ខេត្តកោះកុង ៖ ដីឆ្នេរសមុទ្រមួយកន្លែងត្រូវបានគេធ្វើរបងហ៊ុមព័ទ្ធ នៅចំណុចត្រពាំងរមាស់ ស្ថិតនៅក្នុងភូមិនេសាទ ឃុំជ្រោយស្វាយ ស្រុកស្រែអំបិល ខេត្តកោះកុង។ តាមប្រភពពីប្រជាពលរដ្ឋបានឲ្យដឹងថា ដីឆ្នេរសមុទ្រមួយកន្លែងនេះ មានម្ចាស់ឈ្មោះ ហេង សុខ ណា នៅទីក្រុងភ្នំពេញ។
តាមប្រភពព័ត៌មានពីប្រជាពលរដ្ឋ និងអាជ្ញាធរមូលដ្ឋានសូមមិនបញ្ចេញឈ្មោះបាននិយាយថា ម្ចាស់ដីដែលធ្វើរបងហ៊ុមព័ទ្ធ មាត់សមុទ្រ និងធ្វើសំណង់នេះ គឺជាអ្នកធំម្នាក់ ហើយជាអ្នកមានអំណាច មានលុយ បានមកចាក់ដីនៅមាត់សមុទ្រ ហើយចាក់ដីលុប ព្រែកនិងព្រៃកោងកាង យកធ្វើជាកម្មសិទ្ធិផ្ទាល់ខ្លួន។ តាមប្រភពដដែលបន្តថា ព្រែកដែលគេចាក់ដីលុប គឺជាកន្លែងសំរាប់ប្រជាពលរដ្ឋ រកស៊ីដាក់ក្ដាម ដាក់ត្រី បង្គា ហើយជាកន្លែងសម្រាប់មច្ឆាជាតិ និងធនធានធម្មជាតិ សម្រាប់ក្ដាម បង្គា ត្រី ពង កូន ផងដែរ តែពេលនេះ ត្រូវបានលោក ហេង សុខ ណា ចាក់ដីលុបព្រែកនេះបាត់ទៅហើយ ព្រមទាំងធ្វើរបងហ៊ុមព័ទ្ធទៀតផង សព្វថ្ងៃនេះ ប្រជាពលរដ្ឋពិបាកប្រកបរបរនេសាទជាលក្ខណៈគ្រួសារណាស់ ដោយសាររាំងស្ទះ ផ្លូវទូករបស់គាត់ដែលធ្វើនេសាទ តាមដងព្រែកនេះ។
តាមប្រភពពីលោកមេឃុំជ្រោយស្វាយ គឺលោក ប៊ុន រ៉េ បាននិយាយ ប្រាប់តាមទូរស័ព្ទថា រឿង គេធ្វើរបងហ៊ុមព័ទ្ធមាត់សមុទ្រនេះ គាត់មិនបានដឹងទេ ហើយរឿងសាងសង់សំណង់នោះ ក៍គាត់មិនបានដឹងដែរ។ លោកមេឃុំបន្តថា កន្លងមក អ្នកដែលមានលុយ មានអំណាចនោះ ពួកគាត់មិនបានមកសុំច្បាប់ ឬប្រាប់អាជ្ញាធរមូលដ្ឋាននោះទេ គឺពួកគាត់ធ្វើតាមចិត្តចង់របស់គេ ហើយដល់ពេល អាជ្ញាធរទៅហាមឃាត់ ហើយអោយធ្វើច្បាប់ អ្នកទាំងនោះខឹងអាជ្ញាធរ ហើយនិយាយប្រមាថអាជ្ញាធរទៀត។ លោកមេឃុំ បន្តទៀតថា រឿងដែលគេចាក់ដីលុបព្រែកនោះ គេបាន ប្រាប់ទៅអាជ្ញាធរស្រុកថាដាក់លូ ធ្វើផ្លូវ សំរាប់ដឹកសម្ភារៈ ទៅទីនោះ រូចហើយកាយចេញវិញ នេះជាការលើកឡើងរបស់លោកមេឃុំ ប៊ុន រ៉េ ។
ចំណែកលោក ជា ច័ន្ទកញ្ញា អភិបាលស្រុកស្រែអំបិល បាននិយាយតាមរយៈ ទូរស័ព្ទថា រឿងរ៉ាវគេធ្វើរបងហ៊ុមព័ទ្ធដីមាត់សមុទ្រ និង សាងសង់សំណង់នោះ គាត់មិនបានដឹងទេ ។ លោកបន្តថា ចាំលោកអោយខាងជំនាញ និងមេឃុំ ចុះទៅពិនិត្យមើល បើអត់ច្បាប់ លោកនិងអោយគេឈប់ជាបន្ទាន់ ហើយនិងធ្វើការដកហូតសម្ភារៈទុក រង់ចាំការដោះស្រាយ ហើយអោយធ្វើច្បាប់។
