំផុត នៃដំណើរអភិវឌ្ឍសេដ្ឋកិច្ចកម្ពុជា ដូច្នេះយើងត្រូវចាប់យកឱកាសមាសនេះឲ្យបាន ហើយត្រូវចូលរួមទាំងអស់គ្នា ៕
ប៊ុនធឿន ( សៀមរាប)
