បាត់ដំបង ៖ ៖កាលថ្ងៃទី១៥ ខែកុម្ភៈ ឆ្នាំ២០១៥ លោកព្រះរាជាអជ្ញាអមសាលាដំបូងខេត្ត និងលោកអភិបាលខេត្តប្តេជ្ញាបង្ក្រាបផ្ទះខារ៉ាអូខេ ៥ កន្លែង ពង្វក់សិស្សមិនចូលរៀន និងមានសម្លេងដល់អធ្រាតរំខានដល់ផ្ទះអ្នកជិតខាង ដែលមានទីតាំងនៅខាងលិចវិទ្យាល័យនេតយ៉ង់២០០ម៉ែត្រ ស្ថិតនៅចំណុចក្រុមទី៤ ភូមិ.ព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង។
តាមប្រភពអោយដឹងទីតាំងផ្ទះខារ៉ាអូខេទាំង ៥ កន្លែង ដែលមានខ្នងបង្អែកសមត្ថកិច្ចនគរបាលក្រុង និងកូនចៅជាមន្ត្រីសាលាក្រុងបាត់ដំបងមាន ៖ ទី១ ឈ្មោះ ចាន់ ស្រីទូច ភេទស្រីអាយុ ៨១ ឆ្នាំ ទី២ ឈ្មោះ ពៅ គឹមសៀន ភេទស្រីអាយុ ៤៧ ឆ្នាំ (ប្តីឈ្មោះ វាំន់ សុឃិន) ។ ទី៣ ឈ្មោះ ជា សុឃឿន ភេទប្រុសអាយុ ៧២ ឆ្នាំ ទី៤ ឈ្មោះ ទី ហ៊ាង ភេទស្រីអាយុ ៥៤ ឆ្នាំ ទី៥ ឈ្មោះ ភិន ឆោម ភេទស្រីអាយុ ៤៧ ឆ្នាំ (យីហោឆៃណា) ។
ប្រភពបញ្ជាក់ថា ផ្ទះខារ៉ាអូខេចំនួន ៥ កន្លែងបានបើកអោយសិស្សសាលាប្រុសស្រី និងយុវវ័យក្រោម១៨ឆ្នាំ ចូលច្រៀងតាំងពីព្រឹកព្រលឹមដល់ម៉ោង១២យប់ ដោយសិស្សទាំងភ្លេចការរៀនសូត្រ ចំណែកឪពុកម្តាយបានដឹងត្រឹមតែកូនទៅសាលារៀន មិនបានដឹងថា កូនមកចូលច្រៀងបែបនេះទេ ។
ពេលអ្នកជិតខាងប្រាប់ទៅម្ចាស់ផ្ទះខារ៉ាអូខេទាំងនោះ អោយបន្ថយសម្លេង កុំអោយឮខ្លាំងនៅពេលរំលងអធ្រាត ម្ចាស់ផ្ទះទាំងនោះមិនបន្ថយសម្លេងឡើយ ព្រោះម្ចាស់ផ្ទះខារ៉ាអូខេខ្លះមានកូនជាមន្ត្រីសាលាក្រុងបាត់ដំបង និងអ្នកខ្លះអាងបង់ប្រាក់ជូនសមត្ថកិច្ចនគរបាលក្រុងបាត់ដំបង។
កាលរៀលថ្ងៃទី១២ខែកុម្ភៈឆ្នាំ២០១៥មានក្រុមអ្នកយកព័ត៌មានយើងចុះឈរថតនៅមុខផ្ទះខារ៉ាអូខេនោះ ម្ចាស់ផ្ទះបានទាញប៉ែលរកវ៉ៃអ្នកយកព័តមានទៀតផង ដោយគេនិយាយថាមកថតធ្វើអ្វី ផ្ទះអញកន្លែងរកស៊ី ។ ពេលអ្នកយកព៍ត៌មានសុំកិច្ចអន្តរាគមន៍ពីនគរបាលក្រុង និងការិយាល័យព្រហ្មទ័ណ្ឌកំរិតស្រាលពួកគេថា ជាប់រវល់ ។ ក្រោយមកអ្នកយកព័ត៌មានទូរស័ព្ទសុំអន្តរាគមន៍ពីលោកអភិបាលខេត្ត ហើយលោកអភិបាលខេត្តបញ្ជាអោយនគរបាលក្រុងចុះមើល ប៉ុន្តែម៉ោង១៧ល្ងាច ពេលសិស្សចេញអស់ ទើបកម្លាំងនគរបាលទៅដល់ ។
លោក នួន សាន ព្រះរាជាអជ្ញាអមសាលាដំបូងខេត្ត និងលោក ច័ន្ទ សុផល អភិបាលខេត្តបាត់ដំបងបានអះអាងសន្យា កាលថ្ងៃទី១៥ ខែកុម្ភៈ ឆ្នាំ២០១៥ថា ដោយយល់ឃើញផ្ទះខារ៉ាអូខេ ខាងលើមានយុវវ័យ មិនគ្រប់អាយុចូលច្រៀងសប្បាយ និងមានសិស្សសាលាចូលច្រៀងប្រាកដមែន ដូច្នេះដើម្បីអោយសិស្សសាលាបានចូលរៀន និងអាណាព្យាបាលសប្បាយចិត្តនោះ ទីតាំងផ្ទះខារ៉ាអូខេទាំង៥កន្លែងខាងលើ និងបង្ក្រាបផ្អាកមិនអោយប្រកបរបរអាជីវកម្មនេះតទៅទៀត ៕ គឹមសុខជា
