កម្លាំងអាជ្ញាធរចម្រុះ បានចុះបង្ក្រាប ទីតាំងម៉ាស៊ីនជ្រៀកឈើ អត់ច្បាប់មួយកន្លែង
ខេត្តកំពង់ស្ពឺ ៖ កាលពីថ្ងៃទី ០៣ ខែមីនា ឆ្នាំ២០២០ វេលាម៉ោង១០ និង ០០នាទី នគរបាលសេដ្ឋកិច្ច ដឹកនាំដោយលោកវរសេនីយ៍ទោ ហេង សំរេច នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តកំពង់ស្ពឺ សហការជាមួយការិយាល័យនគរបាលប្រឆាំងភេវកម្ម អធិការដ្ឋាននគរបាលស្រុកថ្ពង សង្កាត់រដ្ឋបាលព្រៃឈើស្រុកថ្ពង និងអាជ្ញាធរមូលដ្ឋាន បានចុះបង្ក្រាបទីតាំងម៉ាស៊ីនជ្រៀកឈើខុសច្បាប់មួយកន្លែង ស្ថិតក្នុងភូមិស្យា ឃុំយាអង្គ ស្រុកថ្ពង ខេត្តកំពង់ស្ពឺ។ ទីតាំងខាងលើត្រូវបានគេស្គាល់ថាមានម្ចាស់ឈ្មោះ អ៊ុត រ៉ន ភេទប្រុស អាយុ៣៤ឆ្នាំ រស់នៅភូមិចេក ឃុំយាអង្គ ស្រុកថ្ពង ខេត្តកំពង់ស្ពឺ។
វត្ថុតាងត្រូវដកហូតរួមមាន
-ប្រភេទឈើដុលចំរុះចំនួន ៩៩ កំណាត់ ស្មើនឹង ២៩, ៤៨៥ ម៉ែត្រគូប
-ប្រភេទឈើអារសសរជ្រុងចំនួន ១៥ ដើម ស្មើនឹង ១,១៨១ ម៉ែត្រគូប និងប្រភេទម៉ាស៊ីនប្រភេទថាសចំនួន ០១គ្រឿង ចំពោះម្ចាស់ទីតាំងខាងលើ គេចខ្លួន។
បច្ចុប្បន្នវត្ថុតាងខាងលើប្រគល់ជូនកម្លាំងសង្កាត់រដ្ឋបាលព្រៃឈើស្រុកថ្ពងរក្សាទុកបណ្ដោះអាសន្ន ដើម្បីចាត់ការតាមនីតិវិធី៕
