រាជធានីភ្នំពេញ ៖ នៅព្រឹកថ្ងៃទី១១ ខែមីនា ឆ្នាំ២០២០នេះ ក្រសួងព័ត៌មាន និងក្រសួងសុខាភិបាល បានសហការជាមួយក្លឹបអ្នកកាសែតកម្ពុជា រៀបចំកិច្ចពិភាក្សាស្តីពី «សារព័ត៌មាន ចំពោះមុខ Covid-19 និងព័ត៌មានក្លែងក្លាយ»។ ដោយបានអំពាវនាវជាថ្មីម្តងទៀតដល់អ្នកសារព័ត៌មានឲ្យបន្តចូលរួមប្រឆាំងពត៌មានក្លែងក្លាយ សំខាន់ព័ត៌មានក្លែងក្លាយទាក់ទងCOVID.19 ។
ការអំពាវនាវនោះធ្វើទ្បើងក្នុងវេទិកាពិភាក្សាស្តីពី «សារពត៌មាន ចំពោះមុខCOVID.19 និងពត៌មានក្លែងក្លាយ »នៅភោជនីយដ្ឋានទន្លេបាសាក់2 ដោយមានការចូលរួមពីលោកស្រី ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល លោក ផុស សុវណ្ណ ប្រតិភូរាជរដ្ឋាភិបាល ទទួលបន្ទុកអគ្គនាយក នៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន លោក ពុយ គា អគ្គលេខាធិការ ក្លឹបអ្នកកាសែតកម្ពុជា, លោក ប៉ែន បូណា ប្រធានក្លឹបអ្នកកាសែតកម្ពុជា ព្រមទាំងបណ្តាអ្នកសារព័ត៌មានជាតិមកពីអង្គភាពនានាយ៉ាងច្រើនផងដែរ ។
ការរៀបចំឱ្យមានកិច្ចពិភាក្សាស្តីពី «សារព័ត៌មាន ចំពោះមុខ Covid-19 និងព័ត៌មានក្លែងក្លាយ» នេះឡើងស្របពេលដែលបច្ចុប្បន្ននេះ មានបណ្តាញព័ត៌មានមួយចំនួន បានបំផុសនូវព័ត៌មានក្លែងក្លាយជាច្រើនអំពីករណីវីរុសកូរ៉ូណាថ្មី ឬ Covid-19 នៅក្នុងប្រទេសកម្ពុជា ដែលធ្វើឱ្យសាធារណជនទូទៅមានការភាន់ច្រឡំ ចំពោះបញ្ហានេះ។
គួរជម្រាបថា កាលពីថ្ងៃទី២ ខែមីនា ឆ្នាំ២០២០ ក្នុងឱកាសដែលសម្តេចតេជោនាយករដ្ឋមន្ត្រី អញ្ជើញប្រគល់សញ្ញាបត្រជូននិស្សិត សាកលវិទ្យាល័យអាស៊ីអឺរ៉ុប សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់ប្រជាពលរដ្ឋ ឱ្យធ្វើជាសកម្មជនប្រឆាំង នឹងព័ត៌មានក្លែងក្លាយមួយចំនួន ដែលបង្ហោះសារមិនពិតពាក់ព័ន្ធករណីថា មានមនុស្សស្លាប់ដោយសារជំងឺរលាកសួត ដែលបង្កឡើងដោយមេរោគ COVID-19 នៅក្នុងប្រទេសកម្ពុជា។
សម្តេចតេជោ ហ៊ុន សែន បានលើកឡើងថា កាលដែលមេរោគ COVID-19 ផ្ទុះឡើងដំបូងនោះ មានការបំផុសបំផុលខ្លាំង ដែលធ្វើឱ្យម៉ាស់ឡើងថ្លៃ ប៉ុន្តែក្រោយមកការបំផុសបំផុលនោះ បានបាត់បង់ទៅវិញច្រើនហើយ។ អញ្ចឹងប្រជាពលរដ្ឋម្នាក់ៗមុននឹងជឿអ្វីមួយ ត្រូវដឹងខ្លួនឯងថាខ្លួនឈឺពិតមែន ឬអត់ ហើយបើម្នាក់ៗអត់មានឈឺអីទេ និងនៅតែបន្តអនាម័យ វាគឺជារឿងល្អ។
សូមបញ្ជាក់ថា កម្ពុជាបានរកឃើញអ្នកមានជំងឺ កូរ៉ូណា ឬ Covid-19 ចំនួន៣នាក់ រួមមាន៖ ជនជាតិចិនម្នាក់ ដែលមកពីទីក្រុងវូហាន ទី២៖ បុរសជនជាតិខ្មែរម្នាក់ នៅខេត្តសៀមរាប ដែលឆ្លងពីជនជាតិជប៉ុន និងទី៣៖ ស្ត្រីជនជាតិអង់គ្លេសម្នាក់ ដែលបានចូលមកកម្ពុជា តាមរយៈនាវាទេសចរណ៍របស់វៀតណាម៕
