បាត់ដំបង ៖ បុរស២នាក់ ជាកម្លាំងប្រដាប់អាវុធផឹកស៊ីស្រវឹង ចោទប្រជាពលរដ្ឋ (ថាពួកហិតកាវ) លួចខោលីអូរ និងស្បែកជើងផ្ទាត់១គូ រួចយកដំបងវាយមនុស្សប្រុសស្រីក្មេងចាស់ យ៉ាងព្រៃផ្សៃ និងវាយស្ត្រីមានផ្ទៃពោះ អោយរងរបួសនិងចាប់ក្មេងអាយុ ១០ ខែយួរជើងបោក ប៉ុន្តែបានអ្នកជិតខាងជួយទាន់ ហើយដឹកជនរងគ្រោះទៅមន្ទីរពេទ្យ ។
ហេតុការណ៍បង្កអោយមានការភ្ញាក់ផ្អើលនេះ កើតឡើងកាលម៉ោង ១ និង៤០នាទី រសៀលថ្ងៃទី១៤ ខែកុម្ភៈ ឆ្នាំ២០១៥ នៅចំណុចស្ថានីយរថភ្លើង (រ៉ាជង្រុក) ក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ។
ប្រភពបានអោយដឹងថា បុរសសង្ស័យ ២ នាក់ដែលវាយធ្វើបាបប្រជាពលរដ្ឋមាន ៖ ទី១ ឈ្មោះ ញៀន សារ៉ាត់ ជាមន្ត្រីយោធាភូមិភាគទី៥ រស់នៅក្នុងភូមិកើតហេតុ និងទី២ អ្នកភូមិហៅឈ្មោះប្រុសមុខច្រេះ ឬប៉ាអានុតជាមន្ត្រីអាវុធហត្ថខេត្តបាត់ដំបង ។
ចំណែកជនរងគ្រោះមានទី ១ ឈ្មោះ ប្លែក ឌី ភេទប្រុសអាយុ ៣០ ឆ្នាំរបួសដៃខ្លួន ទី២ ឈ្មោះ ចែម ទិត្យ ភេទប្រុសអាយុ ២៧ ឆ្នាំរបួសខ្នង ទី៣ ឈ្មោះភីយ៉ុងភេទប្រុសអាយុ ១៣ ឆ្នាំ ទី៤ កុមារអាយុ ១០ ខែ ចាប់យួរជើង និង ២ នាក់ប្តីប្រពន្ធឈ្មោះ ផល សាវ័ន្ត អាយុ ១៩ ឆ្នាំជាប្តី រងរបួសភ្នែកឆ្វេង និងឈ្មោះ ផល អ៊ឺត អាយុ ១៧ ឆ្នាំ ជាប្រពន្ធទម្ងន់ ៣ ខែ ៩ ថ្ងៃ របួសក្បាល ចំខ្លួននិងពោះដឹកទៅសង្គ្រោះនៅមន្ទីរពេទ្យ ទាំងអស់គ្នាស្នាក់ក្នុងភូមិកើតហេតុ ។
ក្រុមជនរងគ្រោះបានអោយដឹងថា មុនពេលកើតហេតុ ពួកគេអង្គុយលេងនៅក្នុងរោង (ស្ថានីយរថភ្លើង) ក្រោយមកជនសង្ស័យ ២ នាក់ ស្រវឹងស្រាចូលមក ហើយស្រែកថា អាណាលួចខោលីអូរនិងស្បែកជើងអញ បន្ទាប់មកជនសង្ស័យ បានកាច់ជញ្ចាំងផ្ទះ យកដំបងវាយពួកខ្លួនយ៉ាងសាហាវ ដូចរបប ៣ ឆ្នាំ ៨ ខែ ២០ ថ្ងៃពេលកំពុងអង្កុយជុំគ្នាលេងបៀរ ពេលនោះ ពួកយើងមិនតដៃ ព្រោះដឹងថា គេជាសមត្ថកិច្ច ។ ក្រោយពីកើតហេតុក្រុមអ្នករងគ្រោះ ទៅដាក់បណ្តឹងនៅទីបញ្ជាការ អាវុធហត្ថ ខេត្តគេដេញទៅប្តឹងនគរបាលក្រុង ពេលទៅនគរបាលក្រុងដេញទៅប្តឹងអាវុធហត្ថ ដោយការមិនទទួលបណ្តឹង យើងសម្រេចទូរស័ព្ទប្តឹងទៅលោក ច័ន្ទ សុផល អភិបាលខេត្ត ហើយលោកអភិបាលបានបញ្ជាអោយលោក អ៊ុក គីម ចៅសង្កាត់ស្វាយប៉ោ ចុះមកអន្តរាគមន៍តែម្តង ។
ក្នុងករណីនេះដែរ អ្នកសារព័ត៌មានមិនអាចសុំការបំភ្លឺពីមន្ត្រី ឬមេបញ្ជាកាអាវុធហត្ថខេត្តបានទេ ព្រោះអស់លោកជាប់រវល់ប្រជុំ ជាពិសេសមិនអោយចូលយកព័ត៌មានតែម្តង ។ រហូតមកដល់ថ្ងៃទី១៦ ខែកុម្ភៈ ឆ្នាំ២០១៥ នេះ មិនទាន់មានដំណោះស្រាយផ្លូវច្បាប់ណាមួយនៅឡើយទេ ៕
