ខេត្តកំពង់ឆ្នាំង ៖ សមត្ថកិច្ចកងរាជអាវុធហត្ថខេត្តដឹកនាំដោយព្រះរាជអាជ្ញា និងព្រះរាជអាជ្ញារង អមសាលាដំបូងខេត្ត នារសៀលថ្ងៃទី១២ខែមីនា ឆ្នាំ២០២០ បានចុះឃាត់គ្រឿងចក្រ កំពុងធ្វើសកម្មភាពលួច ជីកយកអាចម៍ដី មួយកន្លែង ស្ថិតក្នុងភូមិដំបូកកកោះ ឃុំស្វាយជ្រុំ ស្រុករលាប្អៀរ ដោយពុំមានការអនុញ្ញាត្ត ពីម្ចាស់ដី ។ ការឃាត់គ្រឿងចក្រខាងលើ
គឺយោងទៅតាមបណ្ដឹងរបស់ម្ចាស់ដី ដែលបានប្ដឹងជូនទៅព្រះរាជអាជ្ញាអមសាលាដំបូងខេត្តកំពង់ឆ្នាំងផងដែរ ។
យោងតាមប្រភពព័ត៌មានពេលម្ចាស់ដី ដែលបានដាក់ពាក្យបណ្ដឹងទៅកាន់តុលាការ បានបញ្ជាក់ថារូបគាត់មានឈ្មោះ មិន ពុធជេដ្ឋានវណ្ណ ភេទប្រុស អាយុ៥១ឆ្នាំ ជាមន្ត្រីរាជការផ្នែកសុខាភិបាល មានទីលំនៅរាជធានីភ្នំពេញ បានទិញដីស្រែធ្វើស្រូវឡើងទឹក មួយកន្លែង ចំនួន ១ ហិចតា នៅចំណុចបឹងតម្រែក ស្ថិតក្នុងភូមិដំបូកកកោះ ឃុំស្វាយជ្រុំ ស្រុករលាប្អៀរ នៅក្នុងអំឡុងឆ្នាំ២០១៦ ហើយក៍បានកាន់កាប់អាស្រ័យផលរហូតមក ។
ស្រាប់តែនៅ ក្នុងអំឡុងពាក់កណ្តាលខែកុម្ភះ ឆ្នាំ២០២០ មានឈ្មោះ ប៊ួយ មិនតាំ ភេទ ប្រុសអាយុ ៣២ ឆ្នាំ ជាជនជាតិវៀតណាម ប្រើប្រាស់អត្តសញ្ញាណប័ណ្ណសញ្ជាតិខ្មែរ បានដាក់គ្រឿងចក្រជាច្រើនគ្រឿង ទៅជីកយកអាចម៍ដីរបស់គាត់ ដោយគ្មានការអនុញ្ញាត្តិ ទោះបីគាត់ហាមឃាត់យ៉ាងណាក៏មិនឈ្នះដែរ។ ក្រោយមក គាត់បានធ្វើពាក្យប្ដឹងទៅកាន់លោកមេឃុំស្វាយជ្រុំ ឱយជួយដោះស្រាយ លោកមេឃុំក៏បានកោះហៅឈ្មោះ បួយ មិនតាំ ជនជាតិវៀតណាម ប្រើឈ្មោះខ្មែររូបនេះ ទៅដោះស្រាយចំនួន ៣ លើកនៅសាលាឃុំ ប៉ុន្តែឈ្មោះនេះមិនចូលខ្លួនទៅដោះស្រាយឡើយ។
ដោយហេតុនេះហើយទើបរូបគាត់ដាក់ពាក្យប្ដឹងចូលទៅតុលាការដើម្បីចាត់ការតាមផ្លូវច្បាប់ ដោយទាមទារសំណងការខូចខាតចំនួន ២ រយលានរៀល ទាមទារចាក់ដីលុបរណ្ដៅឱយដូចដើមវិញ និងសូមតុលាការអនុវត្តទៅតាមផ្លូវច្បាប់ ។
នៅក្នុងពេលឃាត់គ្រឿងចក្រនេះដែរ លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង បានបញ្ជាក់ថា ៖ ក្រោយពីទទួលពាក្យបណ្ដឹងហើយរូបលោក និងលោក ទី ម៉ានីន ព្រះរាជអាជ្ញារង បានដឹកនាំកម្លាំងកងរាជអាវុធហត្ថខេត្ត ចុះឃាត់គ្រឿងចក្រ មានអេស្កាវ៉ាទ័រចំនួន ២ គ្រឿង និងរថយន្តជាច្រើនគ្រឿង នៅនឹងកន្លែងបទល្មើសជាក់ស្ដែងតែម្ដង ។ ព្រមជាមួយគ្នានោះ លោកបានឃាត់មេការម្នាក់ផងដែរ ដើម្បីយកទៅសាកសួរថា តើនរណាជាអ្នកបញ្ជាឲ្យជីកដីរបស់គេដោយគ្មានច្បាប់អនុញ្ញាតបែបនេះ ។ លោកបានបញ្ជាក់ថា ៖ ការឃាត់គ្រឿងចក្រនេះ ឯកឧត្តមអភិបាលខេត្តកំពង់ឆ្នាំង បានប្រាប់មកលោកថា ៖ ឯកឧត្តមមិនពាក់ព័ន្ធនឹងរឿងនេះទេ នរណាធ្វើខុសសូមឱ្យចាត់ការតាមផ្លូវច្បាប់ចុះ ។
សូមរំលឹកដែរថាឈ្មោះ បួយ មិនតាំ ដែលជាជនវៀតណាមប្រើប្រាស់ឈ្មោះខ្មែរ មានអត្តសញ្ញាណប័ណ្ណខ្មែរ បានទិញដីនៅតំបន់នោះដើម្បីអភិវឌ្ឍឲ្យប្រជាពលរដ្ឋរស់នៅផ្ទះបណ្ដែតទឹកឡើងគោក តាមគោលការរបស់ខេត្ត ។ ប៉ុន្តែឈ្មោះនេះ តែងបានរំលោភបំពានលើប្រជាពលរដ្ឋជាច្រើននាក់ ដូចករណីខាងលើនេះជាដើម។ លើសពីនេះទៀត ឈ្មោះនេះបានទិញដីពីប្រជាពលម្នាក់ចំនួន៣៧ហិកតា តែបានរំលោភយកដល់៤០ហិកតា ហើយពេលនេះក៍មានសំណុំរឿងដល់ដៃតុលាការផងដែរ ៕