ចំណែកលោក ជា នាង ប្រធានការិយាល័យភូមិបាលស្រុកស្រែអំបិល ពេលបានដឹងរឿងនេះ លោក បញ្ញាអោយក្រុមការងារ ភូមិបាលចុះទៅបន្ទាន់ រហ័សទាន់ចិត្ត ដឹកនាំដោយលោក កុក សំអ៊ាន ភូមិបាលស្រុក រួមនិងអាជ្ញាធរឃុំជ្រោយស្វាយ ចុះទៅដល់ ទីតាំងនោះ និងពិនិត្យឃើញថា មិនមានច្បាប់សាងសង់នោះទេ។
នៅក្នុងការពិនិត្យសំណង់នោះ លោក កុក សំអ៊ាន បានហៅ មេការសំណង់ ទី១មានឈ្មោះ ម៉ាន់ ម៉េង និងម្នាក់ទៀតឈ្មោះ ស៊ិន ជីវ តំណាងម្ចាស់ដី ហើយជាអ្នកមើលដីអោយលោក ហេង សុខណា ។ លោក កុក សំអ៊ាន បានហៅអ្នកទាំងពីរនេះមកធ្វើការផ្ដិតមេដៃអោយឈប់ ធ្វើការសាងសង់បន្តទៀត រង់ចាំធ្វើការតាមផ្លូវច្បាប់។ តាមការចុះពិនិត្យមើលគឺ សំណង់មាន៣កន្លែង ១កំពុងតែធ្វើ ចាក់គ្រឹះ ឡើង ជញ្ជាំងហើយ០១ខ្នងរួចហើយ និង ០២ទៀត កំពុងចាក់ជើងគ្រឹះសំណង់បន្តទៀត។សំណង់នេះ មាន ចំងាយពីមាត់ឆ្នេរសមុទ្រ ៤៥ម៉ែត្រ ហើយគេធ្វើការសាងសង់តែម្ដង។
ប្រភពព័ត៌មានពីតំណាងម្ចាស់ដី ដែលមានឈ្មោះ ស៊ិន ជីវ បាននិយាយថា មេរបស់គាត់បានទិញដីមាត់សមុទ្រនេះពីលោក ជៀម ឡាយ។
តាមប្រភពពីប្រជាពលរដ្ឋបានអោយដឹងថា លោក ជៀម ឡាយ ជាអ្នកមានលុយ មានអំណាច ហើយមានងារជាឧកញ៉ាផង ។ លោក ជៀម ឡាយ តែងតែមកដើរទិញដីមាត់សមុទ្រ ដីឆ្នេរ យកមកលក់បន្តទៀត មិនគឹតផលប៉ះពាល់ដីរបស់រដ្ឋទេ ហើយលោក ជៀម ឡាយ ក៍មានដីធ្លីនៅមាត់សមុទ្រ ក្នុងភូមិនេសាទនេះជាច្រើនកន្លែងផងដែរ នេះជាការលើកឡើងរបស់ពលរដ្ឋនៅទីនោះ។
គួររំលឹកថា តំបន់មាត់សមុទ្រ តំបន់ឆ្នេរ និង ដីព្រែកោងកាង ព្រៃលិចទឹក គ្របដណ្តប់ដោយអ្នកមានលុយ មានអំណាច មករំលោភបំពានយក មិនចេះចប់មិនចេះហើយ ហើយតែងតែសំដែងឬទ្ធី អាងអំណាច ឃើញច្បាប់ហើយ បំពានច្បាប់ទៀត នេះហើយ ចរិតមន្ត្រីរាជការមួយចំនួនតូចដែលតែងតែបំពានដីធ្លីរបស់រដ្ឋជាហូរហែមក។
លោក ជា ច័ន្ទកញ្ញា អភិបាលស្រុកស្រែអំបិល និងលោក ជា នាង ប្រធានការិយាល័យ ភូមិបាលស្រុកស្រែអំបិល ពិតជាធ្វើការងារបានល្អ រហ័សទាន់ចិត្ត តាមតម្រូវការ បំរើសេវាសាធារណៈជូនរដ្ឋ និងការពារសម្បត្តិរបស់រដ្ឋ ធនធានធម្មជាតិរបស់រដ្ឋ និង បំរើ ប្រជាពលរដ្ឋ លឿនល្អ ពិតជាមន្ត្រីបំរើរាជការ បានទាន់ចិត្តមែន ៕
ដោយ យួនឈីវ
